Despues di un ausencia di rednan social, Adele a bolbe Instagram cu un explosion. E cantante a cende internet ayera mainta mustrando un potret pa celebra su di 32 cumpleaños.
E cantante di ‘Hello’, kende no a post riba rednan social desde december, a para cu un sonrisa enorme bou di un areglo floral. Bistiendo un shimis cortico preto, el a los su cabei blond y a completa su look cu hilchi preto. E cantante tabata visiblemente mas flaco, y e transformacion ta dramatico.
Pronto Adele a wordo inunda cu elogio y mensahenan di sosten di fanaticonan y otro celebridadnan. Rita Wilson, kende a bay den cuarentena cu su esposo Tom Hanks mientras e par tabata na Australia na maart, a comenta riba e post, skirbiendo “Feliz cumpleaños, Adele. Mandando bo hopi amor! Bo ta mustra precioso!”
Aña pasa, Adele a cuminsa acepta amor propio mientras tabata celebra su cumpleaños, y a skirbi riba Instagram ‘30 tabata un reto fuerte pero mi ta haciendo mi best pa acepta tur esaki’. Esey por tabata un referencia na su separacion di su esposo. Aña pasa el a anuncia cu el a divorcia di Simon Konecki despues di tres aña di matrimonio. E cantante y Konecki tin un yiu homber, Angelo, kende a nace na 2012.
Adele ta conoci pa tin su bida priva leu di bista publico. Mientras e no a referi directamente na su perdida di peso, el a skirbi riba Instagram na october aña pasa: “Antes mi tabata yora, pero awo mi ta soda.”
