(AFP) – Presidente Cubano, Miguel Diaz-Canel a bisa diahuebs cu su pais ta “cla” pa un posible atake di Merca contra e isla comunista despues di lunas di presion di presidente Donald Trump.
“Nos no kier e (confrontacion) ey, pero e ta nos deber pa ta cla pa evit’e, y si e tabata inevitable, pa gana,” Diaz-Canela bisa na e miles di persona atendiendo un rally na La Habana pa marca e di 65 aniversario di e invasion Mericano fracasa na Bahia de los Cerdos.
Cuba ta preparando pa un posible atake despues di advertencianan ripiti di Trump cu Cuba ta “proximo” despues cu el a baha lider Venezolano, Nicolas Maduro y a bay guera contra Iran.
Washington y La Habana a tene combersacion tocante desescalacion di tension pero e discusion entre e archi-enemigonan no a resulta den ningun logro significante, segun medionan Mericano ta reporta.
Mariela Castro, yiu muher di fayecido presidente Raul Castro, a bisa cu Cubanonan “kier dialogo” cu Washington pero “sin pone nos sistema politico den debate.”
El a bisa cu su tata di 94 aña di edad – kende a supervisa e acercamento cu Merca na 2015 bao presidente Barack Obama, cual despues Trump a reverti – tabata involucra indirectamente den e combersacionnan.
Nieto di Raul, Raul Rodriguez Castro, un coronel, segun reportahenan ta entre e negociadornan.
Diaz-Canel a admiti cu e momento actual ta “hopi grave” pero a insisti riba e naturalesa “socialista” di Cuba, manera proclama pa Fidel Castro dia 16 di april 1961.
E invasion di Bahia de los Cerdos na 1961 a ser lansa dos aña despues cu e revolucionarionan di Castro a tuma control di e isla y a cuminsa nacionalisa propiedad y negoshi di doñonan Mericano.
Entre 15 y 19 di april, alrededor di 1.400 Cubano anti-Castro exilia na Miami, cu training y financiamento di CIA, a subi tera na Bahia de los Cerdos, como 250 kilometer sur di La Habana.
Forsanan Cubano a repele e invasornan, dunando un derota humiliante na e Mericanonan.
Seis decada despues, Washington atrobe tin Cuba den su mira.
Despues di captura di Maduro na Caracas, Trump a impone un blokeo di petroleo riba Cuba, empeorando e pio crisis economico y di energia na e isla den decadas.
Diaz-Canel a rechasa e manera con e ta bisa Merca ta tacha Cuba di ta un “estado fracasa.”
La Habana en gran parti ta culpa su problemanan riba un embargo Mericano riba comercio imponi tiki despues di yegada di Castro na poder, cual ainda ta na vigor awendia, y e blokeo mas reciente riba petroleo.
“Cuba no ta un estado fracasa, e ta un estado bao asedio,” el a bisa.
