Gobierno nobo a anuncia plan pa bay stimula crecimento y diversificacion economico. Nos no tin ningun duda di e bon intencion di e equipo parcialmente nobo di mandatario den e tema aki, sin embargo e resultadonan di ultimo añanan pa loke ta e mesun esfuerzonan aki a haci nos cuidadoso. Nos a pasa den varios ‘up and down’ den ultimo 10, 15 aña, cu crecemento economico yegando como promedio apenas na un crecemento real. Y tuma na cuenta cu esaki tabata e caso caba promer cu e coronavirus Covid-19 a bin bruha tur cos mas ainda.

Naturalmente tabatin un cierto crecimento economico, principalmente bao di empuhe di turismo, cu na cierto momento a probecha tambe di suceso den nos region, manera e horcannan di 2017 cu a dirigi parti di turista cu tabata bay otro isla, pa nos pais. Di otro banda, nos no a mira un maneho consistente cu tabata pone un pregunta central: te unda e crecimento bao di empuhe di hotelnan grandi ta bay hiba nos, promer cu e cuminza mustra señal di saturacion? Y seguidamente tambe e pregunta: e momento di e señal ey lo ta demasiado laat pa cambia e rumbo di e barco economico?

Nos ta den ultimo recta di 2021 y realmente nos no a mira un contesta riba e preguntanan, tur hende ta parce di ta wanta nan rosea, sperando cu e turismo ‘standard’ cu nos conoce lo saca nos di e crisis economico y financiero aki. Pero, hasta den e caso cu esey sucede, y nos tin un situacion economico hopi mas faborable y tambe pa empleo, nos lo ta mihor prepara pa un siguiente crisis cu por toca na nos porta? Nos ta discutiendo pa decadas caba di ‘diversificacion di economia’ pero esaki no a cristaliza, al contrario. Y no pasobra no a haci intento, pero tur cos a resulta nulo y irelevante te awor. Culpa di ken? Tampoco ta interesante. Loke si ta interesante ta pa nos cuminza analisa kico por mehora pa haci Aruba un base mas sigur pa capital di exterior y di propio tera… Sigur si gobierno no tin e medionan financiero pa hiba un maneho di estimulo, anto lo ta mas importante ainda pa ‘get out of the way’. Duna sector priva mas espacio, no solamente den cambio di regulacion, sino tambe den e modelo fiscal maneha te awor.

Aki nos ta topa cu un problema basta complica, unda e falta di claridad di banda gubernamental no ta yuda. Nos ta bayendo pa fin di aña y for di e señalnan Hulandes (Uitvoeringsagenda) nos por comprende cu ta practicamente sigur introduccion di un ‘BTW’ (VAT), mientras di banda di gobierno tin aparente temor pa papia mes di e tema. Esaki ta un di e desbentahanan grandi pa Aruba, no pa gobierno, di e eterno posposicion di tuma decision pa unda nos ta bay.

Pero tin mas elemento fiscal cu por considera. Pakico no aboli e impuesto riba dividend? Den nos sistema fiscal tin doble impuesto riba empresa. Promer nan ta paga 25% di nan ganashi como ‘winstbelasting’. Pero despues, ora un compania ta desea di paga ganashi na accionista, ta bin un segundo ‘sweep’ fiscal di 10 pa 15 porciento riba e sumanan paga. Esaki a haci cu pa añanan tabatin hopi placa riba cuenta di compania, y gobierno no tabata haya mas cu 5 a 6 miyon florin pa aña na dividendbelasting. Mientras tanto winstbelasting hasta den añanan malo tabata entrega entre 100 pa 200 miyon. Algun aña atras ministro di finanzas a bin riba e idea pa duna empresanan un oportunidad pa un dividendbelasting reduci, loke mesora a resulta den mas placa pa accionista, y mas placa pa caha di gobierno, mas di 47 miyon florin na 2019 y 21 miyon na 2020. Presupuesta pa 2021: 17 miyon, pues cada vez menos, manera por a anticipa, bayendo back na e 6 miyon di antes. Mester considera simplemente aboli e impuesto aki, cu si no, ta keda un estorbo pa placa lora. Gobierno lo haya un poco menos entrada, inicialmente, te cu mas actividad economico conduci na mas entrada via winstbelasting. Di otro banda, menos administracion, y simplificacion di e regimen fiscal, ta menos gasto den e aparato, tambe un di e metanan general.

E pregunta cu ta surgi naturalmente, ta kico mester haci cu e areglo di IPC, cu ta asina complica y excluyente, cu ta cierto empresa grandi manera hotel so, no tur, ta cualifica pa e areglo elitario aki, cu ta haci cu den cierto caso nan no ta paga practicamente nada na impuesto riba ganashi. Den su rapport di 2006 e buro di investigacion FIAS di World Bank/IMF a recomenda aboli e areglo di IPC y bin cu un sistema mas igualitario pa tur empresa. Despues di varios cambio di gobierno, nada a sucede… Nos ta na punto di yega na cambio bastante drastico, no solamente den nos sistema fiscal, den loke nos mester haci pa stimula economia, y ta importante resolve e problemanan grandi, manera e incertidumbre crea pa e inaccion den e proceso di peticion pa permiso di estadia. Ta di suma urgencia pa duna claridad na empresanan cu ta depende di trahador, local y stranhero. No ta ‘rocket science’ pa realiza cu no pa tur cupo vacante tin hende local disponible. Keda haci nada no ta un opcion.

 

LEAVE A REPLY

Please enter your comment!
Please enter your name here