Cual solidaridad tin prioridad?

Ora autoridad mester actua?

E siman aki dos caso den corte ta acapara nos atencion. Uno ta trata di e mucha muhe cu a perde su bida den un accidente di trafico, e otro di e dos muchanan cu a bira victima di abuso y violencia domestico. Ocasion cu ta lanta hopi emocion, sin duda, y cu ta rebiba e periodo amargo pa e famianan, loke ta nada facil pa nan. Mientras nos ta comparti e dolor ey, nos tin e obligacion di analisa e maneho di e casonan y detecta francamente e aspectonan cu a bay bon, y lamentablemente tambe esunnan menos bon. Cu enfasis riba cosnan cu no a bay bon, pasobra tin ora ta existi un tipo di solidaridad kiboca, cu ta basa riba e pensamento cu consideracion cu un funcionario colega tin prioridad riba interes di otro ciudadano. Tur esaki cu bista riba futuro, pasobra e criaturanan cu a laga e mundo aki prematuramente, no ta bolbe, ni kico nos haci o desea, pero nos mester limita e posibilidadnan cu e casonan aki ta haya ripiticion. Cu esey tur hende ta di acuerdo, pero con ta garantisa esaki mas tanto posibel?

Prome e caso di e accidente di trafico. For di prome momento cu e accidente a sucede, a cuminsa, manera e caso den corte ta mustra atrobe, un serie di eror y falta di cumplimento cu obligacion di trabao (plichtsverzuim) di banda di funcionarionan envolvi, creando e imagen cu, pasobra tabata trata di un colega policial envolvi den e suceso, lo mester a ‘lubida’ kico e proceso standard ta, cu cual mester a cumpli. Cu esaki no solamente a tranca e proceso normal di investigacion, pero el a hiba na e conclusion di e autoridadnan hudicial cu nan no por haci nada cu e resultadonan y por lo tanto no por persigui e agente envolvi . Ningun momento den esaki esnan cu mester a actua no por a imagina nan mes kico esaki a causa cerca e famia? Solidaridad cu un colega cu a haci malo, y no un cos chikito, sino cu ta trata di un delito pisa (core burachi), ta bay prome cu husticia pa e ciudadano?

Di unda a sali e aparente mentalidad aki den cuerpo policial, cu esnan cu ta bebe di mas na club di polis ta esnan cu por conta riba proteccion di e cuerpo? Y como agravante mester menciona cu den henter e proceso aki no por a tende nada di algun accion corectivo di e mando policial, cu mester a actua, sikiera silenciosamente, pa coregi e situacion aki. Y nos no mester tende ningun disculpa aki, pasobra ta e dirigencia di e cuerpo ta esnan yama pa defende e moral corecto den e cuerpo pa cual nan ta responsabel. Y nos no kier laga ningun duda cu nos no tin comprension pa e solidaridad, e hermandad cu mester tin, te cierto altura, entre agente policial den ehecucion di nan trabao. Ta berdad cu nan, tur dia di aña, mester subi caya y expone nan bida na peligro conoci o desconoci, unda nan mester por conta ciegamente riba nan colega. Pero esey ta remotamente aleha di un caso di violacion flagrante di ley, unda e peligro pa bida di otro hende tabata bin hustamente di e agente policial envolvi.

Den e caso di e dos criaturanan cu a muri na man di esnan cu tabata e prome yama pa cuida nan y duna nan tur e cariño y proteccion cu nan mester, ta trata di otro tipo di fayo. Aki por constata cu no tabatin un vangnet cu ta cera completamente, y e dos victimanan aki a pasa den e bashinan di e sistema di vigilancia. Tabatin señal di peligro, pero nan no a resona unda esey mester a sucede. Naturalmente aki loke por haci ta analisa y mehora pa futuro. Mas cu cualkier otro comentario, nos por a scucha e suspiro ‘pa e cos aki no pasa nunca mas’ y nos ta completamente di acuerdo. Pero pa garantisa cu esaki no lo sucede tampoco, e miho coordinacion entre entidadnan concerni mester bira realidad tambe. Nos sa cu tabatin extenso deliberacion riba e asunto aki y cu di banda di gobierno a pone e recursonan disponibel pa logra e meta aki.

Sin embargo, fuera di e rumornan di empleo masal di hende di banda di e ministerio encarga cu asunto social y labor, no a tende tanto noticia di accion practico den atencion di e asunto aki. Ta spera cu den e empleo di funcionario nobo a pone enfasis riba profesional Arubano, cu sa kico nan ta haci. Unda nos preocupacion ta keda ta si e ciudadano comun y coriente ta miho informa y den caso di topa cu suceso di posibel abuso, lo sa miho unda pa acudi. Y ora nan haci esey, si nan por conta cu e colaboracion optimal di tur instancia, hasta si ta trata di conoci, amigo o famia di e funcionario, o di un colega di e mesun of otro instancia. Esey ta e momento pa mustra berdadero integridad pa laga e interes di e ciudadano prevalece. Nos por percura pa e no pasa nunca mas, pero mester proba cu di berdad algo a cambia.

You May Also Like

Ken ta controla kico y con?

Ken ta controla kico y con, unda, ki tempo? Un pregunta clave cu ta ...

Kico mester ta nos maneho di refugiado?

Den nos edicion di ayera un di nos editornan a bay riba e tema ...

Bureau leerplicht no tin database…

Ta con nan ta traha anto? Segun un articulo den nos propio corant di ...

Mas espacio pa bicicleta?

Diadomingo pasa Aruba completo a haya un ‘wake up call’ fuerte, cu un accidente ...

A perfect storm…

Den un glas di awa Gran parti di e comunidad a keda sorprendi ayera ...

Venezuela tin influencia riba eleccion na Aruba?

Cada dia cu pasa nos bisiñanan na Venezuela ta mas cerca di e collapse ...