E dia ta acercando unda mester tende e decision di gobierno di Reino encuanto e eventual instruccion cu gobierno di Aruba por haya pa modifica su presupuesto 2022. No a tende nada definitivo, pero nos ta supone cu e declaracion reciente di nos Promer Ministro tin algun relacion cu e deliberacionnan cu el a hiba na Hulanda, cu gobierno Hulandes y cu CAft. E diferencia di opinion cu CAft tabata abarca un gran cantidad di punto y no a bira conoci kico a logra resolve caba y kico a keda pendiente. E hecho cu e mandatario a concentra riba e desacuerdo encuanto e gastonan di personal ta duna e impresion cu no a logra yega na un entendimento riba esaki. Si esey ta asina, anto tin un base pa un ‘aanwijzing’ sin cu a menciona e palabra ey mes? Di e manera aki e mandatario ta preparando tereno, splicando su posicion den e topico aki, cu a keda sin resolve? Y si ta asina, nos lo haya mas splicacion riba otro asunto cu tambe a keda pega? Di tur manera, loke nos no a tende ta cu e deliberacionnan a duna nan fruto den e sentido cu tin un acuerdo cu lo kita e eventual ‘aanwijzing’ for di mesa. Y, hasta por ta asina cu un eventual instruccion tin su bentaha, ya cu por mustra ta cu ta Hulanda a impone medida, y no cu gobierno a bay di acuerdo pa implementa e medidanan riba propio iniciativa.

Esey por ta e caso, pero nos no ta bay specula; dia nos haya sa nos lo haya sa. Mas importante ta pa enfoca loke e promer mandatario ta trece dilanti tocante e topico di gasto di personal mes. E mandatario ta concentra riba e aspecto di gasto, cu e mencion di e suma di Afl. 479 miyon na 2019 como punto di referencia (‘ijkpunt’), loke ta parti di e acuerdo cu Hulanda pero no e unico. E otro aspecto ta cu lo mester tin un mehoracion structural a base di medida tuma. Esaki ta aparece den articulo 4 di seccion II di e protocol, cu ta bisa: ” Aruba ta tuma medida complementario pa termino mediano y largo pa laga e gastonan structural di personal sigui baha nominalmente”.

Ta parce nos cu riba e punto aki e debate ta concentra. Gasto di personal a baha desde 2020 a base di e austerizacion introduci pa motibo di Covid-19 (12,6%), pero no a mira practicamente nada di e medidanan structural acompañante. Di un di nan Promer Ministro a reconoce cu gobierno no a cumpli, cual ta e cambio necesario den e ‘periodiek’ automatico cu ta keda un estorbo pa por yega na gasto di personal sostenible.

Henter e debate encuanto e asunto aki, aparte di entre gobierno di Aruba y CAft ta parce di ta keda riba e pregunta aki: ta hustifica, den un aña cu mester fia como 227 miyon florin pa cera presupuesto, cu ta fia placa tambe pa duna e empleado publico su salario completo back, o mester warda te ora cu tin suficiente fondo propio pa haci esaki? Nos por añadi un pregunta mas: pakico e ciudadano cu no ta empleado publico, cu den cierto caso a sali relativamente mal di e pandemia, y nunca mas a mira nan salario completo, via impuesto mester contribui pa e empleado publico mihor paga, por haya di placa fia, o di contribucion di esun menos afortuna, nan salario completo?

 

Ta interesante pa tuma nota, no pa promer biaha, cu gobierno ta pro pa maneha e sistema cu IMF ta usa pa duna un criterio general pa gasto di personal gubernamental. Esey ta e standard di 10% di GDP nominal como maximo. Esey lo implica cu pa 2021, ultimo cifra conoci, gobierno su gasto di personal lo no ta mas halto cu Afl. 5596 miyon, a base di e GDP nominal di e aña ey, manera calcula provisionalmente pa Banco Central. Pero, gobierno no ta papiando di apenas 459 miyon…? Esey no ta implica cu nos a yega caba na e famoso 10%, hasta cu nos ta leu bao di esaki? Pakico anto nos Promer Ministro ta bisa den rueda di prensa cu nos lo ta yegando na esey proximamente?

Aki no mester tin ningun confusion; e hecho simple ta cu gobierno ta conta solamente e personal directamente emplea na e ministerionan. E payroll total ta sinembargo hopi mas grandi. E ta abarca, segun e metodo maneha pa IMF, tur personal den servicio gubernamental, incluyendo e entidadnan manera manera Staten, Raad van Advies, tambe Rekenkamer y ademas tur entidad cu ta haya subsidio di salario, enseñanza priva subsidia y tur fundacion y otro entidad subsidia. Si gobierno di berdad kier haci e cambio, anto cuminza cu presenta e datonan di gasto di personal segun e metodo internacional cu IMF ta maneha, y stop di duna mitar informacion na pueblo. Pa mas detaye nos ta referi na e articulo den e edicion aki tocante e tema aki.

Finalmente, manera bisa caba, no tabatin anuncio di exito logra na Hulanda. Pregunta awor: e anuncio tocante gasto di personal ta pa preapara pa e aanwijzing cu ta bay bin? Y si ta asina, nos por spera mas anuncio di asunto den cual no a yega na acuerdo? Y mester conclui cu eseynan ta bay ta parti di e decision cu Conseho di Ministro di Reino mester tuma pronto? Nos ta keda pendiente…

LEAVE A REPLY

Please enter your comment!
Please enter your name here