E reciente aumento di salario pa empleado publico y otronan den sector publico, anuncia pa Promer Ministro, a bin un poco como sorpresa. Pero e no mester ta. E elementonan clave den e negociacion entre gobierno y sindicato tabat’ey caba.

Gobierno por a cera un aña cu di antemano tabata mustra hopi bon den sentido financiero. Finalmente e resultado por ta ainda mihor cu loke nos por a mira den cifra. Cifra di otro instancia pasobra gobierno mes ta cana atras cu reportahe financiero. Por ehemplo, ultimo reportahe trimestral di 2023 mester tabata den man di CAft y parlamento di Aruba pa mas tarda na mitar di luna di februari 2024. Nada ainda, y nos ta den luna cinco di 2024… Esey no a laga nos completamente sin dato, pasobra por ehemplo Banco Central si a duna resultado financiero di aña 2023, cu material financiero cu ta bin di e mesun gobierno di Aruba. Mas di Afl. 300 miyon di ingreso di impuesto mas, y como Afl. 295 miyon na ingreso total. Algo cu no a mira pa hopi tempo; mihor ainda cu e suma extra cobra despues di introduccion di BBO na 2007.

Mas placa disponible no ta implica cu gobierno por gasta esey manera ta desea. Supervision financiero ta ordena cu semper 50% di e suma extra riba e 1% di GDP cu di mes ta destina na e meta ey, ta bay pa paga debe y e restante 50% por dedica na cubri inversion. Y aunke por considera e empleado en general como ‘capital humano’, aumenta salario den ningun guion pa desaroyo economico ta ser considera un inversion. Di unda anto e espacio financiero lo ta bin pa gobierno por aumenta salario pa empleado publico di e manera aki? Mas di 10% extra na salario, riba un payroll di e ministerionan so di casi Afl. 300 miyon, ta suma sigur Afl. 30 miyon extra pa aña. Ademas, tene na cuenta cu e suma total di gasto di personal, cu ta cay den e definicion di e limite di gasto di personal, di 10% di GDP, ta cerca di Afl. 700 miyon; pues en total gasto di personal extra ta yega cerca di Afl. 70 miyon. Esaki ta equivalente na alrededor di 700 cupo di trabao, loke mester compensa anto cu reduccion di e aparato publico, cu parcialmente a tuma lugar den ultimo añanan.

Sin duda algun mester tabatin anto un ‘trade-off’ den e negociacion entre gobierno y sindicato. Gobierno no ta bay duna un regalo asina grandi, riba base permanente, sin haya algo cu gobierno tabata mester. Nos promer pensamento ta bay den direccion di e acuerdo cu gobierno di Aruba a cera cu Hulanda, den cuadro di e Landspakket, cu ta bin un restructuracion di e aparato publico, cu ta encera un sistema nobo di evaluacion di funcionamento y prestacion individual, ademas di posibilidad mas amplio pa retira personal for di servicio publico, a base di e evaluacion menciona. Tempo cu gobierno a anuncia e medidanan aki, tabatin bastante sonido di desacuerdo di e sindicatonan, pero despues a bin un silencio. A posterga e introduccion di e sistema nobo aki, cu mester a drenta na vigor na januari 2024; e status actual no ta conoci. Otro tema relaciona cu posicion huridico y salarial di empleado publico ta e eliminacion di e ‘periodiek’, e aumento salarial automatico, cu tambe ta hinca den e actual sistema di remuneracion, cu segun acuerdo den e Landspakket lo mester keda elimina. Nos no a tende nada al respecto, pero ta dificil pa kere cu a negocia un aumento asina faborable sin cu gobierno a haya explicitamente back e aceptacion di tur e obhetivonan di restructuracion di e aparato publico.

E pregunta cu ta surgi awor ta si sector priva por keda atras den compensacion di empleado pa inflacion di ultimo añanan. Un promer reaccion di un gremio empresarial a haya como contesta di e promer mandatario cu e aumento lo beneficia sector priva, pasobra esaki ta aumenta e poder di compra. Nos no a scucha un reaccion gremial riba esaki, pero nan ta haya esaki un paso imprudente mirando e situacion economico actual. Esey ta asina? Cifranan di impuesto riba ganashi, cu semper ta indica ganashi di e aña anterior, ta mustra un aumento fuerte na 2023 di alrededor di Afl. 50 miyon (+39%), compara cu 2022 (Afl. 178 miyon vs Afl. 128 miyon). Na 2019 e impuesto aki tabata na Afl. 159 miyon, mientras esun di 2020 tabata na Afl. 135 miyon. Pues un situacion di aumento regular, no spectacular, cu gasto operacional hopi mas halto, pa medidanan tuma pa gobierno. Ademas no tur sector y empresa ta den un situacion economico faborable. Lo tin un aumento di salario minimo na caminda pa inicio di 2025, cu lo aumenta gasto empresarial mas ainda. Si e paso tuma pa gobierno por tin repercusion den forma di exigencia di mas salario den sector priva, esey lo mester mira ainda.

Eleccion

Tur gobierno logicamente ta tene na cuenta cu eleccion ta na caminda. Den e caso aki tambe esaki pa gobierno ta hunga un rol importante. Cu e actual acuerdo ta logra kita e mecha for di posible accion sindical pasobra nan a haya di antemano loke nan por a bay busca den accion, loke por a perhudica posicion electoral di e actual gabinete. Interesante ta awor haya sa si e plannan di restructuracion lo bay tuma lugar tambe. Esey probablemente lo conoce su retraso, conveniente, manera tur proyecto gubernamental, cu e beneficio pa gobierno cu accion den esey tampoco ta bay stroba den campaña…