Home Regional Costa Rica: Di dos buelta di eleccion presidencial: Alvarado vs. Alvarado

Costa Rica: Di dos buelta di eleccion presidencial: Alvarado vs. Alvarado

211

Tur dos ta periodista, musico y ta comparti e fam, pero nan ideanan politico y social ta diametralmente contrario. E conservador opositor evangelista y e politologo di e partido gubernamental lo topa otro den e di dos buelta di eleccion dia 1 di april venidero.

E periodista y predicado evangelico Fabricio Alvarado a wordo confirma diadomingo como e fenomeno di eleccion presidencial di Costa Rica cu su defensa di principio y balornan y e famia tradicional, pero mester enfrenta Carlos Alvarado, cu tin e apoyo di e hobennan y ta priminti di mantene e pais como un bastion progresista den e region.

Fabricio Alvarado a gana e prome buelta di eleccion presidencial logrando casi 25% di voto, mientras e periodista Carlos Alvarado, di e Partido Accion Ciudadana (PAC), a logra 21% di e votonan.

Fabricio Alvarado, musico y compositor di album cristian, di 43 aña, na 2014 a dicidi di drenta politica como abanderado di e partido evangelico ultra conservador restauracion nacional, cu cual el a gana su asiento di diputado y a bira un di e opositornan grandi di e agenda progresista di presidente Luis Guillermo Solis. Den e campaña presidencial, su candidatura tabatin solamente como 3% den encuesta, te den e ultimo simannan. Sinembargo, su oposicion fuerte contra e resultado di e consulta haci na corte Inter Americano di Derecho Humano, cu a respalda matrimonio mesun sexo, a haci cu el a haya mas apoyo di e sectornan conservador. El a adverti den campaña cu si e yega na presidencia e lo por renuncia e Pacto di San José y asina ignora e decisionnan di e corte.

Mientras e tabata studia periodismo na universidad, Carlos Alvarado Quesada tabata soña di bira un strea di rock progresivo, pero el a drenta bida politico como asesor di comunicacion. Cu un posgrado den Ciencia Politico y estudionan na Reino Uni, su talento artistico a pasa pa buki, produciendo cuatro obra den 10 aña. Esun mas conoci ta e novela premia La historia de Cornelius Brown. Ademas e tabata vocalista den varios banda di rock.

Carlos Alvarado, tambe ex ministro di Trabao di apenas 38 aña, a trece e forsanan progresista hunto cu un mensahe di continuidad di e gobierno actual di partido accion ciudadana (PAC). E ta presenta su mes como un cara nobo y fresco, como e ministro mas hoben di e actual gabinete di Luis Guillermo Solis y lo ta, si e gana presidencia na april, un di e presidentenan mas hoben den historia di e pais.