Ayera Departamento di Salubridad Publico (DVG) a duna di conoce cu na Aruba a registra 5 caso di e variante conoci como Britanico. Relaciona cu esaki, awe mainta comunidad a wordo informa den algun medio di comunicacion cu e cinco persona aki a recupera, pero esey no ta nifica cu e virus a desaparece.

Asina a duna di conoce Jurette Croes, ken ta vocero di Departamento di Salubridad Publico, pa Bon Dia Aruba un rato pasa, na unda por a compronde for di rednan social cu e cinco persona aki a recupera caba, pero esey no ta nifica cu e virus a desaparece completamente.

El a splica cu e prome cinco hendenan aki a recupera, pero loke nan no sa ta si nan a contagia otro hende cu e variante aki di e virus. Di e cinco persona, dos di nan no tin registro cu nan a haci algun biahe pa exterior ni tampoco tin historia si nan tabatin contacto cu un hende positivo cu tin contacto cu e otro tres persona aki.

“Cu esaki mi por misa cu nos ta conclui cu e variante nobo ta na Aruba y nos no sa precies te na e momentonan aki con hopi e lo a plama,” Croes a señala.

Ademas, el a menciona cu nan ta sigui manda e diferente testnan tur siman na Hulanda pa por controla nan riba e diferente variante. Pero manera a bisa caba, 2 persona a wordo contagia localmente, loke ta nifica cu e virus nobo aki ta na Aruba.

“No ta asina cu pasobra e 5 aki ya no ta activo mas y nan a recupera e virus a disparce, probablemente tin mas persona cu ta canando rond cu e variante aki”, Croes a afirma.

Laboratorio di Hospital ta esun encarga di manda e testnan aki na Hulanda pa asina por check riba e diferente variante cu a wordo origina.

 

 

LEAVE A REPLY

Please enter your comment!
Please enter your name here