Aña 2020 tabata uno hopi pisa pa operacion di Departamento di Impuesto cu mester garantisa entrada pa gobierno pa cual den 2021 mester traha na recuperacion.

Luenne Pieters, directora di DIMP, a splica cu prome cu e pandemia a yega, e departamento tabata e trayecto di mehoransa, no cu stapnan grandi, pero si a nota un mehoracion structural den e entrada y cobransanan. Den 2020 a trece 1.3 biyon den caha di gobierno compara cu e aña anterior cu tabata 1.7 biyon florin. E diferencia, den un temporada di pandemia, tabata 400 miyon florin menos. Nan no ta considera cu e pandemia tabatin un impacto grandi manera a pensa. Pero no por nenga tampoco cu e tabatin su impacto riba e presupuesto di pais Aruba.

Awo e pregunta ta con ta bay sigui pa yega na e punto bek di mehoransa unda cu den 2019 pa prome biaha tabatin un surplus den entradanan di gobierno. Awo a cay bek na e nivel di 2014, pues por bisa cu a bay seis aña atras. Awo lo mester traha hunto cu comercio pa bay dilanti.

Prome cu e pandemia a haci un evaluacion y a constata cu tin 1.6 biyon florin riba caya. A mira cu e contribuyentenan a sigui cumpli cu nan debernan di impuesto. Si no paga impuesto al final ta abo mes como contribuyente lo wordo perhudica si surgi un situacion similar manera esun cu tin aworaki di pandemia.

En general, el a bisa, 2020, a bay basta bon y nan ta satisfecho pa e forma di cumplimento. Pa loke ta 2021 e ta bayendo basta slow. No ta premira un aumento grandi den entradanan di impuesto.

El a papia tambe di e paketenan di alivio fiscal. E prome pakete a cuminsa na april, mey y juni y tabata e lunanan ora pandemia a cuminsa y lockdown. El a duna comerciantenan un alivio directo den nan cash flow pasobra no mester a paga cierto primanan. Nan a haya un reduccion. Tin areglo di pago cu a aplasa cu tres luna y no a cobra interes. Tur esaki a yuda comercio cu a keda cu mas cash pa sobrevivi. A bini despues e di dos pakete alivio fiscal cu a for di luna di november y ta enfoca riba recuperacion. E pakete di alivio aki ta encera cu e comerciante cu tin perdida fiscal por dedica esaki ora cu e tin ganashi y esai ta valido pa shete en bes di cinco aña. Ta spera cu pa 2023 y 2024 e economia aki ta bek ora cu e perdida fiscal di 2020 por wordo kita for di eynan.

Tambe den e pakete ta bisa cu si ta bay inverti den e añanan aki lo, por deduci gastonan di inversion cu 10%, cu ta un deduccion di e ganashi di winstbelasting. Banda di esaki, tin tambe e posibilidad pa haci un areglo di pago pa loke ta belasting. E ta di 3, 6 of 12 luna pa comerciantenan; 6, 12 of 18 luna pa e ciudadano y pa pensionadonan  e ta 12, 18 y 24 luna.

Tambe DIMP ta trahando riba restitutie cu a logra avance tambe riba e parti aki. Awo falta solamente esnan di 2017, 2018 y 2019.

LEAVE A REPLY

Please enter your comment!
Please enter your name here