Famia, entre otro e wela, di e muchanan Rishandroh y Eugene mata, mester a bringa literalmente pa drenta sala di corte pa por atende e tratamento di e caso awe. Un espectaculo di berguensa pa mira y otro ehempel di mal organisacion di corte Aruba.
Un poco prome di esaki, ya periodista di Bon Dia Aruba mes a ricibi un tratamento di falta respet pa e trabou di prensa. Locual tampoco ta prome biaha. Causa principal ta, cu ta laga e asunto di publico y prensa den man di CEA. Nada contra e cuerpo aki y sigur nan mester haci nan trabou pa siguridad. Sinembargo no por trata publico como presonan y pa motibo di esey tambe ta importe cu corte di Aruba tin personanan den servicio cu ta miho den e trabou aki. Cu sa con pa maneha ora tin casonan grandi cu obvio por spera multitud di hende y tambe claro un persona califica con pa deal cu prensa.
Pero kico ta pasa hopi biaha den corte. Prome: ta trata hende a base di preferencia. Pues si bo ta atende corte frecuentemente, tin otro reglanan ta conta cu ora bo no ta mustra cara asina hopi. Sigur abogadonan, ambtenaarnan di instancianan manera Ministerio Publico y Voogdijraad ta haya preferencia. Esey no ta algo malo, pero manera awe unda famia directo no por sinti den sala pasobra tin 8 ambtenaar si a wordo admiti, hasta studiantenan di unversidad a haya un spot, esunnan aki tambe mester realisa ken ta importante den secuencia.
E situacion a sali for di man y a mustra tambe cu CEA mes, no tabata capabel pa haci algo. Ya adelanta e señalnan cu e situacion por explota, manera menciona, tabata mustra. Pero en bes di busca ayudo sea traha un plan urgentemente, a keda core, ariba y abou e trapi di sala di corte. Despues di mey ora di tardansa e hues mes mester a actua. Y den un rato di 5 minuut el a logra. Unda e tambe a menciona e importancia di presencia di prensa.
Mester menciona cu niun caminda por haya e hues nombra special pa atende cu prensa (persrechter). E periodista di Bon Dia a buske activamente, puntra ayudo di coleganan di corte pero nada. Den casonan asina grandi cortenan normalmente ta laga prensa registra prome. Esaki tambe ta esencial como cu tin hopi cu ta yama nan mes periodista, pero nan no ta. Por ehempel siman pasa den caso grandi di asesinato di Helmin Wiels na Corsou, corte ta pidi prensa mas cu 1 siman adelante pa registra. Y asina por controla e fluho.
Awetardi corte a manda un relato unda ta pidi disculpa cu e situacion a sali for di man. Dunando e motibo cu tabatin mucho interesado y asina resulta cu no tabatin suficiente asiento pa e famia por atende e caso. Nan ta bista tambe cu nan tin e tarea pa vigila e siguridad di tur hende den e edifico. “Esaki tin biaha ta rekeri di haci escogencianan fastioso.” Nan ta priminti pa evalua e incidente y tambe lo mira posibilidad pa uza otro salanan unda por sigui via video.
Bon Dia Aruba a entrega un keho y tambe a puntra corte di Aruba dicon no ta sigui e mesun maneho cu Corte Comun tin na Corsou. Corte di Aruba ta cay bou Corte Comun y asina no mester inventa e wiel di nobo. Nos ta keda pendiente riba tambe e keho aki. Unda a expresa cu prensa den un democracia tambe ta hunga un rol importante. Igual cu e poder hudicial.
