E aña nobo a habri cu hopi controversia den Los Angeles despues cu un persona a cambia e famoso borchi di Hollywood pa ‘Hollyweed’. Polis ta bisa cu video di seguridad ta mustra un persona masculino bisti na preto a comete e acto. E persona por haya su mes den problema hudicial si e wordo gara. Esaki no ta e prome biaha cu e borchi aki a wordo manipula segun CBS. Den 1976 algun activista a uza e palabranan aki pa manda un mensahe. Danny Finegood y un grupo di amigo a haci e mesun cambio riba e borchi di Hollywood 41 aña pasa riba aña nobo. Finegood a fayece den 2007. “E no tabata un prank, e tabata un mensahe,” Finegood su casa, Bonnie, ta bisa. Yiu di Finegood, Matt Finegood ta bisa cu el a lanta ta ricibi un cantidad di mensahe di texto di hende cu a pensa cu ta el a haci e. “Mi amigonan a yamami puntrami si ta ami a haci e pero mi no a haci e. Mare tabata ami.”
Bonnie ta bisa cu Danny y su amigonan a riesga di wordo aresta den 1976 pa protesta den cuadro cu legislacion nobo cu a bin na vigor den 1976 na California riba posesion di Marijuana. Aworaki ta mustra cu un otro persona kier a protesta y trece un mensahe pa dilanti en cuanto ta e tema di Marijuana. Te ainda e persona tras di e acto di vandalismo di e aña aki no ta conoci.
Por lesa mas aki: CBS NEWS
