“Locual nos ta haciendo aworaki pa nos pashentnan di AZV ta un sistema hopi anticua”, ta e opinion di dokter di cas John Croes den un entrevista exclusivo cu Bon Dia.

Den publicacionnan anterior, nos a combersa cu diferente experto den e mundo di medicina riba varios tema. Por ehempel, nos a entrevista dokter di cas Joaquin van Trigt, unda nos a toca e tema di malesanan transmiti sexualmente como tambe e sistema di dokter di cas. Siguiendo cu e discusion y pa purba di bay un poco mas profundo den desaroyo di medicina na Aruba, nos a acerca dokter John Croes pa su opinion riba entre otro; uzo di remedinan natural den combinacion cu remedinan moderno y den general su opinion riba desaroyo di medicina na Aruba.

Medicina di futuro
Poniendo un banda su pechi politico mirando cu awor e ta riba lista di partido MAS, dr. Croes ta bisa cu e ta ‘e unico dokter na Aruba’ cu pa mas cu 30 aña a studia tur tipo di medicina: homeopatia, acupunctura, ayurveda, medicina Chines y mas. E ta comparti e ta bin for di un famia cu tin basta conocemento den medicina. “Den mi famia nos tin seis dokter. Mi tin un omo cu a studia Biokimica anto cu a traha den e botica tempo di Lago. E tabata bisa mi cu futuro di medicina no ta algo cu bo ta sali cu ne for di universidad. E ta totalmente un otro asunto. Y mas e añanan ta avansando, mi ta ripara cu e difunto ey tabata tin rason.”

Medicina genetica
Dr. Croes ta bisa nos cu medicina ta cambiando anto na un velocidad hopi grandi mes. “Locual nos ta haciendo aworaki pa nos pashentnan di AZV ta un sistema anticua. E ta un sistema cu ta pertenece den museo.” Medicina di aworaki, e ta splica, ta cuestion di uza laser, stemcel, ozone,y bo chromosoom nan. “Den e direccion ey medicina ta bayendo. No manera por ehempel nos pashentnan cu ta haya antibiotica cu paracetamol cu tur e cosnan ey. Ora bo studia medicina genetica – cual no ta popular na momentonan aki pa no stroba big pharma – bo ta ripara cu 80 % di e remedinan cu nos ta duna nos pashentnan awendia ta veneno y ta haci daño na bo chromosoomnan.” Pues locual ta resta como medicina e ta bisa, ta 20% cual ta casi nada.

Obliga pa bula cura
Dr. Croes ta remarca cu e ta haya mundo medico ta haciendo un fout den practica actual di medicina, pasobra ta obliga pashent pa ‘bula cura’. E ta splica cu e dokternan ta obliga pashent pa busca otro dokter mayoria di biaha; conseho cerca bisiña, dokternan natural den exterior y cosnan asina. “Si nan tin suerte nan ta topa un bon hierbatero aki na Aruba, pasobra tin hopi hierbatero. Pero tin di nan mi a ripara cu nan ta djis duna conseho y ta haci daño na e pashent.” E ta haya cu por ehempel mester bin cu un maneho pa educa e hierbatero.

“Bo no mester bay universidad pa bo haya bo certificado. Nos ta duna bo certificado pasobra bo sa bo hierbanan bon. Mundialmente e estadistica a mustra cu 75% di e poblacion mundial ta buscando remedinan natural/alternativo. Na Aruba, 75% ta uzando medicina natural sin cu e dokter sa. E problema ta cu e pashent, pa motibo cu e no tin confiansa den e dokter, e no ta bisa e dokter pasobra e por bira un discusion. Pasobra e dokter no por contesta e pregunta.”

Efecto directo di medicina
Nos no tin cierto informacion cu ta haci e medicina ta bira miho segun dr. Croes.
Pasobra normalmente segun e ta splica nos, e pashent ta keda keto anto e dokter ta keda pensa cu e dosis mester bay mas halto. Esey ta haci cu locual nan ta yama side effect mester wordo yama direct effect. “Mi coleganan no ta gusta ora mi papia di efecto directo pasobra e ta un berdad. Bo ta duna un remedi, pero e tin un efecto cu ta haci hopi daño na e pashent. Y esey bo ta wak e den practica. Mi por menciona bo masha hopi caso mes, pero kico ta pasa, nos a wordo doctrina den un sistema dictatorial cu bo mester pensa a base di locual nan ta duna nos como na schooling. Mi ta haya cu nos ta haciendo un fout cu esey pasobra medicina ta totalmente un otro asunto.”

Turismo medico
Dr. Croes a gradua na Universidad Javeriana na Bogota, Colombia den aña 1982 y for di e tempo ey e ta practica medicina aki na Aruba. “Mi storia ta diferente cu tur otro dokternan. Pasobra di famia, nos a sali di dokternan natural. Pues prome cu mi a bay studia mi tabata tin caba idea di medicina. Mi tabata cana hopi cu mi wela kende tabata conoce hopi e matanan.” E ta conta nos cu su wela tabata e prome assistent di dokter di Horacio Oduber Hospital. “E ta e enfermero cu a siña e dokter con pa combina e matanan cu e remedinan kimico di e tempo ey.”

E tempo ey tabata tin hopi caso di por ehempel di syphilis. Tabata bin hopi barco di e Spañonan como tambe hendenan Ingles cu tabata trece hopi malesanan di caya. Dr. Croes su wela tabata siña e dokter con pa combina e matanan cu e penicilline di e tempo ey, pasobra ya e tempo ey caba tabata existi resistencia na antibiotica.

“Ta aworaki nos ta bringa pa no duna bo antibiotica pasobra e resistencia, pero semper e tabata existi practicamente. Dr. Horacio a bira famoso pasobra mi wela tabata yud’e cura e malesanan cu normalmente lo por cura cu antibiotica. Cu e mata combina cu antibiotica si e dokter a logra bira famoso cu e hendenan tabata bin bek busca e dokter ey. P’esey e nomber Horacio Oduber ta riba nos hospital pasobra e tabata tin un popularidad grandi den Caribe.” Esey a haci cu Aruba a cuminsa bira conoci cu di tal forma e tempo ey caba (aña 1940 bay ariba) tabata tin turismo medico, segun dr. Croes.