Diamars anochi Dakota ta logra bira e segundo finalista despues di a gana Bubali cu e score di 4 – 2 pa medio di penalty y asina enfrenta RCA diasabra awor den e final di Copa Betico 2020. Esaki ta conoci como “E Clasico di Aruba” a bira e gran final di Copa Betico Croes 2020, RCA vs Dakota.

Prome tempo.
Mester bisa cu Dakota a sali brabo uzando nan liheresa uzando e velocidad di aleronan Randal y Joshua Gross cu constantemente a hinca e linea di defensa di Bubali den problema. Na di 5 minuut De Sousa por poco ta habri marcado pa Dakota pero su bala ta dal den e palo di gol. Portero Maduro ta sali pero den bashi y aki e bala ta keda lora y dal den palo. Despues di e oportunidad Bubali a tuma e iniciativa y ataca e gol di Dakota defendi pa De Kort den bon forma cu algun chens chikito di gol.

Na di 15 minuut tanto Dakota y Bubali ta hera habri e marcado, prome delantero De Sousa di Dakota ta dal e bala den e portero Maduro cu a sali tapa bon pa despues den contra atake e alero Pieters di Bubali los un misil diagonal cu ta pasa net na banda di gol di Joscar de Kort.

Mester bisa si cu e wega tabata den un tempo halto pero algun biaha e pasonan no ta yega nan destino y esaki a stroba mayoria hugada avansa den bon forma. E hoben Silva, Pieters y Tromp di Bubali tabata bon padilanti y sigur a crea varios biaha peliger pa e defensa di Dakota. Na di 32 minuut Dakota ta haya un bon chens ora cu Gross ta bay laga y duna De Sousa un bala bon pero esaki tabata mucho duro y ta pasa bay dilanti gol. Sinembargo dos minuut despues Dakota ta anota e 1 – 0 ora cu portero Maduro ta saca malo y aki e bolante ofensivo Daniel Briceño no ta pordona y ta avansa cu e bala y cu un bon tiro e ta habri e marcado pa e abehanan.

Dos tempo.
Den e prome dies minuut di e di dos tempo, Dakota a sali pone presion y purba amplia e marcado pero no tabata tin precision pa yega na e gol. Despues di esaki Bubali a drenta e wega pero no a crea mucho peliger pa portero De Kort. E wega a bira poco flauw unda ambos ekipo a haci varios cambio pa e wega haya su ritmo bek caminda tur dos tabata busca e manera pa domina pero sin mucho exito.

Na di 73 minuut, e defensor di Bubali, Mark Jacobs ta domina un crus’e tremendo cu su pecho y aki e ta bati portero De Kort cu un bala deposita canti pia pa e 1 – 1. Den e ultimo 10 minuut e wega a bira super emocionante cu Bubali buscando e gol di bay ariba lansando varios atake y un Dakota cu a defende cu alma y cuerpo. Dakota a loer riba e counter cu De Sousa, Bruno y Shemar super peligroso dilanti. Den minuut 90, Bubali por poco ta anota e gol di victoria pero e tiro di Silva ta pasa raspa e palo di gol. Despues tabata Litmar Lacle di Bubali cu tambe por a finalisa e wega na fabor di Bubali pero portero Joscar de Kort ta para esaki den dos ocasion. Lamentablemente carchi cora ta cay pa Nickenson Paul y asina debilita Dakota un poco. E wega ta empata unda a bay over na tironan di penal.

Den e tironan di penal Joscar de Kort tabata grandi unda e ta para un penalty na bon momento y duna su ekipo e siguransa pa clasifica. Dakota no ta faya mas y ta gana cu e score di 4 – 2 y lo disputa un otro final di Copa Betico mirando cu aña pasa Dakota a hunga pe final.

LEAVE A REPLY

Please enter your comment!
Please enter your name here