Home Local Dokter Sharlin Vis: ‘Mester cambia nos lifestyle’

Dokter Sharlin Vis: ‘Mester cambia nos lifestyle’

458

Den un entrevista cu Bon Dia Aruba a tene cu dokter Sharline Vis, e ta splica nos tocante diabetes tipo 2, cual ta esun mas diagnostica aki na Aruba.

Sra. Vis a splica cu diabetes tipo 2 por wordo gecheck na cualkier edad paso e ta bin pa motibo di nos life style. Segun sra. Vis , esaki ta bin entre otro ora tin e problema di obesidad. “E manera cu nos ta come of nos ta move menos. Nos ta comiendo dimas anto subi peso. E peso ta subi, tin hopi vet visceral, cu ta e vet den bo organonan den barica, anto e vet ey ta stroba e insulina pa haci su trabou.”

Un persona cu diabetes tipo 2 ta cuminsa cu tablet. E pashent no ta cuminsa di biaha cu inyecta insulina. Segun sra. Vis e pashent por keda bebe tablet anto si yega un punto cu e ta bira pio, e ora ta yega na insulina. Esaki ta pasa si e pashent no ta cuida su mes.

“Pashent nan cu malesa cronico, ta pashent cu tin un aandoening pero nan ta sinti nan bon. Si no trata e malesa a lo largo ta bin complicacion. Ban bisa un pashent cu tin sucu di 12 porta no tin hopi keho pero despues di par di aña ta duna complicacion na micro citair arteria di riñon of wowo y macro sitair cu ta bay arteria mas grandi cu ta na cerebro y curason.”

E ta sigui splica cu ora e ser humano bira grandi, tin mas factor cu por afecta. Tin e factor genetico, tin edad, tin cos cu por cambia y cu no por. E ta remarca cu no por bisa un persona tur biaha cu el a haya diabetes pa motibo di descuido. No ta tur ora ta asina cu e persona a descuida y haya diabetes. E ta sigui splica cu tin ora cu e pancreas ta bira bieu mas lihe anto ta afecta e klier cu ta traha insulina. Tin hopi hormoonnan cu ta hopi activo cu den direccion pa diabetes pero esun mas conoci ta insulina. E ta wordo traha den eilandjes van Langerhans. Tin hende cu geneticamente e eilandjes ey nan ta stop di traha mas trempan cu otro hende, pues e ta un factor genetico. Tin hende indjan na sur America cu na cierto edad casi tur ta diabetico y esey ta paso nan genetica ta asina. Aki na Aruba tin cu ta indigena tambe. Un gran parti di nos poblacion ta bin di indjan mescos Africano. Nos tin genetica pa haya diabetes tipo 2.

E ta splica cu nos tin e mala suerte di biba den un epoca cu estilo di bida ta pasa den cambio, nos haci menos movecion, nos ta come cuminda cu no ta adecuado, cuminda cu hopi caloria y cu menos balor nutritivo. E ta aclara cu esey no ta na Aruba so pero mundo henter. E cuminda procesa cu ta bin di hariña blanco, ta un di e cosnan cu ta subi nos cantidad di caloria.

Mundo henter ta asina. Nos ta come cosnan malo pa nos curpa y nos ta warda mas energia den e vet. Tin cu bisa cu tempo di antes nos no tabata sa tur esaki. E ta informacion nobo segun sra. Vis. Bo ta bay wak cu mester informa hende pa nan wak ki riesgo nan ta core, paso hopi hende no sa, nos kier pone atencion y pasa e informacion asina mas hende por lesa of tende.

Sra. Vis ta splica hopi biaha ora diagnostica un pashent tipo 2, nan no sa 8 aña cu nan tabata tin e sucu poco halto pero porta e sucu ta keda subi  y tin biaha nan ta bin cu complicacion. Un herida na dede of pia cu no ta cura. Of pashent ta haya un infarto y ta bay check cu e sucu ta halto. Esey ta prome momento cu nan ta haya sa cu nan tin e malesa.

E pashent ta cuminsa cu pildo, mas frecuente nan ta cuminsa cu metformine prome despues diamicron. Tin cu controla constantemente pa wak si e ta sucu ta bon. Tin otro remedi pero ta e momento cu medicamento no ta yuda mas e ora mester cambia pa insulina.

Sra. Vis ta splica cu mayoria di biaha hende ta pensa sucu ta enemigo pero no ta asina. Sucu ta e ‘brandstof’ ta wordo uza pa motor di e curpa. E cellen ta tuma e sucu pa genera energia anto e momento e vet malo cu ta rond e organonan no ta laga e sucu drenta pa produci energia, e ora ta haya diabetes. Pa e motibo ta uza tablet ‘metformine’ pa facilita e proceso cu por drenta.

E ta aclara cu e diabetes tipo 2 no ta problema di resistencia pa insulina. E ta un otro problema, cual ta e pancreas ta traha menos insulina. Ta duna un combinacion cu un pildo cu ta stimula e pancreas pa traha mas insulina. Y ta dune e otro pildo cu ta yuda insulina traha miho riba e receptor. Esey ta e motibo cu ta duna insulina cu diamicron.

Mayoria di biaha segun sra. Vis ora un pashent bay na insulina, e tin cu keda bebe tablet paso si pashent spuit insulina, por tin e problema di resistencia y mas si tin hopi vet. Un pashent cu diabetes tipo 2 cu ta bebe su tablet, cambia su manera di come pa miho, haci movecion y a baha peso anto resistencia ta baha e dosis di remedi y si e pashent continua saludabel tin posibilidad di stop cu remedi pero mester zorg pa keda na e mesun rutina sinembargo e ta bisa cu esey ta e parti dificil ‘mester hopi guia’.

Unico manera pa haya sa si tin sucu ta pa via di test di sanger. No ta uza metodo di strip fingers. Preferibel sra. Vis ta bisa cu pa ta sigur di diagnose mester bay dokter haci test via intraveneus (via ader).

Si yega na un punto cu pashent no ta cuida mas, e por perde gevoel. E pashent no ta sinti ora tin herida. E nervio ta bay atras. Si no bay dokter na tempo, por haya infeccion y e por spreid si no cuida. Despues di tempo mester amputa sea ta pia, dede of unda e ta afecta. Ta depende con lihe bay dokter of con e complicacion ta , ya cu ‘e daño ta tuma tempo’.

Segun sra. Vis pashentnan cu diabetes ta core riesgo di presion, colesterol halto, y si ta huma por trece daño. Tur esaki ta factornan di daño den arterianan di curpa. E ta tuma añanan pa bira asina pero semper ta bon pa cuida bo mes pa no core nan cu riesgo despues.