DTI ta reconoce instancianan pa realisa cierto tareanan

E plan di independisacion di DTI y fortalecemento di e departamento aki pa por genera su propio entrada ta status quo ainda. “No tin cambio ariba esey”, asina director di DTI sr. Dominico Werleman a declara na Bon Dia Aruba.

E problema cu a impedi cu e proceso di DTI Sui Generis no por a cana mucho leu, ta e mesun leynan anticua cu ainda nan tin cu traha cun’e. Pero poco poco –segun sr. Werleman- nan ta canando e caminda pa reconoce e instancianan pa realisa cierto tareanan cu nan mes no por brinda e servicio, ya sea pa motibo di personal, ekipo, etc…

Igualmente un departamento di e embergadura di DTI mester cumpli cu reglanan internacional. Considerando cu di nan banda DTI no tabatin e medionan financiero, esaki ta obliga nan di reconoce instancianan pa haci cierto tipo di trabou specialisa aki.

E ta haya cu e situacion aki ta un tendencia mundial. Te hasta Hulanda mes cierto instancia di gobierno a pasa over pa sector priva. Pero naturalmente, gobierno mester keda cu e control riba e calidad y e servicio cu ta wordo brinda na  e publico.

“Nos tin cu garantisa cu e tin calidad y cu nan no ta bay saca probecho desproporcional cerca nan clientenan”, el a laga sa.

Si un departamento di e caracteristica di DTI lo por funciona como un empresa Sui Generis, sr. Werleman a señala cu e ta posibel. Solamente cu e tarifa seguramente lo por subi basta halto pa asina nan entrada lo por cubri totalmente nan gastonan. Esaki lo demanda cu nan mester check cada proceso unda nan por genera entrada y con nan por maximalisa pa asina e departamento ta auto suficiente.  

Entrada

Locual si DTI ta haciendo ta purba di institucionalisa e rol di un inspector di siguridad den  cada empresa pa asina hisa e nivel di siguridad di e empresanan mes.  Nan ta trahando riba e aspecto aki, ya cu esaki ta keda un prioridad di DTI.

Sr. Werleman kende na april proximo lo cumpli 36 aña trahando den aparato gubernamental ta masha entusiasma cu e proyecto aki. E ta spera cu den e proximo tres aña cu e tin pa bay, lo por mira tur proyecto pendiente aworaki bira realidad. E tabata evaluando pa bay mas tempran pero mirando cu tin basta desaroyo nobo, e no kier djis bay y laga e trabou na mita. E ta prefera te ora cierto trabou ta finalisa -specialmente esun di reconoce instancianan pa cierto trabou- bin cla pa bay cu pensioen. “Bo kier laga esey bon hinca den otro cu mañan e proceso ta sigui… Mi kier laga atras algo bon y duradero” 

Sr. Werleman a keda sorprendi den forma positivo cu presupuesto di DTI no a sufri cambio of recorte substancial. “E cifranan cu mi ta haya te aworaki, ta mustra cu nos a haya suficiente medio cu nos por funciona optimalmente. Ya cu DTI su presupuesto no a wordo corta di e tanto ey, a base di locual nos mes a propone”, el a bisa.  E ta haya e cifra di nan presupuesto ta basta rasonabel pa nan por cubri e servicio basta optimal e aña aki.

Sr. Werleman ta aclaria cu introduccion di inspector di siguridad ta genera entrada pa DTI, pero nan meta ta esun di garantisa siguridad. Encuanto entrada el a admiti “cu e ta yuda un tiki, pero pa nos ta primordial e siguridad, entrada ta secundario”.