E aña aki fundacion Rancho lo bin cu otro version di Tempo pa Click”. E proyecto aki di inclusion social a haci un gran furor na 2015, ya cu a envolvi den un actividad sano y creativo hooi muchanan, hobennan y adultonan di e bario di Rancho.
Presidente di fundacion Rancho, sr. Clifford Rosa a bisa cu “Tempo pa Click” ta un iniciativa di un stagiaire di Universidad di Aruba, caminda e institucion universitario aki a carga e proyecto aki fei di un comienso caba.
Sosten
“Awor nos por ta contento y orguyoso di wak mas otro organisacionnan tambe pa pone nan mes disponibel…”, el a bisa. E tipo di sosten aki ta yuda pa e proyecto Tempo pa Click por sigui crece y haya su desaroyo manera fundacion Rancho ta desea.
Tambe e fundacion a yega di haya bishita di otro universidadnan tanto di Hulanda como di Merca, y nan ta interesa di duna nan ayudo den e aspecto social pa asina e proyecto “Tempo Pa Click” crece. E institutonan internacional aki ta planificando con pa yuda sostene e bunita proyecto aki pa e sigui desaroya, segun sr. Rosa.
Telefon pa Hubentud
Sr. Rosa a anuncia e introduccion di fundacion Telefon pa Hubentud (133) cu ta un partner nobo pa cu e proyecto menciona. “E proyecto aki tin hopi aspecto cu tin di haber cu e parti social. No solamente ta e fotografia cu nan ta bay pasando den dje, pero e parti social cu bo ta mira y bo ta haya den e bario”, segun presidente di fundacion Rancho.
Sr. Rosa den presencia di representante di TpH , sra. ShamilaBulos a gradici e apoyo cu fundacion Rancho ta hayando fei di nan pa cu e proyecto aki. Sra. Bulos a bisa cu nan rol den e proyecto aki ta pa duna e sosten social na e muchanan y e hobennan cu ta bay participa den “Tempo pa Click”.
Nan rol tambe ta bay ta pa coach e hobennan cu ta bay ta trahando cu e muchanan. Tambe nan ta bay yuda e hobennan interpreta nan potretnan y e sentimentonan cu e potret por trece dilanti. TpH ta bay yuda tur tres grupo participante,pero principalmente nan atencion ta bay pa e grupo di muchanan y e adolescentenan entre 8 pa 18 aña. Considerando cu esaki ta un proyecto cu fundacion Rancho a pone den otro, tur solicitud mester drenta cerca e fundacion aki.
Mientras cu sr. Rosa a bisa cu den transcurso di e simannan nos dilanti nos ta bay wak nan contribucion den e preparacion di Tempo pa Click pa ora cu dia 11 di juli yega e proyecto aki lo por start.
Tur cos ta cla y tur material informativo y di promocion ta cla pa fei di e siman aki pa e proyecto Tempo pa Click 2016 por bira otro proyecto cu tin di haber cu mehoracion di e bario di Rancho.
