Nos ta den un crisis sin precedente, no pa nos so, sino pa mundo henter. Awor aki loke nos mester haci ta contribui te na maximo cu loke nos por laga e daño ta lo menos posible. Sin embargo, aunke nos por ta di acuerdo cu ta esey e ciudadania mester por spera di nos, como prensa por ehemplo, diferencia di opinion lo keda semper. Y esey den diferente aspecto. Manera e conflicto cu a surgi awor entre parti di prensa y gobierno, specificamente Prome Ministro. Como promer responsable di orden y seguridad publico el a tuma e decision di proclama un ‘toque de queda’ cu ta prohibi poblacion completo pa no por subi caya den e orario stipula, salvo e excepcionnan stipula.

Esaki a afecta naturalmente varios tipo di negoshi. Nos compania mes ta un di nan cu tin un problema pasobra parti di e trabao pa saca un corant mainta tempran ta sucede den oranan di marduga. Nos empleadonan di imprenta mester por bay cas y lo mester inclui nan den e excepcionnan cu gobierno ta permiti. E decision ey no a tuma ainda, motibo pa nos cumpli cu ley y cera na tempo. E edicion cu bo tin bo dilanti awe ta produci ayeranochi tempran, y por lo tanto no ta inclui e ultimo noticianan cu gobierno a duna den su rueda di prensa ayeranochi. Bo ta haya nan pa lesa mañan, diamars; o bo ta bay riba nos pagina di Facebook, pa hay’e mas tempran. Nos tambe ta den e transicion pa e era digital. Esey ta perhudica un parti di e poblacion cu ta conta cu nos ta semper ‘on top’ di noticia? Sigur, pero nos no ta e unico responsable den esaki. Pakico gobierno no ta pasa pa tene su rueda di prensa mas tempran, pa e corantnan matutino por incorpora esaki den nan edicion regular? O tene un rueda di prensa so pa dia, pasobra tanto cos nobo no ta bin acerca, segun nos observacion. Ademas e ta interes di gobierno tambe pa su informacion haya un cobertura maximo, hustamente den e temponan aki? No ta conhuntamente nos tin e responsabilidad pa informa pueblo?

Tocante e conflicto cu a surgi entre (parti di) prensa y gobierno, laga nos cuminsa pa bisa cu nos no ta parti di esey. Nos no a haya, como redaccion di Bon Dia Aruba, un invitacion pa tal reunion y si esey lo tabata e caso, nos lo no a apoya e iniciativa ey, sigur no pa e rumbo cu el a tuma awor, cu menasa di un boycott di e ruedanan di prensa. Nos lo no a apoya esey hamas, pasobra e ta kita atencion di e problema cardinal cu nos tin awor. Esey ta e menasa grandi cu e situacion di e virus ta presenta, si no logra contene esaki na tempo. Nos ta hopi mas vulnerable cu otro teritorionan pasobra nos ta asina chikito. Talvez gobierno tampoco tin tanto gana di papia di e menasa grandi di un cantidad sumamente limita di recurso, manera e cantidad di cama disponible y demas equipo necesario. Ey nos preocupacion grandi mester ta, y no si mester ta posible pa un parti di prensa cu ta custumbra core caya marduga en busca di e ultimo accidente, pa por pone esey online prome cu mayoria di nos spierta mainta tempran. Nos no ta den e negoshi ey y ta atende e obstaculonan cu nos ta topa den loke nos ta haci.

Esey no ta implica cu nos ta di acuerdo den tur sentido cu e forma con ta maneha e situacion. Y caro cu hopi di esey tin di haci cu e preparacion cu no tabata optimal, pero esey no ta algo cu nos por cambia awor aki. Nos mester ta consciente di e peso grandi cu tin riba schouder di esnan cu ta carga responsabilidad gubernamental na e momento aki, y esun cu no por yuda, no stroba tampoco. Kico no kier bisa cu esey? Tuma por ehemplo e gritonan di ‘censura’ cu supuestamente gobierno ta practicando. Nan sa di kico nan ta papia? Limitando bo acceso na caya den marduga ta un limitacion (temporal) di recolecta noticia (‘vrije nieuwsgaring’) y ta parce nos hustifica ora haci e balance entre interes di prensa y interes general den e situacion excepcional aki. Censura ta ora gobierno ta limita bo den e sentido cu ta exigi di antemano cu bo ta presenta loke bo ta skirbi pa nan aproba. Di esey absolutamente nos no ta papiando na e momento aki y dia mester yega asina leu, nos ta entre e promenan cu ta subi baricada.

Nos ta spera cu sano huicio ta prevalece y di ambos banda ta haci lo mihor pa duna e pueblo aki loke nan mester: informacion confiable. Nos ta den un situacion di bida y morto, cu un poblacion grandi y di edad cu ta na riesgo, tambe pasobra gobierno(nan) a faya den hiba un maneho contundente pa para e desaroyonan negativo riba tereno di salubridad. Awor aki, loke nos por haci ta contesta concreto y al caso den e asunto aki, y prensa mester exigi esey, envez di acepta cu den cierto caso ta evadi duna un contesta directo. Ta aki segun nos opinion nos empeño mester ta.

LEAVE A REPLY

Please enter your comment!
Please enter your name here