Parlamentario den fraccion di MEP Daphne Lejuez

E proposicion di ley pa e Ombudsman manera cu e ta formula awor aki, no ta brinda e Institucion e siguransa di total independencia cu e mester. Esaki pa por bringa e interes di e ciudadano contra decisionnan di Gobierno.

Motibo ta cu aunke cu e proposicion di ley manera a keda presenta na Parlamento ta rekeri cu nombramento di e Ombudsman mester tin aprobacion di dos tercera parti di Parlamento, pero si kier retira e funcionario halto aki, un simpel mayoria mes ta suficiente.

Esaki ta motibo tambe pakico Parlamentario Independiente Daphne Lejuez a manda un carta cu caracter di urgencia pa Presidente di Comision Special Ombudsman Ady Thijsen y tur otro miembro di e comision aki, riba e proceso di e ley. Esaki den cuadro di e intencion cu pronto kier trata e ley. Si no cambia e exigencia di retiro manera te hasta Constitucion di Aruba ta exigi, anto e posicion ta bira uno cu ta djis un formalidad, pero cu ta keda bou presion politico, y mas bien ta bira djis otro organo sin un poder real pa actua.

E proceso a inicia robes caba na momento cu a introduci e Ley di Ombudsman na 2015. Ta trata di un institucion halto cu mester keda inclui den Constitucion di Aruba. Ta pa tal motibo mes e ley no por a sigui su rumbo na 2015. Pasobra hasta si a pasa e ley na 2015, y despues na 2019, sin e cambio den Constitucion, e lo no tabatin su validez. Awor kier pasa dos ley, tanto e cambio den Constitucion y e Ley di Ombudsman den un solo biaha.

Sinembargo, Parlamentario Lejuez ta preocupa locual e ta haya cu falta den e ley di Ombudsman y e hecho cu a pesar cu e ta basa riba e ley Hulandes di Ombudsman, toch tin un diferencia clave, cu ta e rekisito hopi abou pa por retira un persona asina, cu su trabou constitucional ta pa actua contra maneho di Gobierno si esaki ta considera inhusto pa un ciudadano.

Raad van Advies

Den su carta pa e Comision Special pa Ombudsman (BCO), Parlamentario Independiente Daphne Lejuez a splica cu a inicia e discusion riba e ley dia 20 di November 2019. Pero basa riba peticion di varios Parlamentario, y cu sosten di e iniciadonan di e ley, a dicidi pa bolbe manda esaki pa Raad van Advies, mirando e diferente cambionan cu a keda introduci despues cu e propio organo mes a duna su consehonan riba 14 di September 2015. Pa e motibo aki a haya prudente pa laga e Organo Consultativo bolbe tira un bista riba e ley.

E proyecto a bolbe di Raad van Advies dia 26 di Februari 2020 y a manda esaki pa DWJZ pa e finalisa e proceso di e proyecto di ley.

Por trece cambio

Segun Lejuez, articulo 5, inciso 2 di e Constitucion di Aruba ta bisa cu tanten cu Parlamento no a dicidi pa presentacion di un proyecto di ley (ontwerplandsverordening), un of mas miembro, sea ta esnan cu a inicia e ley mes of riba sugerencia di otro, por trece cambio. “Ta trata aki di e proyecto di cambio di e ley di iniciativa y e cambio di e Memorie van Toelichting,” Lejuez a splica den su carta.

A base di locual Constitucion di Aruba mes ta bisa, Lejuez ta di opinion cu, mester conclui e reunion cu a cuminsa dia 20 di November 2019, cu riba e agenda, ta un contenido di cambio di ley di iniciativa y su Memorie van Toelichting manera cu a keda adapta.

Tambe Daphne Lejuez ta pidi mr. Thijsen pa pone un termino pa por manda preguntanan por escrito riba e conseho, e rapport di DWJZ, e proposicion di ley y su Memorie van Toelichting.

E Parlamentario independiente kier pa yama un reunion di e Comision Special Ombudsman, pa contesta pregunta of formula nota di cambio si esaki ta necesario den conhunto cu DWJZ. Esaki ta duna espacio tambe pa den e secuencia corecto trata e proyecto di ley pa cambio di e Constitucion di Aruba y aproba esaki, cu e ahustacionnan necesario pa agrega un Institucion di Ombudsman ,prome cu trata e proposicion di Ombudsman mes. Ya cu e proyecto di ley pa cambio di Constitucion ta den proceso caba, e lo no mester nifica un posponemento largo di forma cu por haci preguntanan por escrito dia 14 di September, pa asina por sigui cu e tratamento y realisa e proposicionnan di ley di iniciativa den termino corto.

Preguntanan

Parlamentario Daphne Lejuez a informa presidente di e Comision Special Ombudsman cu el a keda cu algun inkietud. “Den e proyecto di ley no ta menciona explicitamente con e nombramento, ni e suspension ni e retiro di e Ombudsman mester sosode.” Segun Lejuez, tur tres e procesonan aki, mester sosode caba biaha cu por lo menos cu sosten di dos tercera parti di e miembronan di Parlamento presente na e reunion pa tuma decision. Esaki bou entendimento, cu prome cu bay pa sea nombramento, suspension of retiro di e Ombudsman, ta consulta cada biaha cu Raad van Advies.

Den e Memorie van Toelichting mester menciona specificamente cu e procesonan aki ta rekeri di e dos tercera parti di e aprobacion di miembronan di Parlamento. “Esey no ta e caso awor aki. Es mas, den Memorie van Toelichting apenas ta papia di e nombramento. Den e proyecto di ley no ta menciona nada cu tin di haber na e criterio pa por lo menos dos tercera parti di e aprobacion di e miembronan di Parlamento pa loke ta e nombramento, suspension of retiro, mientras cu esaki ta crucial,” den opinion di Lejuez. “Ta papia aki di un instancia di nivel halto di Estado y como tal no por tin duda riba e criterionan di e leynan aki.”

Concordancia den Reino y confianza

Como tal, Lejuez ta pidi mr. Thijsen y e comision, pa inclui criterionan aki, particularmente e exigencia di dos tercera parti di sosten di Parlamento pa nombramento, suspension y retiro di e Ombudsman den tanto e Ley como Memorie van Toelichting.

Tambe Daphne Lejuez ta puntra pakico DWJZ a scoge pa e procedura di Nader Rapport en bes di e Principio di ‘Conform or Reply’ manera ta indica den e conseho di Raad van Advies.

Nader Rapport ta un procedura unda e Minister ta manda e nomber na Gobernador, a base di e conseho di Raad van Advies, relaciona cu un proposicion di ley. Den e Nader Rapport, e Minister ta motiva con e ta anda cu e conseho di Raad van Advies.

Pero den e caso aki di e ley di Ombudsman, Raad van Advies ta sugeri e principio di Conform or Explain basa riba un discurso di Presidente di Corte Comun dia 15 di Februari 2020, unda a bisa cu “pa e poder legislativo, e ta importante pa por evalua hopi critico na momento di crea ley, pa mira si nan ta cuadra cu tratadonan. E legislado pues mester ta extra atento pa no laga asuntonan un banda, cu despues ta un hues mester agrega. Y si despues e legislado no ta gusta con e hues ta interpreta e ley, e por ahusta e ley.

Presidente di Corte Supremo a sugeri Parlamento di Aruba pa uza e principio di Conform or Explain ora di traha ley. E acercamento aki ta nifica cu ora di splica e ley, pues den e Memorie van Toelichting ta pone un paragraf standard unda ta dedica atencion na areglonan cu tin riba e otro paisnan den Reino riba e mesun tema. Si e areglo ta diferencia di otronan, e por keda motiva den e Memorie van Toelichting pakico a scoge algo diferente. Asina ki ta evita cu ta crea diferencianan indesea den leynan, y ta pone cu hues cu no mester para cada biaha riba e pregunta si e desviacion ta uno hustifica of no. E principio aki ta yuda mehora areglonan legal cu ta concorda cu otro.

Den otro palabra, e ta nifica cu Parlamento di Aruba mester percura cu leynan cu ta aproba tin un cierto uniformidad cu esnan den e otro paisnan den Reino. Sin esey, lo mester splica di con no a scoge pa e uniformidad aki pa e ta hopi cla pa hues, pasobra di otro forma, e lo por duna su mesun interpretacion na e ley. Lejuez ta enfatisa e importancia di concordancia den legislacion denter di Reino unda cu por, pa motibo cu asina ta evita e posibilidad di interpretacion robes. “Mester evita cu tin diferencianan den ley, sin cu esaki berdad no ta e intencion.” Di e forma aki ta crea un confianza den e institucion, si mira cu ta maneh’e den tur e paisnan den Reino den forma similar.

Interes comunidad

Tambe Lejuez ta puntra si e Ombudsman Arubiano, mescos cu esun di Hulanda tin acceso pa sigui procede na Corte Europeo pa Derechonan Hulanda y si e tin acceso legal na e Colegio di Derechonan Humano na Hulanda.

“Mi kier mustra tur miembro di e Comision Special di Ombudsman, pa medio di e remarca y preguntanan aki, pa tene bon cuenta cu tur e aspectonan aki. Pasobra di otro forma ta core e risico cu ta nombra, suspende of kita un Ombudsman na un forma mucho casual y facil. E lo ta un oportunidad perdi, ya cu ta trata aki, un biaha mas di un Institucion Constitucional cu ta hopi necesario pa entre otro percura pa e derecho constitucional di ciudadanonan di Aruba.”

E Ombudsman ta un instancia independiente y no-partidario cu ta trata kehonan riba (casi) tur instancia gubernamental. Por ehempel, si ta tarda cu tratamento di carta of peticion. Of hasta si no ta reacciona riba decisionnan di Corte of ora cu ta aplica e reglanan legal na un forma incorecto cu ta traha na desbentaha di e ciudadano.