Editorial: Nos ta prepara pa un colapso na Venezuela?

E señalnan t’ey caba!

Den e dianan aki nos ta tende bastante comentario tocante e ‘turistanan’ Venezolano cu ta bishita nos isla. Ta tende tambe cu mester distingui entre nan; tin cu ta bin como bon turista, tin ta bin pa saca placa y bolbe nan pais pa haci negoshi cun’e; tin ta bin pa no bolbe…

Esey no mester straña nos; migracion ta di tur tempo y migracion laboral pa e teritorionan cu tin miho perspectiva tabata t’ey semper. No solamente den region di Caribe, sino riba continente mes esaki ta algo comun, di Alaska te Tierra del Fuego. Recientemente nos por observa e creciente problema di refugiado cu ta purba drenta Europa, unda nan ta fiha nan mes riba e paisnan di miho reputacion economico, manera Alemania, Hulanda, Suecia.

Desde cu Aruba a bira manera un magnet den fin di añanan 80, e fenomeno di e stranhero cu ta bin aki, y no ta sali mas a bira algo comun pa nos tambe. Aruba tabatin mester di hopi mas trahado cu loke mercado laboral tabatin, y den nos poblacion e stranheronan a bira mas di un tercera parti. Talbes e no tabata asina visibel, pero den e añanan ey tambe conflicto interno grandi a hunga un papel den migracion, specialmente di Colombia, unda e guera entre gobernacion, guerrilla, y narcotrafico a percura pa miyones di hende desplasa. Venezuela tambe a haya un gran parti di e refugiadonan di e pais bisiña, cu hasta a yega na surpasa un miyon y mey di persona.

Awe, nos por  ta enfrentando un situacion similar di parti di Venezuela, cu por ta hasta pio. Pakico? Pasobra den e caso di Venezuela actualmente nos ta papiando di  un posibel collapse di e sistema gubernamental, bao presion no di forsa militar di ningun adversario, sino simplemente bao di e situacion insoportabel di desabastecimento. Venezuela su aparato productivo, tanto agropecuario como  industrial, a yega na un punto cu pa hopi articulo basico ya no tin produccion local. Den e guera pa control di produccion, gobierno socialista di Chavez y Maduro a desapropia hopi industria, y a pone hende na mando di e ‘propiedadnan di Pueblo’ aki cu no sa di e negoshi ey.  E resultado no por ta otro cu un desastre di scarsedad.

Claro cu a pensa cu e rikesanan enorme di petroleo lo a yuda gobierno financia y importa tur loke e pais ya no ta produci mas. Pero nan a kiboca nan mes den e magnitud di e problema, tambe pasobra e beneficionan di petroleo a cuminsa disminui. Esaki pa motibo di diferente factor. Pa cuminsa gobierno di Chavez, despues di e intento di golpi di estado na 2002/2003, a nacionalisa tur loke tabata propiedad di companianan grandi internacional di petroleo, kedando sin e experticio, tecnologia, y capital di esakinan.  Gradualmente e industria a cuminsa bay atras, mientras tabata necesario pa mantene un nivel halto di inversion. Ultimamente, e siguiente golpi a bin via e caida di prijs di petroleo, cu a bay di riba $90 pa bari di crudo te na $40 awor. Riba un produccion di mas o menos 2,3 miyon bari pa dia, esaki ta haci un diferencia di mas di 30 biyon (30.000 miyon) dollar di diferencia den entrada di e pais. Anto diripiente, compra di tur cuminda, paña y producto industrial cu ganashi di petroleo a resulta un cos imposibel.

E problema mas grandi ta cu no tin un caminda di regreso: e unico manera pa reestablece produccion ta traves di duna e doñonan nan negoshi bek, pasobra ta nan sa con pa maneha nan, y ademas termina e stipulacion di prijs ‘socialista’ cu ta haci cu nan no por produci pa e prijs stipula ey. Esey e gobierno aki hamas ta bay permiti.

No ta straño anto cu un di e paisnan di OPEC cu mas ta boga awor pa limita produccion den e organisacion aki, pa permiti prijs mundial di crudo subi y asina scapa no Venezuela so, sino varios otro pais di e problema financiero cu nan tin.  

Cu e perspectiva di un par di luna hopi cayente, cu e eleccion di december proximo na caminda, ta imaginabel cu por tin un explosion social cu ta bira incontrolabel y cu hopi mas hende ta busca un caminda di bay, cu e paña so cu nan tin bisti. Y un di e luganan mas cercano ta Aruba. E prome ola t’ey caba: nos ta hayando e ultimo añanan caba esunnan mas fortuna cu a bin Aruba en busca di un posibilidad di inverti. Hopi di nan a bay den real estate, principalmente apartamento y condominio. Pero nos a cuminsa haya otro grupo, cu no tin e poder financiero ey pa yuda nan mes, pero ta bin aki pa haci cualkier cos, hasta delincuencia.

Pero, nos por haya un ola di esaki. Nos ta prepara pa esey? Nos no ta bisa cu gobierno mester divulga su plannan di contingencia, esey no ta recomendabel. Pero nos mester tin e certeza cu nan ta preparando si.

 

You May Also Like

ATIA ta sostene e moratorio di supermercado

ATIA ta kere firmemente den e principio di mercado liber, sinembargo den e caso ...

parke di molina

Permiso parke molina Urirama cla

E permiso yama ‘hindervergunning’ pa construi e parke di molina na Urirama ta adapta ...

2oct uzo auto electrico (2).jpg

Uzo di autonan electrico ta hayando mas acogida na Aruba

ORANJESTAD – E autonan no convencional cu ta traha cu coriente ta hayando mas ...

Intencion di tram tabata un ‘shopping tour’ pero a bira un ‘free city tour’

Mientras establecimentonan comercial ta cera nan porta den caya grandi of nan ta move ...

Formador: Lo lanta un ministerio di integridad

Ayera merdia formador Evelyn Wever-Croes (MEP) ta informa prensa despues di reuni cu gobernador ...