Home Local Ivan Croes, presidente Lion’s Club: ‘Cualkier yudansa, cu mil amor nos ta...

Ivan Croes, presidente Lion’s Club: ‘Cualkier yudansa, cu mil amor nos ta haci’e’

133

Recientemente Bon Dia Aruba tabata tin un entrevista cu president di Lion’s club Ivan Croes cu a splica di algun proyecto manera ‘smile mobiel’ cu nan ta ocupa cu ne. el a comparti tambe tocante ‘Leo Club’, cu ta pa miembronan mas hoben.

Sr. Croes ta splica un proyecto cu nan activo den dje ta e ‘smile mobiel’. Segun sr. Croes e proyecto ta uno cu nan ta ricibi bon comentario di dje. E ta un trailer oficina chikito di dentista riba wiel cu ta core rond algun casnan di anciano di Aruba.

“E smile mobile ta pasa e casnan di hende grandi. Nan ta haci actividad aki den cierto ocasionnan cu ta special manera Pasco, dia di mama, dia di tata.” Segun sr. Croes nan ta recolecta e djente y duna nan un limpieza gratis. E ‘smile mobiel’ tin henter un setup cu stoel y tur ekipo cu ta necesario pa haci e proyecto posibel. E pashentnan aki – cu ta wordo beneficia segun sr. Croes – ta keda contento y agradecido di locual ta ser haci. E ta continua splicando cu e motibo ta paso e personanan aki no tin cu bay dentista, ni haci ningun gasto paso e ta gratis.

Sr. Croes ta bisa cu tin mas proyecto innovativo cu lo bin pa e aña aki y pa 2019. “Pa futuro nos lo kier crea un ride y lo cobra un fee na tur esunnan cu ta participa. Cu esaki ta recauda fondo. pa asina tur e locual wordo recauda por duna na un instancia. Esey si, cada aña lo ta un diferente instancia.” E ta splica cu e por ta cualkier fundacion cu tin e necesidad di berdad.

Comunidad di Aruba mester sa cu nan ta un grupo di persona cu boluntariamente ta dedica hopi ora pa bay yuda e pueblo di Aruba, segun sr. Croes. “Unda cu nos por duna un man nos ta duna. Trabou di Aruba Doet, scolnan cu mester cualkier yudansa. Tanten cu nos por haci esey cu mil amor nos ta sigui haci’e.”

Field trip
Segun sr. Croes e aña ta bay bin nan lo organisa un ‘field trip’ (ehercicio di trabou) pa asina por bay bishita instancianan. Nan ta pone nan mes na altura den kico nan por yuda y ta haci nan falta. “Nan por splica situacion di nan instancia. Despues di esey nos manera miembro ta reuni pa asina wak den kico nos por yuda. Den caso aki ta duna lezing y ta update e miembronan di diferente temanan.”

Tin un green project cu nan a dedica na Imelda Hof pa planta yen berdura. Di e forma aki tambe nan ta stimula cultura di Aruba, cu matanan di Aruba y yuda e muchanan pa nan ta creativo. “Nos a yuda un grupo cu ta toca e instrument di drum. Mirando cu nan ta hoben educativo y nan ta ocupa ta haci recreativo, nos a duna un set di drum.”

Manera e ta agrega di e rifa di cas, nan mester paga contratista pa por saca e ganashi pa asina por traha e cas. Como miembro di Lions club ta acerca comerciante pa genera fondo pero nan mester bende mas rifa cu ta posibel. “Un rifa di auto ta yuda genera placa, nos ta haci bingo cu ta sali exitoso. E Leo Club tambe ta haci na fundraising (recaudacion di fondo) pa asina nan tambe genera nan placa. Un idea ta pa traha hunto cu Corsou tambe, pa asina nan crea mas idea y actividad hunto. Asina lo traha riba e parti social, e meta cu nan ta pensa y sigui cu planes pa genera mas placa.”

Proyectonan
E miembronan di Leo club ta esunnan bou di 30 aña cu tambe ta haci trabou boluntario pa comunidad.

Segun sr. Croes nan e yega di participa den varios beach clean up hunto cu algun organisacionnan. A yega di bay hospital pa conta storia pa e muchanan cu ta malo, agregando cu ta celebra dia di mucha tambe. Sr. Croes ta splica cu Leo club ta haya guia di Lion’s club y  tambe ta comparti cu nan algun idea pa asina nan por sigui traha. Segun sr. Croes tin variedad di proyecto cu nan tin den mente ainda.

E proyecto cu sr. Croes a menciona ta esun di stop humamento den auto. E ta splica cu a haci entrega di e proyecto e tempo cu e gobierno anterior tabata na mando. El a wordo aproba y por e pega sticker na auto pa asina conscientisa comunidad pa stop di huma den auto cu mucha. Sr. Croes ta splica cu prome cu el a bira presidente, e tabata un ‘advisor’ di e Leo club pa asina guia y duna nan varios idea.  Otro proyecto cu tin den mente ta pa fundacion FAVI. Nan kier duna nan un ‘ride’ (recorido) riba brommer pa asina tambe por sinti e biento y duna nan algo diferente.

Union
Sr. Croes ta splica cu tin un apoyo grandi di tur e clubnan. E ta bisa cu Aruba, Boneiro y Corsou tin un respet mutuo. Un proyecto cu tin den mente cu e islanan ABC cu lo ta un proyecto grandi unda cu cada isla lo haci algo mesun momento y e mesun tempo pero na diferente isla. E ta pensa tur e club nan cu ta traha pa comunidad asina nan por crea idea hunto y yega na un proyecto tambe di tur e club nan di servicio. E no ta pensa mester tin un diferencia y competencia sino tur mester ta uni.

Nan ta 34 boluntarionan cu ta yuda den Lion’s Club pa un meta, segun sr. Croes ta splica. Agregando cu si un persona drenta manera boluntario, ta pa cumpli, pa yuda y sirbi e comunidad di Aruba. “Un grupo cu ta keda fielmente na nan trabou.”