Aña pasa den luna di september a tuma luga e ‘regiezitting’ pa loke ta trata e apelacion di caso Avestruz. Durante e ‘regiezitting’ aki e tres huesnan cu ta encarga cu e caso a scoge e segundo siman di luna di mei di e aña aki pa trata e caso di apelacion como tal. Entrante 13 di mei lo cuminsa cu e tratamento di e apelacion di caso Avestruz.
Dia 12 di september 2023 a tuma luga e ‘regiezitting’ na unda e tres huesnan di e corte a informa e abogadonan di e shete sospechoso den e caso cu den luna di mei di e aña aki lo scucha e sospechoso- y testigonan den e caso. E sospechosonan den caso Avestruz ta ex-minister y actual parlamentario Benny Sevinger, Pieter Sussebeek, Carlo Mansur Jr., Maria Leoncita Arends, Ninuska Nuñez, Edgar (Gabby) Werleman y Curt Harms.
Segun portal di noticia local, NoticiaCla, aña pasa durante e regiezitting cuater di e shete sospechosonan a apela parti di nan sentencia, mientras cu Ministerio Publico a apela e sentencia di tres sospechoso. Durante e tratamento di e caso, e abogadonan por a presenta nan deseo pa nan cliente y dos abogado a pidi pa scucha dos testigo mas, esta L. Harms y A. Fowler. Fuera di esaki, tin cuater otro testigo cu ya caba a wordo solicita pa wordo scucha pa e caso di sospechoso parlamentario Benny Sevinger.
Segun e portal, e abogado Demis Illes a splica cu e dos testigonan nobo por duna claridad riba e situacion di e gym na cas di e sospechoso Sussebeek, y tambe e bendemento di tereno na Sussebeek, cual ta un di e acusacionnan.
Ademas di esaki, abogado di sospechosonan Nuñez y Werleman, Rudy Oomen, a pidi pa un
testigo, den e caso aki un notario, pa elabora ariba loke ta e proceso di traspaso di tereno erfpacht, unda cu kier demostra cu na ningun momento e clientenan no a malinforma Gobierno di Aruba di nan transaccionnan.
Tur peticion cu a wordo haci pa loke ta trata testigonan, a wordo considera pa e huesnan cu ta trata e caso. Segun e portal, e testigonan cu e huesnan a aproba pa ser scucha durante e tratamento di apelacion di e caso ta bay wordo scucha durante e prome siman cu a reserva pa e tratamento di apelacion di caso Avestruz. Corte a reserva dos siman pa ta trata e caso aki.
E shete sospechosonan ya caba menciona a apela nan sentencia y di e shete sospechosonan aki Ministerio Publico a bay den apelacion den e caso di tres di e di shete sospechosonan aki. Ministerio Publico a indica, mediante un comunicado di prensa, cu esaki ta pa motibo cu nan no ta comparti e punto di bista di hues den Prome Instancia den e casonan di e sospechosonan Benny Sevinger, Leoncita Arends y Pieter Sussebeek y no ta de acuerdo cu e castigonan cu hues a duna.
Ministerio Publico a exigi un castigo di prison incondicional di cinco aña contra ex minister Benny Sevinger pa corupcion, estafa di Pais Aruba, maluso di su funcion, labamento di placa y malversacion. Nan a exigi tambe pa Sevinger wordo saca di derecho electoral pa un periodo di 10 aña.
Sinembargo corte a condena e sospechoso principal na un castigo di 12 luna, di cual seis luna tabata condicional, pa corupcion y malversacion. El a wordo declara liber di e acusacionnan di estafa di Pais Aruba, maluso di funcion y labamento di placa. Corte a alabes a sak’e for derecho electoral pa un periodo di cinco aña.
Contra e sospechoso Maria Leoncita Arends, Ministerio Publico a exigi un castigo di prison incondicional di tres aña y un boet di 25 mil florin pa estafa di Pais Aruba, falsificacion y corupcion. Corte a condena Arends na un castigo di 24 luna di prison, di cual 12 tabata condicional, un tempo di prueba di tres aña y un boet di 50 mil florin. El a wordo declara liber di e acusacionnan di corupcion activo di e sospechoso Sevinger y di falsificacion.
Pa loke ta e sospechoso Pieter Sussebeek, ken den pasado tabata fungi como ambtenaar di DOW, corte a conden’e na un castigo di dos aña, di cual un aña ta condicional, pa corupcion y labamento di placa, y el a wordo declara parcialmente liber di e acusacion di corupcion activo di e ex minister.
Adicionalmente den e caso di Sussebeek corte a dicta cu e suma di 1.3 miyon dollar cu a wordo confisca, a wordo declara perdi. Ministerio Publico a exigi un castigo incondicional di cuater aña contra e sospechoso den Prome Instancia.
Tanto pa Arends como Sussebeek corte a impone un condicion particular. E condicion aki ta cu nan no por pidi of haya optie riba erfpacht comercial pa un periodo di tres aña.
E nucleo di caso Avestruz ta cu e acusadonan tabata usa un compania pa cumpra tereno erfpacht pa desaroya proyecto, mientras cu e compania no a wordo lanta ainda. Pero segun a sali na cla durante interogacion den corte, e proposito di e compania a cambia na caminda, y a bira un negoshi di bende tereno na stranhero, generando ganashi inmenso, manera noticiero NoticiaCla ta reporta.
Den structura comercial di Aruba, un stranhero ta limita na un rol minoritario y no ta bin na remarca pa pidi un tereno. Den e caso aki, nan tabata cumpra e compania completo incluyendo e tereno, despues cu e persona local – den e caso aki, e acusadonan – a ricibi e tereno erfpacht for di gobierno. Asina tabata evadi reglanan di Pais Aruba cu ta limita e rol di stranheronan den economia di Aruba.
Den corte a sali na cla tambe cu Sevinger a tuma 11 mil florin for di fundacion Curazon Berde “como un adelanto”, birando esaki e raiz di e acusacion di malversacion contra Sevinger.
