Home Local ‘E bondad di e Arubano a bolbe resalta’

‘E bondad di e Arubano a bolbe resalta’

293

Den cuadro cu actividadnan di Aruba Doet e fin di siman aki, Fundacion pa Hende Muhe den Dificultad por poco a keda afo si no tabata pa un bunita gesto di algun ciudadano.

Shete hoben boluntario di Magmatic Communications a traha e fin di siman aki na e fundacion den cuadro cu proyecto di Aruba Doet. Nan a traha un plataforma pa artista local Daniel Richardson haci su obra (wall painting) riba dje. Coordinador di e fundacion, Magaly Maduro ta bisa nos cu nan a bay un tienda pa busca nan verf y lastimamente nan no a tuma nan check. E factura tabata uno di mas cu 1.300 florin na verf cumpra na e tienda y nan no tabata kier a move ningun manera pa por a purba yuda e fundacion cu esaki.

Tabata oranan di atardi caba y nan no lo por a bay un otro caminda pa busca verf pues lo mester a opta pa djis keda afo. “Na dado momento nos no tabata tin ningun alternativa anto e momento ey  nos a bisa cu nos lo cancela esaki. Un meneer a acerca nos y puntra nos cuanto e ta, y cu e ta willing pa swipe e pa nos y nos ta dun’e e check.” Pues famia Quandt a yuda mesora e fundacion anto ta algo bunita pa mira con un hende homber a bin na rescate di e fundacion.  “Mi  a gradici e famia, no pa mi, pero pa tur hende muhe cu ta bin e shelter. E bondad di e Arubano a bolbe resalta y esey ta hopi bunita. E tabata hopi emocional pa mira hendenan di bon curason haci esaki”, sra. Maduro ta bisa.

Dia 7 y 8 di maart siman pasa manera conoci tabata tin e conferencia di reino riba violencia domestico. Loke a resalta pa e fundacion tabata pa papia riba traha hunto, cual nan ta haciendo caba. “Den Caribe nos ta trahando hopi cu otro. Den casonan necesario nos ta vang op clientenan di por ehempel Corsou, Bonaire etc. Anto vice versa, y aki nos ta prepara nan pa bay Hulanda.”

Si sigui e tratado di Istanbul cu su puntonan, na Aruba e ora lo mester adapta un shelter pa cada 10 mil habitante.  Cu 120.000 habitante e ora nos lo mester 12 shelter na Aruba y actualmente tin cinco, segun e. Esey ta e minimo cu tin mester y awor tin preparacion pa aumenta esaki. Hunto cu Aruba Rotary tin un master plan traha pa mas luga pa hende keda.

Pa e aña aki FHMD lo concentra riba e proyecto di teen dating violence cu a caba di concretisa, e buki ta cla cu pinturanan anto IPA ta colaborando riba e parti pedagogico y con pa trece den scol.  E fundacion kier start tambe riba e movecion di sexual harrasment (Me Too) cu informacion den tur bario. Sra. Maduro: ‘Pasobra esaki ta algo cu ta sosode na Aruba pa varios tempo y hopi añanan nos a cera boca di esaki, haci e parti di nos cultura y acept’e manera otro cosnan.”