Den caso gobierno bolbe viola veredicto, e mester paga 25 mil florin pa dia

Ayera hues a duna veredicto den e caso di Ocean Z cual ta indica cu gobierno y Zissu Properties N.V. a perde caso contra di habitantenan di Malmok cu ta yama nan mes “Preserva Malmok”. Gobierno ta wordo prohibi di adapta permiso di Zissu properties (di cas erfpacht pa hotel) y Zissu Properties ta prohibi di organisa eventonan publico of comercial riba e propiedad. 

Adicional: Gobierno y Zissu por conta cu multa di 25 mil florin pa cada dia cu nan viola esaki te na un suma maximo di 10 miyon florin. Esaki ta keda valido tanten cu un hues den bodemprocedure no dicta otro. tambe gobierno y Zissu ta para responsabel pa cubri gastonan legal di Preserva Malmok.

Algun di e  puntonan cu a e habitantenan ta para pe ta pa no bin niun cambio na e erfpacht otorga na Zissu tanten cu e bodemrechter no tuma desicion riba e permiso. Tambe pa no tin ningun actividad comercial riba e tereno, probicion pa Zissu bin cu un hotel, restaurant of actividad di bar riba e tereno entre otro. 

E propietarionan a haya permiso pa construccion di un cas den un area residencial, sinembargo lo a “cambia” di idea y kier a bin cu un hotel cual a wordo construi tambe sin permiso pa haci esaki. December 2015 nan a te hasta cuminsa haci propaganda pa Ocean Z cual a haci cu habitantenan preocupa pa mantene e trankilidad den e bario a bay corte. Por medio di un corte sumario dia 11 di december 2015 hues a prohibi Zissu pa tin huurmento di cambernan riba e tereno sin permiso pa haci esaki. Tambe prohibicion pa continua cu cualkier construccion riba e tereno sin permiso pa esaki. Informacion ta indica cu Minister encarga cu Insfrastructura Benny Sevinger lo a duna Zissu permiso pa continua construccion di hotel cabamento di december cual a haci cu habitantenan a bolbe bay hues pa un veredicto tanten cu e bodemprocedure no keda cla.

Promocion amplio online

Ocean Z ta riba booking.com desde 5 di november 2015 sinembargo ora subi riba e website aworaki e ta indica bo cu e propiedad no ta tumando reservacion na e momentonan aki. Si tin potret y promocion amplio di full e hotel cu 13 camber.

Evaluacion haci pa hues

Den e caso aki hues a evalua e iniciativa di e grupo di personanan cu ta biba den Malmok y Arashi cu e meta cu nan tin cual ta pa mantene nan estilo di bida (trankilidad) na Malmok y Arashi. Tambe ta evalua e permiso cu Zissu a ricibi unda claramente tin para cu nan tin un erfpacht anto cu e doño mester mantene su mes na e “erfpachtvoorwaarde” pa un cas. Sinembargo contra di permiso aki Zissu en bes di construi un cas, a construi un Boutique Hotel di 5 strea cu restaurant, bar, tienda, y sitio pa organisa evento riba e tereno, schoorsteen entre otro. Zissu a haci promocion pa esaki indicando cu e parti di horeca lo cuminsa cu operacion 7 di december 2015 cu posibilidad di keda habri te oranan trempan di mainta (of hopi laat di anochi) unda cu den grupo di maximo 120 persona por organisa eventonan.

Hues a tuma nota cu ta necesario un permiso di horeca den e caso aki cu tampoco ta na su luga y finalmente a tuma decision cu ta prohibi pa gobierno haci adaptacion na permiso di Zissu su erpacht. Ta prohibi Zissu di haci uzo di su instalacion di gas sin tin permiso na luga pa uza esaki, Zissu no ta permiti pa tene ningun actividad comercial of publico riba e tereno. 

Gobierno y Zissu ta mara na dwangsom di 25 mil pa cada dia cu nan viola e puntonan ariba mencion te na un maximo di 10 miyon florin. Zissu y Gobierno mester paga costo di procedura legal di Preserva Malmok cu ta 464,09 florin na voorschot y 1500 na salario pa abogadonan.  Esaki segun hues Van de Leur.

Locual cu ta keda habri ta e hecho cu ya Zissu tabatin un dwangsom di 25 mil pa cada dia cu nan viola veredicto di hues for di luna di december. No sa si mientrastanto nan a viola e permiso aki y si nan mester para responsabel pa paga preserva Aruba.