Desperdicio di drecha caminda riba tereno priva, DOW mester por detecta ken ta responsabel

Redaccion di Bon Dia Aruba a haya notificacion di un persona na San Nicolas di un monton grandi di sushi procedente di drecha caminda basha riba tereno priva di un famia na San Nicolas.

 E sushi aki ta deposita riba tereno di famia Maduro na Watapana Gezaag, net panort di Geermanstraat.  Manera por mira riba e fotonan acompañante e desperdicio aki ta principalmente pida asfalt bieu cu santo blanco cu sa uza pa pone bao di e capa di asfalt. No ta conoci di cual obra e ta bin, ni ken a deposita e sushi aki na luga di hiba esaki na e luga corecto. Probablemente e desperdicio aki a keda deposita den curso di aña pasa.

Muy probablemente e material aki ta bin di un obra gubernamental unda cu un compania contrata pa DOW por ta responsabel pa dump e sushi aki, cu ta trata di mas di 10 carga di dumptruck por lo menos a primera bista. E famia concerni lo aprecia si autoridadnan di DOW por laga investiga e asunto aki pa por atende tambe e eliminacion di e contaminacion aki di tereno priva di un famia cu ningun momento a pidi o a duna permiso pa bin tira sushi di e manera aki riba nan tereno.