E miniserie tocante e multimiyonario Jeffrey Epstein, acusa di trafico di menor pa fin sexual, ta duna un alerta na tanto abusado- como victimanan, segun a considera e Mexicano, Leopoldo Gout, un di e productornan di ‘Jeffrey Epstein: Filthy Rich’ riba Netflix.

“Nos kier pa yuda otro sobreviviente papia, y pa hende mesun corupto cune pensa dos biaha. Nos kier pa luz briya. Ohala e tragedia di e documental aki ta sirbi sociedad pa algo”, Gout a señala den un entrevista pa e diario Reforma.

Tambe e productor a celebra cu ta trata di un proyecto cu ta revela cuestionnan nunca antes trata, loke por supone un serie di emocion pa e publico: “Nos ta revelando, habriendo e cortina di un mundo te awo impenetrabel, hasta prome cu #MeToo. Esey ta e orguyo cu mi tin. Ta un serie hopi fuerte”, el a destaca.

E serie ta conta e storia di un di e depredadonan sexual mas potente den ultimo añanan na Merca, ken hunto su pareha Ghislaine Maxwell tabata recluta mucha y adolescente p’e y su amigonan poderoso. Entre e lista di amigo ta e actual presidente Mericano, Donald Trump, prins Andrew di Inglatera, productor Harvey Weinstein y ex-presidente Mericano, Bill Clinton.

Prensa a batisa su avion priva como ‘Lolita Express’ dunando referencia na e medio di transporte cu tabata hiba menornan di edad di un estado na otro entre 1999 y 2007. Sea na su mansionnan na New York, Palm Beach of riba su isla priva den Caribe nombra ‘Isla di Pedofiel’, Epstein y Maxwell presuntamente tabata atrae menornan di edad cu promesa cu lo ricibi centenares di dollar si tabata duna masashi, cual despues tabata converti den abuso.

Tabata trata di un red den cual tabata pidi menornan pa yama victimanan nobo, pa asina e ‘suministro’ nunca termina pa e magnate.

E documental di Netflix cu ta expone e abusonan y violacionnan di Epstein tin como virtud pa duna un voz na e victimanan sobreviviente. E relatonan den prome persona y e entramado di corupcion ta dibuha e homber multimiyonario a traves di e cuatro capitulo.

“Tabata un mundo di trabou pa tuma contacto cu sobreviviente, kende tabatin asina hopi balor pa papia, pasobra e violencia cu el a causa a afecta hasta nan famia. Ta un domino, nos no tabatin ni idea te na unda esaki tabata yega”, Gout a comparti.

Prome cu e serie dirigi pa Lisa Bryant y inspira pa e buki ‘Filthy Rich’ di James Patterson a ser tuma pa Netflix, e tabata propuesto pa su exhibicion den otro companianan, cual a rechasa e proyecto pa temor di represalia na man di Epstein of su amigonan poderoso.

“Epstein tabata liber y tabatin tur poder di mundo na momento cu nos a cuminsa desaroya e proyecto. Na e team di investigado, por ehemplo, a cuminsa sigui nan. Epstein tabata investigando tur cu tabata involucra. E tabata explorando haci algo fuerte contra nos, y pa suerte el a wordo aresta”, Gout a bisa.

Mientras tanto, dia 22 di juni ultimo a logra localisa Ghislaine Maxwell na Paris, Francia, despues cu husticia di Merca tabata busk’e pa su participacion den e delitonan cu a hiba Epstein prison.

E diaronan Ingles, The Times y The Sun a haya e paradero di e muhe di 58 aña acusa di provee e menornan di edad na e magnate. Maxwell a nace na Francia y ta yiu di e magnate Robert Maxwell, ex-doño di Mirror Group Newspapers. Segun un fuente na The Sun, kedando na e pais ey e por evita su traslado na Merca, pasobra no tin convenio di extradicion entre ambos nacion.

 

LEAVE A REPLY

Please enter your comment!
Please enter your name here