Den augustus ta sinta pa apunta directiva fiho

Hues a dicidi di tene cuenta cu tanto peticion di pais Aruba como peticion di Aruba Birdlife (ABC) por medio di bin cu un directiva interino consistiendo di 2 candidato di gobierno: Jossy Lacle y gobernador anterior Fredis Refunjol, mientras na banda di instancianan no gubernamental (NGO) a tuma e candidatonan treci pa Rainbow Warriors International Norman Kuiperi y di ABC secretario di Raad van Advies Hellen van der Wal.

Durante e tratamento di e peticionnan di banda di pais Aruba y NGO Aruba Birdlife hues a tende ambos banda y a bin cu un solucion pragmatico por medio di nombra un directiva cu ta tuma consideracion cu ambos banda di medaya, asina yegando na un balans. Parke Arikok na su turno tin un manera pa opera diariamente por medio di su manager general Natasha Silva.

‘No ta un caso unda tin un partido contra otro’

Den gobierno su peticion e abogado originalmente a trece dilanti cu e candidatonan di nan banda lo ta ex director di WEB Jossy Lacle y director di Departamento di Impuesto Luenne Gomez-Pieters. Sinembargo hues a tene cuenta cu sra. Gomez actualmente ta un empleado di pais Aruba pues no kier a yega na un situacion unda gobierno por pone presion riba un propio empleado pa haya su caminda den e fundacion.

Aunke di banda di e organisacionnan ambiental a bin remarkenan cu cierto cosnan cu e abogado di gobierno lo a trece dilanti no ta berdad den nan bista, hues a subraya cu e enfoke di e reunion tabata pa asina establece un directiva cu por bay eherce su trabou y tene consideracion cu ambos banda di e partidonan interesa. Te hasta a subraya esaki na un momento ora esnan cu a atende e tratamento di ambos peticion no por a scucha abogado di gobierno de Cuba mucho bon, unda hues a remarca ‘bo por uza e mic di e otro banda pasobra aki no ta un caso di un partido contra e otro’.

Durante e tratamento abogado di gobierno a trece dilanti cu nan a ricibi reaccionnan di 2 NGO, esta Aruba Marine Mammal Foundation y Aruba Reef Care Foundation. Den e reaccion di Aruba Reef Care e abogado a subraya cu tin par di NGOnan cu ta sinti un tipo di frustracion pasobra den e ultimo 8 añanan nan no a haya oido di tanto gobierno como parke nacional. Sinembargo poco despues Milton Ponson, presidente di Rainbow Warriors a trece dilanti cu tin mas o menos 30 fundacion cu tin como prioridad medio ambiente, pero cu solamente un cantidad di 8 lo por considera manera activo, mirando cu e resto solamente ta registra den e registro di fundacionnan pero no ta mantene nan mes activo.

Hues na su turno a considera ambos punto di bista y a sugeri pa bin cu un yamada na tur organisacionnan no gubernamental cu tin medio ambiente na pecho pa asina nan trece un candidato dilanti of opina riba candidatonan cu otro NGO ta pone dilanti hues. Esaki hues a considera di haci por medio di un comunicado den corant of un yamada (oproep) prome cu yega na e proximo biaha cu corte sinta pa trata e asunto di directiva di parke na augustus.

‘Directiva no ta bay den asuntonan diario’

Reaccionando riba e resultado cu corte a duna, Geert Rep, representante di entre otro TurtugAruba, Rainbow Warriors y ABC a conta Bon Dia cu e ta sumamente contento cu e hues a bin cu a tene consideracion cu tur dos banda, asina evitando cu e directiva lo consisti solamente di interesnan gubernamental.

Riba e aspecto cu minister di infrastructura Otmar Oduber (POR) a trece dilanti bin cu un structura di dos nivel unda e directiva ta controla, sr. Rep a contesta bisando cu ‘den augustus nos ta sigui y djey lo bin un directiva definitivo, pero e directiva riba su mes ya caba ta eherce un tarea supervisor, pasobra no t’asina cu cada mainta nan ta habri porta y anochi nan ta cera porta, no, esey no t’asina’.

Riba e polemica cu trahadonan y tambe e problemanan cu segun abogado de Cuba e bestuur tabatin cu varios director den pasado hues no a bay mucho den detaye. Alabes el a evita unda cu por conflictonan di interes, por medio di tene e candidato di pais Aruba den sra. Gomez-Pieters te na ultimo mirando cu e ta ambtenaar. Reaccionando riba esaki sr. Rep a expresa cu ‘mi tin hopi confiansa den e hues aki, pasobra e ta pensa riba tur sorto di cos, e ta obhetivo, lihe, dus pa mi e ta hopi bon’.