Ministerio di Defensa Hulandes ta duna mas claridad tocante facilidad di cuminda na Marinierskazerne Savaneta

Ministerio di Defensa Hulandes a duna mas claridad tocante e problema cu facilidadnan pa prepara y sirbi cuminda na Marinierskazerne Savaneta, despues cu e asunto a yega Parlamento Hulandes. Segun e contestanan oficial di Secretario di Estado di Defensa, Derk Boswijk, e restaurant permanente na Marinierskazerne ainda mester pasa pa renobacion y ta proyecta cu e facilidad lo ta cla pa januari 2028. Mientras tanto, Ministerio di Defensa a implementa diferente medida pa controla riesgo relaciona cu higiena y seguridad alimentario den e facilidad temporal.

E documenta, cu Tweede Kamer a ricibi dia 23 di september, ta contesta e preguntanan cu parlamentario Maikel Boon a presenta tocante e condicionnan na Marinierskazerne. E preguntanan tabata relaciona, entre otro, cu informacion tocante schimmel, plaga y riesgo pa seguridad alimentario den e facilidad temporal na Savaneta.

E asunto a yega Tweede Kamer despues di un investigacion di Follow the Money. E investigacion periodistico tabata basa, entre otro, riba documentonan interno, rapportnan di inspeccion y informacion di empleadonan. E publicacion a pone atencion riba condicionnan di trabao y higiene den e facilidadnan uza pa prepara y consumi cuminda na Marinierskazerne.

Den su contesta na Parlamento, Ministerio di Defensa ta duna mas claridad tocante e problema y ta detaya e desaroyonan cu a conduci na e situacion actual.

E restaurant original na kazerne a cera na 2022 pa por ehecuta trabaonan di renobacion. Intencion tabata pa durante e periodo di renobacion uza e facilidad pa suboficialnan como localidad temporal. Sinembargo, preparacion di e proyecto a tarda mas cu loke inicialmente contempla. Ministerio di Defensa ta atribui esaki na complehidad di e renobacion y problema di capacidad den e cadena encarga cu propiedadnan di e organisacion.

Como consecuencia, na februari 2025 a entrega un facilidad temporal cu ta conoci como Dining Facility. Pero despues a constata diferente defecto den e facilidad. Esaki a causa cu e Dining Facility mester a cera varios biaha pa por atende e problemanan. Durante e periodonan di ciere, preparacion y consumo di cuminda a bolbe tuma lugar den e facilidad di suboficialnan.

Segun e informacion mas reciente di Ministerio di Defensa, e ultimo trabaonan na e Dining Facility a ser ehecuta y personal presente na e kazerne ta uzando e facilidad atrobe. Alabes, ta preparando un opcion adicional pa evita cu un problema nobo lo laga personal sin un facilidad adecuado pa cuminda. Ministerio di Defensa ta preparando pa por uza un servicio di catering local como alternativa si e facilidad temporal bolbe presenta problema.

Un di e preguntanan principal di Parlamento tabata dicon te na juni 2026 Ministerio di Defensa y Rijksvastgoedbedrijf a pone presupuesto adicional pa e restaurant permanente, mientras cu e preocupacion tocante e facilidadnan tabata conoci for di mas prome.

Ministerio di Defensa ta splica cu e presupuesto cu originalmente a ser poni disponibel pa renobacion a resulta insuficiente. P’esey, na juni a pone e fondo adicional cu Rijksvastgoedbedrijf tabatin mester pa sigui cu e proyecto. E proceso di destaho pa e trabaonan a cuminsa y ta uzando un procedura mas cortico. Planificacion actual ta pa asigna e contrato den e di cuater kwartaal di 2026. Entrega di e restaurant renoba ta programa pa januari 2028.

Esaki ta nifica cu, si e planificacion actual keda manera e ta, personal na Marinierskazerne Savaneta lo mester sigui depende di solucionnan temporal durante mas cu un aña ainda.

Ministerio di Defensa, a duna tambe mas informacion tocante medidanan implementa despues di un rapport di seguridad alimentario di 2025. E organisacion a opta pa intervencionnan cu por tin efecto riba termino cortico, mientras cu ta warda riba e solucion permanente.

Entre e cambionan haci tin instalacion di un sistema di friamento Oxycom y un tent adicional paden di e facilidad. E meta ta pa tene temperatura den e espacio dentro di e limitacionnan estableci y haci temperatura mas abao y constante. Airconan ta ser haci limpi cada dos siman pa un compania externo y ta ricibi mantencion periodico pa preveni formacion di schimmel. Ademas, un biaha pa luna e Dining Facility ta cera pa un limpieza profundo di e cushina.

Dia 5 di maart 2026 a tene un autocontrol di seguridad alimentario segun e Instructie Voedselveiligheid Defensie. Segun e resultado comunica na Parlamento, e personal tabata traha di manera corecto y tabata cumpli cu e instruccionnan relevante pa trabao sigur cu cuminda.

Ministerio di Defensa ta indica cu e puntonan critico relaciona cu seguridad alimentario y higiena ta ser monitorea structuralmente y controla mediante medidanan organisatorio. Sinembargo, e ministerio mes ta reconoce cu esaki no ta kita e necesidad di un solucion permanente. P’esey renobacion di e cushina permanente ta keda un prioridad.

E opcion di uza un caterer local ta forma parti di e sistema adicional cu Ministerio di Defensa kier pone na disposicion. Un proceso di destaho pa esaki ta andando. E intencion ta cu, si un problema nobo presenta den Dining Facility, por cambia pa catering sin cu suministro di cuminda na personal na Savaneta ta ser interumpi.

E contestanan ta importante tambe pasobra nan ta mustra cu e problema di facilidadnan pa cuminda no ta limita exclusivamente na Aruba. Boon a puntra si tin otro localidadnan di Defensa cu no ta cumpli completamente cu exigencianan relaciona cu seguridad, higiena of condicionnan laboral.

Ministerio di Defensa ta confirma cu su servicio interno di condicionnan laboral a constata cu varios localidad no ta cumpli completamente cu exigencianan di seguridad alimentario. Ministerio no ta duna un lista completo di tur e localidadnan afecta, pero ta menciona diferente proyecto cu ta andando na Hulanda.

Ministerio di Defensa tin un programa pa varios aña cu ta cubri tur su localidadnan cu facilidad pa cuminda. Meta di e programa ta pa e instalacionnan cumpli cu legislacion actual y den futuro, como tambe cu exigencianan relaciona cu higiena y seguridad alimentario.

E informacion nobo ta agrega un dimension mas amplio na e asunto cu inicialmente a concentra riba condicionnan na Savaneta. Mientras cu e caso di Aruba a genera e preguntanan parlamentario, e contestanan oficial ta confirma cu servicio interno di Ministerio di Defensa a identifica falta na mas localidad.

E contestanan di Ministerio di Defensa ta laga algun aspecto financiero di e proyecto sin detaye. E documento no ta menciona cuanto e presupuesto original tabata, cuanto placa adicional a ser poni disponibel na juni 2026, ni cuanto e renobacion completo na Marinierskazerne Savaneta lo costa.

Mientras e proyecto permanente ta avansa, atencion ta keda riba funcionamento di e Dining Facility. Segun Ministerio di Defensa, e puntonan relaciona cu higiena y seguridad alimentario ta ser monitorea, mientras cu un servicio di catering local ta ser prepara como alternativa pa caso cu presenta dificultad nobo.

E caso di Savaneta tampoco ta un situacion isola dentro di Ministerio di Defensa. Su servicio interno di condicionnan laboral a constata cu tin mas localidad cu no ta cumpli completamente cu exigencianan di seguridad alimentario. Pa atende esaki, diferente intervencion ta andando na localidadnan militar na Hulanda y tin un programa pa varios aña pa adapta facilidadnan di cuminda na e normanan vigente y den futuro.

Pa Marinierskazerne Savaneta, e siguiente fase importante lo ta otorgamento di e contrato pa renobacion, programa pa di cuater kwartaal di 2026. Despues di varios aña dependiendo di facilidadnan temporal, Ministerio di Defensa ta proyecta cu e facilidad permanente lo ta cla na januari 2028.