Eleccion a bay bon…Sin claridad riba hopi cos…

Nos por mira atras riba un dia di eleccion cu a bay hopi tranquil, aunke den e Editorial aki nos no ta trata e resultado mes, esey debi na e ora di clausura cu nos mester mantene. A pesar cu e dia a bay tranquil, esey no ta implica cu no tabatin cos cu por mehora. Mainta tempran nos a tuma nota na un di e urnanan cu tabatin un incidente unda un persona den rolstoel tabatin mester di ayudo pa e por a yena su biyete. E dirigencia di e local a interveni splicando e ayudante cu e no por yuda e persona discapacita di e manera ey y mester laga e mes yena e biyete. Sin embargo, e problema tabata cu e mesa tabata asina halto cu e persona discapacita no por a yega pa e haci e trabao su mes, ademas e no por a lanta para su so pa e yega na e nivel necesario pa maneha e formulario. Esey inmediatamente a trece na claridad cu e detayenan chikito aki ta importante: pakico no tin den cada local di votacion un hokki di votacion unda a adapta e nivel di e mesa pa por acomoda nos ciudadanonan cu tin bastante problema caba cu nan condicion fisico. Esaki ta djis un ehemplo di e cosnan menos bon organisa, cu talvez tabata debi na e tempo cortico di preparacion di e eleccion. Sin embargo, nos por bisa cu en general e proceso a cana bon, cu su inicio un poco incomodo cu tabata duna e impresion cu e votacion lo por a topa cu problema di tempo, cu despues a resulta di no ta realidad.

Cierto aspecto nos no por a cubri bon, y esey ta con e proceso di e controladornan di e partido(nan) politico cu tabatin e tipo di persona aki na e urnanan, tumando na cuenta cu e listanan cu huez a permiti haya tabata solamente di nomber, fam y number di secuencia den e registro. Pa promer biaha no tabata disponible ni fecha ni adres di e personanan registra. Interesante tabata riba dia di eleccion cierto expresion haci pa e politiconan na entrada o salida di e local di votacion. Por ehemplo nos por a tende di Promer Ministro cu e ta dispuesto di traha cu tur partido, cu excepcion di e adversario tradicional. El a menciona e motibo tambe: e situacion di corupcion di nivel halto den seno di e partido ey.

Otro expresion interesante a bin di lider di partido Pueblo Prome, cu a elabora, riba pregunta di Bon Dia Aruba, riba e posibilidadnan cu su partido ta mira pa reapertura di e refineria. El a menciona nomber di un di e tres candidatonan cu e ta contempla pa habri e refineria, cu ta e empresa petrolero Lukoil, un empresa grandi di Rusia, cu ta opera den varios pais den diferente parti di mundo. E tabatin dos mas pero no kier a menciona nomber. Ta zona bon, berdad? No, ta surgi varios pregunta. Pa cuminza el a desacredita e faborito escogi pa actual gobierno completamente, cu ta e consorcio di ocasion Quanten LLC, cu lo a entrega un propuesta final durante e dianan di campaña, pero cu despues a entrega solamente un silencio ensordecedor. Mientras nos medio a lo largo di e ultimo añanan a acerca e intentonan di gobierno pa logra reapertura cu un scepticismo, basa riba hecho palpable for di e sector di energia aki, nos no ta mira motibo pa kere den e siguiente politico cu ta bin conta nos storia ‘too good to be true’ tocante e refineria. Sigur no si esaki ta bin di persona cu den pasado a trata di yuda e impostor internacional di Arevenca pa cumpra e refineria. Henter e asunto aki ta parce atrobe na e nivel ey, y no ta representa cosnan creible. Ademas, e situacion di petroleo den nos region ta birando mas y mas dificil, cu e ciere pa tempo indefini reciente di e refineria di St Croix como culminacion di e situacion aki, unda actualmente tur refineria grandi di exportacion den nos region ta cera pa tempo indefini. Di esakinan, ademas, Aruba y St Croix tabata cera desde 2012 caba, y den e caso di St Croix aki nos por mira kico ta pasa ora un refineria den e clima inclemente di Caribe ta keda cera pa casi un decada. A pesar di inversion di biyones den e refineria e entidad ambiental Mericano EPA a pone un fin na e aventura na e isla. Lastima cu te na ultimo a keda tene e pueblo di San Nicolas, y henter Aruba tambe, den scur tocante e posibilidadnan real den e asunto aki. Mester ta visto cu mas cu nunca awor ta e momento pa e goberno nobo, cualkier cu e ta, pone un paro na e accionnan sin sentido di mantene un ilusion cu ta bay cumpli 10 aña, cu no ta significa nada pa desaroyo di San Nicolas y alrededor. Y esey mientras cu e ta e parti di Aruba cu mas ta sclama pa un rehabilitacion completo. Ta un lastima cu esaki ta otro di e temanan cu a keda sin debido atencion den campaña, salvo intento di algun partido. E ta keda como un tarea mas pa e proximo deliberacionnan entre esnan cu ta yama pa goberna.