simar reunion premier Eman Br.jpg

Ayera den oranan di mainta sindicato di maestro Simar a sostene un reunion cu Minister Presidente, sr. Mike Eman den oranan di merdia.
Na salida secretario di Simar, Maroushka Cornelie a declara na Bon Dia, cu e reunion a bay bon y e “tabata un bon combersacion”.

Den e reunion aki Simar a papia cu Premier Eman riba e situacion di e managernan di EPI. Conelie a indica cu nan ta pidiendo pa un derecho cu nan ta kere cu e grupo di managernan aki tin.  Nan ta exigiendo pa haya balor pa nan trabou, pero tambe respet pa e responsabilidad grandi cu nan ta carga den enseñanza  na EPI.

Secretario di Simar a laga sa cu un parti di e negociacion cu minister di Enseñansa, sra. Michelle Hooyboer-Winklaar a bay bon, pero ta pendiente ainda –segun Simar- otro parti cu a stagna y e sindicato ta kere cu mester wordo atendi.

E parti cu a stagna tin di haber caminda nan ta pidi un compensacion pa e trabou cu e managernan di EPI ta haci. Cornelie a indica cu banda di esey, e empleadonan aki ta haciendo trabou di dos persona cu tampoco no ta corecto. 

E ta bisa cu esakinan ta puntonan cu Simar tabata atendiendo cu e minister di Enseñansa, pero cu nan no a yega di conclui. Esaki apesar cu e mesun mandatario ta papiando di un “unfinished business”, ya cu pe  e ta “finished”,  pero segun Simar su cronologia di cartanan y acontecimento nan ta haya cu ainda nan no a yega na e final ainda. 

Managernan di EPI

P’esey nan a pidi den varios ocasion pa sinta na mesa cu minister di Enseñansa, pero nan no a haya contesta, y pa tal motibo nan a dicidi di sinta cu Minister Presidente.  Cornelie a laga sa cu Premier Eman ta di acuerdo cu mester bin na un solucion pronto, ya cu e caso di e managernan di EPI tin mas cu 12 aña bieu.

E sindicalista a indica cu Simar por a opta pa bin cu un caso huridico, pero nan no ta considera prudente pa haci’e, ya cu di un banda e ta bay costa pais Aruba placa. Pero di otro banda Simar kier evita pa e situacion aki rek mas aña. “Nos ta kere cu minister di Enseñansa lo bay compronde cu ta trata aki di balor di trabou di hende”.

Cornelie a bisa cu e reunion cu Minister Presidente a wordo limita exclusivamente na e caso di e managernan di EPI, aunke e sindicato tin varios punto pendiente pa trata cu gobierno entre nan cantidad di maestronan cu ya tin edad di pensioen y ainda ta trahando, y di otro banda e scarsedad di maestronan pa falta di un bon estimulo den nan salario.

Tambe den e reunion aki, Cornelie den nomber di Simar a splica Premier Eman dicon nan ta cerca dje y cual caminda nan a cana prome cu Simar a dicidi di yega dilanti su persona.

Na final Simar a pidi Minister Presidente pa purba den un siman di duna nan un contesta. E mandatario a keda di combersa cu su colega minister di Enseñansa pa asina Simar lo por haya un contesta. “Simar su meta ta pa sinta na mesa”, asina Cornelie a bisa na Bon Dia Aruba. Awor Simar lo warda esey y ora nan ta haya e contesta fei e mandatario, nan lo dicidi kico lo bira e siguiente paso.

LEAVE A REPLY

Please enter your comment!
Please enter your name here