Cu cada candela, tin menos placa pa saca Serlimar for di su problemanan. Asina Anko Koopmans, director di Serlimar a bisa Bon Dia Aruba. “Locual nos ta haciendo sin embargo ta djis pone un tape riba un herida, cu no ta cura,” Koopmans a comenta, kende na november a entrega su carta di retiro na Prome Minister Evelyn Wever Croes.

Manera ta conoci, tin un otro candela cu a cuminza riba dump y tin algun dia ta kima caba. E candela a inicia den e area unda ta tira resto di mata corta, conoci na Serlimar como ‘Groen Afval.’ Te cu recien e matanan corta aki tabata bay den un otro dump special pa nan. Pero e buraco aki ya no ta na disposicion di Serlimar mas, y mester tuma e sushedad aki riba dump cu en realidad no tin mas lugar. E candela mes a inicia den weekend y a dicidi pa laga personal di dump traha riba dje durante henter e ultimo dianan. Sin embargo, ta te awe e ta mustra di a drenta bao control.

Anko Koopmans no ta sigur si e candela tabata spontaneo, of cu hende por a cend’e, pero ya esey no ta e punto mas. “Pasobra Serlimar ta na su extremo y locual ta haciendo ta purba traha cu e poco recursonan cu tin. Consecuentemente mester a laga henter e bulto kima te ora cu tur cos a bay. Parkietenbos ta yen, demasiado yen y mester un solucion. No solamente palabra y promesa. Nos mester di placa y accion pa remedia dump.”

Ley Serlimar

Serlimar ta den ‘surseance van betaling’ cu ta significa cu creditornan a acepta pa warda pa nan placa, pa duna e compania oportunidad pa reorganisa. Riba esey, e acuerdo cu Hulanda pa ayudo di liquidez ta menciona specificamente cu Serlimar mester bira totalmente independiente di subsidio di Gobierno. E intencion di e Ley di Serlimar tabata pa regla esaki y sigura cu e compania lo haya su entrada sigura. E ley no a pasa na 2019 y segun Anko Koopmans a bisa Bon Dia Aruba, na e momentonan aki ta poniendo e cambionan riba papel pa Prome Minister Evelyn Wever-Croes y Departamento di Legislacion y Asunto Huridico (DWJZ) a traha riba e coreccionnan, y ta spera cu por manda esakinan prome cu e Director bay for di Serlimar.

Mester di placa di Gobierno

Tanten cu no tin un fluho di entrada sigur cu pa Serlimar, e compania ta keda depende di entrada for di Gobierno. “Nos a puntra mescos cu aña pasa, pa haya e DVO ( esta pago basa riba e Dienstverleningsovereenkomst, firma cu Gobierno) prome den aña, pa por yega na 3 miyon florin pa luna.”

Serlimar ta ricibi 1.7 miyon tur luna, pero esaki no ta suficiente pa un operacion mensual. “Nos lo por wanta asina aki te Augustus 2021, si nada cambia. Pues, reorganisacion y aumento di cobranza ta di vital importancia.”

E curator, mr Geert Rep, awor aki ta den deliberacion cu Prome Minister pa mira kico Gobierno ta bay haci. “Tin CAft cu tambe ta riba lomba di Serlimar y tambe di Gobierno. Problema ta cu Serlimar mes no ta ricibi ningun feedback di Gobierno,” Koopmans a bisa Bon Dia Aruba.

Salarionan ta cubri..pa awor

E fondonan cu Serlimar ta ricibi te ainda ta pa paga salario. Trahadornan no mester ta preocupa cu nan no ta ricibi salario pa awor. Tambe tin fondo pa mantene e trucknan. E edificio cu Serlimar ta aden no ta di e compania y como tal ta e doño mester percura pa e mantencion. “Pero nos ta haciendo tur nos esfuerso pa Serlimar por haci su trabao diariamente y nos ta pagando nos gasto di operacion diario, di 3 miyon florin pa luna, pues si, nos ta enfoca riba mantencion.”

Tin extra entrada drentando awor aki. Tin mas cliente cu ta paga, compara cu 2019. Pero e no ta yega ni na 30 porciento di locual mester tin pa aña pa por opera sin subsidio di Gobierno. Lo bay parti facturanan di 2021 na januari entrante y wak si esey ta bay haci un cambio den actitud pa hendenan paga mas. Tambe lo manda e recordatorionan pa e cuentanan di 2020 cu ainda ta habri. Esakinan a cuminza sali caba den ultimo simannan. “Nos ta spera cu esakinan lo stimula clientenan di Serlimar pa caba. Nos lo monitorea esaki.”

Parkietenbos

Serlimar ta maneha dump, pero no ta doño di e area. E landfill ta un sero di sushi cu a bay for di control caba. “Dump tabata yen 10 aña pasa caba. Es mas, e tempo ey ya a detecta cu e tabata demasiado yen. Serlimar no por hinca placa den e dump mes, pasobra e ta un asunto di Gobierno. Ta Gobierno ta responsabel pa e tereno di dump. Nos ta purba maneha e landfill, pero ya esaki no ta bay mas. No ta por nada cu tin candela constantemente,” Koopmans a sigui splica.

Gasto pa responsabilidad di otro

E problema di e candelanan sin embargo ta parce di ta core pa cuenta di Serlimar. E compania mester tin e machinnan, e trahadornan y tur e gasto di overtime pa para e candelanan. “E ta sali for di cen cu en realidad nos no tin na Serlimar, pero cu ta bay pa paga e candelanan riba dump.”

E placa cu Serlimar ta ricibi pa maneha dump ta pa anda cu e sushi cu mester bay riba e landfill, pero no tin sumanan adicional presupuesta pa cubri e gastonan di paga candela. “E gastonan pa paga e candelanan ta adicional y no presupuesta y ta significa cu ta resta menos placa pa paga debenan di Serlimar. Pues na final, hopi candela na dump ta percura pa menos placa pa Serlimar, y menos tempo pa e compania por sobrevivi. E ta un situacion hopi serio,” Anko Koopmans a adverti. “Gobierno mester bin cu un plan pa dump. Mester bolbe lanta otro taskforce of bolbe na e taskforce anterior, pa bolbe evalua e futuro di Parkietenbos. Mester bin un plan pa ataca e crisis di espacio riba e sero di sushi. Y e solucion no ta costa djis un paar di miyon. Cualkier solucion lo costa algun dies miyon.”

E director di Serlimar a bisa cu e mes a menciona un suma di 1.5 miyon florin pa dump, pero esey ta pa haya santo y machine “pa nos tapa e sero cu santo. Pero esey no ta bay kita e candelanan. E santo ta djis pa purba pa contene esakinan.” Den concepto di Koopmans, mester un solucion grandi pa Parkietenbos y esey ta sea remedi’e, min’e, manera tabata proponi bao ex-minister Otmar Oduber,cu no a logra pasobra no tabatin interes pa e proyecto. Sin embargo, ta crucial pa Gobierno bin cu un plan y no pusha e problema pa Serlimar, pasobra e compania no por carga esaki.

“Locual nos ta haci ta patch up. Nos ta manera e pleister na hospital riba un herida. Nos ta purba contene, pero nos mester e placa pa sobrevivi nos mes. Mas candela tin, mas placa mester usa pa paga esakinan y mas lihe Serlimar ta bay ‘down the drain.” Anko Koopmans a bisa cu Gobierno sa di e realidad aki. “Esey ta e problema. Nos a papia di esey tambe. Nan tur sa, e punto ta di unda ta bay saca e placa y con ta e plan pa ataca e problema cu ta di interes general di Aruba. Serlimar ta un partner den e proceso, y no esun cu ta encarga cu ehecucion di un plan pa dump. Nos por bin cu idea, nos ta manehando, pero nos no ta doño di e tereno.

E doño ta Pais Aruba.”

No tin contacto cu Prome Minister Evelyn Wever Croes

Anko Koopmans ta director ainda, despues cu Hunta di Supervision a haci un peticion pa keda den e funcion te ora haya un persona pa reemplaz’e. El a acepta, pero e no ta facil. Pasobra Anko Koopmans no ta mira ningun progreso. No ta desconoci cu Koopmans a declara e siman aki caba cu e situacion di Serlimar ta mesun cos cu promer y cu no tin ningun progreso ni perspectiva. Esey ta motibo pakico e no ta keda como director. Es mas, Bon Dia Aruba a tuma contacto cu Promer Minister Wever Croes encuanto e candela, kende a referi nos na sr. Koopmans. “Mi no tin ningun contacto cu Prome Minister desde cu mi a entrega mi carta di retiro dia 5 di November ultimo,” Koopmans a bisa.

Manera ta conoci, despues cu Gabinete Wever Croes a retira drs. Marisol Lopez Tromp, Promer Minister mes a tuma encargo di e cartera di Desaroyo Teritorial, Infrastructura y Medio Ambiente, cu ta inclui tambe Serlimar. Por corda tambe con Parlamento a exigi di ex-minister Lopez Tromp un solucion rapido, tanto pa Serlimar pero sigur tambe pa e candela na dump. Bon Dia Aruba a acerca lider di fraccion di MEP riba e candela actual, pero te na ciere di nos edicion, Sr. Rocco Tjon no a duna un reaccion.

Anko Koopmans lo keda den funcion di director di Serlimar te dia 29 di januari 2021.