image.jpeg

 Director di Banco di Seguro Social (SVb), sr. Edwin Jacobs a splica cu tur edad di pensioen ta posibel pero e ta condiciona pa e gasto cu comunidad ta dispuesto di carga. 

Pa determina esaki un evaluacion mester wordo haci, ya cu varios factor ta hunga un rol. Sinembargo e autoridadnan competente kiermen e autornan politico, gremial y sindical ta esunnan cu tin cu determina kico ta e prijs cu nan ta dispuesto pa carga pa mantene un sistema di pension na edad cunan ta desea.  

Entrada y tipo di sistema  

Pero di otro banda –segun director di SVb-  si nos ta wak fei di gastonan di comunidad, mester tene cuenta cu no ta solamente e sistema di AOV nan tin su gasto, pero e sistema di pensionnan priva tambe. 

Un caso hopi importante ta kico ta bira e prijs cu mester wordo paga pa e sistema di pension di gobierno, aunke e sistema aki ta traha di otro manera cu esun di AOV di behes. Pero tin otro tipo di pension cu ta esun di trabou of pension ocupacional.

Sr. Jacobs  a splica cu awendia tin dos forma cu e sistema di trabou aki ta funciona: E prome ta un sistema caminda e beneficio ta defini. Esaki ta e prome sistema di pension cu a wordo desaroya den añanan 50 y 60. E prome sistema no tabata sostenibel pa motibo cu nan tabata describi e beneficio pa ehempel: Bo beneficio ora cu no ta yega edad di pensioen ta cu bo ta haya tanto porcentahe di bo ultimo añanan di salario. Tambe ya sea un promedio a base di nan bida laboral. 

E di dos sistema di pension cu a wordo implementa den añanan 80, 90 y ultimo añanan. Chile ta un pais cu a wordo promovi hopi riba e sistema aki cu ta esun cu e “contribucion ta defini”. Esaki kiermen cu e beneficio pa e pensionado ta wordo determina a base di fluctuacionnan  y riesgonan den inversion, etc… 

Na Aruba a wordo introduci tambe como “Pensioen General” na 2011 cu ta a base di contribucion defini.  Ta asina cu trahado y doño di trabou ta pone den e fondo aki un 6% y ora bo edad di pensioen yega ta wordo determina cuanto bo ta bay haya. 

“Loke no ta bay haya ta bay determina pa e cantidad di añanan cu bo ta contribui. Por lo general mas halto edad di pensioen ta, bo ta contribui mas y por lo tanto bo tin chens di haya un tiki mas. Mas abou edad di pensioen ta, bo ta contribui menos”, el a bisa. Sr. Jacobs a base di su experticio a indica cu den e caso aki e efecto no ta bay ta hopi dor di cu e ultimo añanan esunnan cu ta bay conta pa e pensioen.  

Bayendo riba e sistema di beneficio defini, el a laga sa cu edad si tin un efecto grandi, pasobra bo ta papiando di pension cu ta wordo defini, ya caba hopi tempran ora cu bo ta cuminsa den e sistema.

E riesgonan  

Pero den e sistema aki –segun sr. Jacobs- e riesgo  pa e sistema ta sostenibel y e ta wordo carga dor di e doño di trabou. Mientras cu den e sistema di contribucion defini e riesgo ta wordo carga dor di e trahado.  Locual ta nifica cu si e pension ta bay sali menos di locual bo spera ta, e trahado su problema cun’e. 

Mientras cu e skema di pension di contribucion di beneficio defini,  pa cambionan di edad, prima, etc… si e beneficio calcula ta sali menos, ta e doño di trabou tin cu carga e riesgo ey. Den e caso aki hopi biaha tin cu aumenta prima of e tin cu haci un contribucion di un solo biaha pa cubri e cobertura di e pension. 

Den nos sistema pa motibo cu nos tin e sistema di empleado publico, e gasto publico a bira e prijs pa comunidad. Ta locual ta wordo yama na final di dia, un efecto cu edad tin riba sistema di pension.  Cualkier reduccion ta nifica cu bo gastonan ta bay aumenta, pasobra mas hende na edad tempran ta bay. Pa garantisa e sostenibilidad di e fondo, tin cu adapta eentrada di e fondo; y esey ta bira e prijs di e prima na e momento ey, segun sr. Jacobs.

 

LEAVE A REPLY

Please enter your comment!
Please enter your name here