Ayera mainta, minister di Asuntonan Social y di Husticia, Rocco Tjon conhuntamente cu Roland Croes, director di e compania Setar, a convoca un conferencia di prensa pa informa comunidad tocante e proyecto di Camara Toezicht, y asina haya un solucion na e problema di seguridad cu Aruba ta bibando.

Nan a papia specificamente di area di hotel, Eagle Beach y un parti di Noord hasta hotel Ritz Carlton, unda nan a splica cu ta bay pone un sistema di camara avansa cu e cual nan por haci diferente analisis di kico ta pasando na dado momento.

“Setar como compania cu tin hopi experiencia den esaki, cu su luganan critico na Aruba, nos tin ekipo di camara cu nos a tuma e experiencia como reto, como por ehemplo na aeropuerto, e compania ta sinti cu por ta un partner, den e caso aki cu minister di Husticia, pa nos pone un sistema traha na e nivel con Aruba su desaroyo ta bayendo”, Croes a señala.

Tambe el a bisa cu esaki ta un sistema di 36 camara cu tin inteligencia artificial, cu por haci video analitico. Por ehemplo manera a sucede den temporada di Covid-19 ora tabata existi e medidanan sanitario, como sameschoolingsverbod, e tipo di e sistema aki tin e inteligencia pa por detecta esaki, y por bay asina leu cu hasta por capta si tin personanan cu ta cana rond, den caso si kier tin mas vigilancia den area.

“Tur esey ta posibel. E ora ey por traha di un forma masha structura y avansa cu inteligencia artificial” Croes a bisa.

E intencion, segun e mes a sigura, ta cu nan ta convenci cu e sistema aki lo duna Aruba e proximo nivel di vigilancia, caminda por check kico ta pasando riba e beach y tambe lo yuda nan pa garantisa e seguridad pa nos bishitante y localnan na e momentonan aki.

Aruba ta un industria di turismo y manera Croes a señala, nos tin cu cuida hopi e turismo.

Como compania, nan ta sinti orguyo cu por a acepta e oferta, cu nan a discuti hunto y nan a yega na un solucion. Nan ta pensa cu por cumpli cu e peticionnan di Gobierno di Aruba pa por brinda tanto turista como localnan e sieguridad necesario.

Di su parti, minister di Asuntonan Social y Husticia, Rocco Tjon a comenta cu esaki ta un momento hopi importante pa motibo cu esaki lo yuda combati criminalidad na un manera diferente, door di haci uso di tecnologia, y esaki ta hancra den nan vision y den nan maneho di parti di ministerio.

Setar tabata un escogencia logico pa nan, manera minister Tjon a enfatisa, “pasobra den pasado hopi intento caba a wordo haci pa por cristalisa e tipo di proyectonan aki, pero nunca nan no a wordo concretisa por completo”.

Semper tabatin cierto reto pa esaki y ora nan a wak e ‘track record’ di Setar – caminda ya caba pa companianan cu ta wordo identifica como infrastructura vital, manera aeropuerto, y e magnitud di e proyectonan ehecuta eynan cu exito – pa Gobierno di Aruba tabata logico pa bay di acuerdo cu e oferta cu nan a ricibi for di Setar.

Tjon a agrega tambe cu esaki ta un sistema di camara cu por keda amplia, pa motibo cu esaki ta e prome fase for di ministerio, unda cu e plannan t’ey caba pa bay pa un fase dos y un fase tres y asina ey na tur localidad strategico na Aruba por tin e sistema di camara di vigilancia aki.

Banda di esey, minister Tjon a sigura cu for di comienso di luna di juni nan a instala un comision tambe cu ta bay sigui monitoria henter e desaroyo di e proyecto, pa motibo cu prome cu e proyecto ta completamente cla, entre 6 pa 7 luna, lo keda monitoria pa percura cu e ehecucion ta exitoso. Na mesun momento e comision aki tambe hunto cu Setar lo sigui wak e siguiente fasenan un unabes cu fase uno ta completamente ehecuta, pa por sigui cu e otro fasenan.

Durante e conferencia di prensa aki, nan a firma e oferta y e orden ministerial pa aloca e fondonan. Un parti hopi importante cu minister Tjon a señala ta cu mientras e proyecto aki ta wordo ehecuta, e huristanan di ministerio, conhuntamente cu huristanan di Setar, lo sigui delibera pa nan por yega na un service level agreement tambe, pa di e forma ey por garantisa cu e proyecto aki lo keda haya mantencion, por ehemplo, ora un camara daña y por reemplas’e of drech’e mesora.

No ta trata simplemente di colga camaranan, sino tambe pa percura cu full e trayecto a haya su debido atencion. Ademas Tjon informa cu nan ta den combersacion cu Ministerio di Turismo tambe, pa motibo cu ta importante pa e señalisacion ta presente. Esaki ta trata di borchinan cu ta bay colga pa anuncia cu e area specifico ey ta bao vigilancia di camaranan. Pero na mesun momento, tambe ta bay publica informacion pa asina cuminsa conscientisa pueblo di Aruba en general cu e area ta bao vigilancia.

E grupo di trabao tambe ta bay ta encarga pa bin cu e proposicion di con nan mester percura pa e imagennan aki ta bay wordo vigila, con ta bay comparti esaki tambe, unda cu unidadnan por reacciona despues cu posiblemente algo wordo capta cu e camaranan aki.

Di esaki, el a sigura cu ta logico cu lo ta Cuerpo Policial di Aruba e organisacion indica; pero Tjon a sigura cu na otro paisnan na exterior no ta polis esun encarga cu esaki, sino otro organisacion of fundacionnan cu tin autoridad y cu ta mara na diferente regla.

 

LEAVE A REPLY

Please enter your comment!
Please enter your name here