(Infobae) – E Colombiano Juan Carlos Sánchez, conoci como e Lobo Feroz, a wordo aresta na Venezuela, despues di varios aña di investigacion policial na diferente pais, asina autoridadnan Venezolano a informa. E homber ta ser acusa di a viola por lo menos 274 mucha y adolescente na Colombia. Despues e tabata bende e videonan di e violacionnan na pedofil riba internet.
Autoridadnan Venezolano a confirma na Colombia e captura na december, y awor e ta den un prizon na Caracas na espera di su eventual entrega na Colombia.
“E homber aki ta wordo acusa di mas di 274 abuso di mucha y adolescente”, asina general Jorge Vargas, hefe di polis di investigacion criminal (Dijin), a informa na e revista Semana. Segun e oficial, den curso di e investigacion nan a haya multiple cuenta di e-mail relaciona cu abuso di menor.
Sánchez tabata deteni na 2008 bao sospecho di a viola un menor di 14 aña, pero a sali liber e mesun aña. Di acuerdo cu publicacion na Colombia, desde e tempo ey el a ataca otro menornan, cu cual su cantidad di victima lo ta yegando 500.
Un di investigadonan a bisa Semana cu e homber tabata busca su victimanan den e salonnan di wega di video di e centronan comercial y tabata comete e abusonan den un vivienda na Barranquilla.
Polis tabata por lo menos cinco aña su tras, y danki na un aviso di organismonan di siguridad Mexicano a logra localisa e criminal. Na e pais aki autoridadnan a captura un Mexicano cu centenares di video cu Sánchez tabata manda pe, cu tabata identifica su mes den su e-mailnan como Lobo Feroz.
