11Dump (2).jpg

PARKIETENBOS – Parlamentario Xiomara Ruiz Maduro ta splica Bon Dia cu un persona a bis’e cu e tin problema cu su pulmon pa motibo di e candelanan na dump y ta puntra cuanto otro hende mas por ta sufriendo di e molester aki siendo cu tabata tin un solucion pa dump.  Sra. Maduro ta agrega cu e no ta contra un futuro di sostenibilidad, pero cu mester stop e ora di pretende di haci esaki anto haci e di berdad.

”Locual ta tristo ta ora cu mi ta papia cu hendenan cu ta biba eybanda. Un mucha muhe di mi edad alrededor di 40 aña poco tempo atras el a bay check na Colombia caminda nan a bis’e e tin mancha na su pulmon. Kemen probablemente ta pa via di e caminda cu e ta biba unda cu el a biba semper banda di dump, aworaki e tin problema cu su pulmon. Si nos tabata por a haci algo pa purba stop e tipo di candelanan aki riba dump, kisas un persona asina no lo a haya su mes cu un mancha asina den su pulmon cual ta wordo causa ora cu bo inhala e stofnan aki y cuanto biaha dump ta cende na candela ora cu biento bira, hendenan ta bira desespera eybandanan”, Sra. Maduro ta bisa.

Sra. Maduro ta agrega cu esey ta djis 1 persona cu a acerc’e, cuanto hopi otro hende mas lo por tin problema cu esaki? ”Si no tabata tin nada,ta un otro cos. Tabata tin solucion anto awo ata nos aki atrobe 7 aña despues y ningun solucion.  Door cu bo tin sero di sushi benta riba otro cu ta acumula, esaki ta produci un gas cu ta cende candela riba su mes ora cu temperatura ta baha y ken no por bisa nos cu na dump tambe pa por reduci sushi, nan no ta duna nan ordo pa cuminsa kima algun cos? Sra. Maduro ta splica. ”Gobierno a boycott e proyecto aki anto mi punto ta cu den 7 aña no a bini cu niun alternativa. Nos ta papiando di sostenebilidad anto no tin sikiera un dump den ordo?” , Sra. Maduro ta bisa.

Segun Sra. Maduro, tabata tin un rapport cu ta bisa cu tanto placa por a drecha henter e luga y lag’e procesa.  ”E idea tabata ta pa reduci sushi, corda bon, esaki no tabata e solucion pa tur e problemanan di sushi na Aruba, pero e tabata ta pa evita cu bo ta haya e seronan di sushi manera cu tin aworaki y entre otro e candela cu ta wordo causa di e gasnan cu ta acumula eybao na dump. Bo ta kere e cos aki ta bon pa nos medio ambiente y salud? Djis pasobra Minister  Sevinger tabata tin un capricho cu e no kier e proyecto eynan”, Sra. Maduro ta bisa.

A deliberadamente boicotia e proyecto

Segun Sra. Maduro ta splica Bon Dia, gobierno a deliberadamente boicotia e proyecto aki pasobra nan tabata tin otro meta cu ne cual tabata pa EcoTech haya tur cos pa nan setup EcoGas. Sra. Maduro ta agrega cu esaki ta un proyecto cu a bay manera e mester a bay, el a costa 28 miyon florin,djey ora cu Minister no a gusta, a bay hues kende a bisa cu tin cu paga pasobra hende a haci nan trabao corecto y ta Minister no duna e mashinnan diesel y percura pa empleado. ”A tira sushi den dje cu no mester a tira eynan. A tira un piesa di un auto y bisa mi ken ta tira den su bari di sushi un piesa di auto anto cua truck di Serlimar ta bay cu piesa di auto si nan no ta ni bay cu bo sushi di cura?”

EcoGas tin su mesun sushi pero pa un proyecto asina ki ta factibel pa e gas yega WEB pa WEB traha riba dje, nan lo mester mas sushi. Pues e ora ey segun Sra. Maduro, nan a bay drenta den un acuerdo cu Serlimar pa Serlimar e ora eynan duna nan e sushi of pa haya esaki riba un prijs flexibel. ”Serlimar manera mi ta compronde, nan no tabata mucho di acuerdo ariba e cuenta di e prijs anto eynan e cos a pega caba. Despues e proyecto riba su mes mi a compronde cu no a resulta ,es decir, ora di kima e gas anto e gas no ta suficiente pa yega, y ora cu esaki start e ta saca un holo hopi malo y pa e tipo di cosnan aki semper mester tin un filter, awo e pregunta ta,  si e proyecto ey tin filter si of no?” Sra. Maduro ta comenta.

Door cu ningun hende ta haci pregunta ariba e cos ki, ni parlamento mes, tur cos ta cana su caminda pasobra segun Sra. Maduro, e cos aki tin di haber tambe cu por ehempel: WEB a bay den problema financiero door  ”pre finance” EcoGas cu 15 Miyon florin di WEB, banda di esey WEB a hisa tarifa  e tempo eynan despues cu a bini e drama di ‘hedging’ tambe hunto cu ne. ”Mester carga responsabilidad
pa cu proyecto akinan, pues kico si y no a pasa cu ne. E ta mea culpa tambe pasobra nos tambe di parlamento sigur di oposicion,  mester a haci pregunta tambe riba e parti aki di EcoGas; con a para cu e asunto aki pues en bista di cuenta di dump etc. Tur esaki biniendo bek awo a pone cu por ehempel a bini cu e prohibicion di saco di plastic, claro cu si nos ta uza 30 miyon saco di plastic aki na Aruba ta hopi di nan ta bay dump y si no ta pa e mangelnan, tur e sushi lo a bay Oranjestad riba e beachnan etc. Tur e cos aki ta un resultado door cu no tabata tin un maneho drechi na dump dirigi na Aruba su sushi”, Sra. Maduro ta bisa.

LEAVE A REPLY

Please enter your comment!
Please enter your name here