editorial.jpg

Cu interes nos a tuma nota di  publicacion di e resultadonan di un encuesta teni recientemente bao di 550 persona local, tocante situacion politico na Aruba. Mester bisa cu no tabatin tanto sorpresa den e resultadonan, ya cu e comentarionan presenta ta loke nos por scucha na tur momento di dia, na cualkier luga na Aruba. Interesante ta pa tuma nota di un grupo bastante grandi cu no a defini  nan posicion ainda pa loke nan lo vota si tabatin eleccion awe. Esaki ta significa na prome luga cu e apoyo masivo cu partido AVP a haya na 2013 no ta existi na e momento aki. Nan lo tin un aña pa trece cambio den esey. Specialmente remarcabel ta e cifra halto di desaprobacion di e falta di liderazgo cu ta señala pa Prome Ministro, atribui entre otro na su ausencia regular, loke a causa cu problemanan na Aruba den gobernacion no a keda atendi na un manera adecuado.

Banda di esey, practicamente tur ministro a haya critica serio riba nan maneho, cu excepcion di esunnan encarga cu labor y enseñansa. Cu esey no ta bisa cu no lo tin critica riba nan maneho di e dosnan aki, pero en todo caso tin un impresion mas positivo di nan actitud y empeño. Atencion grandi ta bay naturalmente na e ministro encarga cu turismo, cu lo a cay den popularidad, pero lo  por saca un asiento si acaso e bay riba su mes cu un partido nobo, pero no mas cu esey tampoco.

Critica serio ta toca oposicion tambe. Pa loke ta e partido grandi den oposicion, ta sinti falta di liderazgo tambe y falta di organisacion. Despues di e salida cu hopi boroto di personanan clave den e top di partido, tabata notabel den eleccion di 2013 cu reorganisacion di partido y renobacion den su direccion lo ta indispensabel pa un regreso den gobernacion. Te na e momento aki, aparentemente e encuestadonan no ta mira suficiente señal di mehoracion den esaki.

E partido minoritario den oposicion tambe ta keda lidia cu su problema di prome momento y esey ta cu e tin e imagen di ‘partido di un solo persona’. Si  no bin cambio den esey, den forma di ampliacion di e liderazgo di e partido cu persona di peso y prestigio, e partido ta keda loke e ta awe caba.  Di eventual otro partido chikito no tin tanto expectativa cu nan por haci un diferencia den proximo eleccion.

Tocante e encuesta mes, mester bisa cu nos no por evalua su validez den e sentido cu no a publica nada tocante e forma di organisa esaki, eleccion ‘a select’ di e encuestadonan y demas garantia pa por papia di un encuesta cientificamente valido. Di otro banda, no tin resultado realmente sorprendente cu ta yama atencion y por lo tanto e encuesta por ta dunando un imagen real di opinion actual na Aruba. A scoge pa publica e resultadonan manera un sintesis di opinion, sin cu a publica cifra concreto riba pregunta concreto haci, loke por duna e publicacion mas credibilidad dunando e lector un bista mas amplio di contenido di e encuesta, algo cu esunnan responsabel lo por considera ainda pa haci.

Kico en todo caso por ta e balor di e encuesta aki? Cu na mas o menos un aña di eleccion na september 2017 e ta indica e problemanan mayor pa e partidonan politico, sin excepcion. Ta existi un grupo grandi di potencial ‘swing voter’ cu no ta contento cu ningun di e partidonan politico, ni den gobierno, ni den oposicion. Pa loke ta esun den gobierno, e tarea lo ta pa mehora nan prestacion den practica di tur dia, tumando e decisionnan corecto na luga di ta pleitando cu otro den un lucha interno cu ta costando hopi energia y no tin beneficio pa e pueblo mes, cu mientras tanto no ta mira nada ta cambia den atencion pa su problemanan mayor. E unico alternativa ta cuminsa goberna drechi desde awe caba, pero semper ta resulta dificil pa animal di circo bieu siña triki nobo.

Pa oposicion, y sigur pa  e partido grandi, ta parce di crucial importancia pa yega na construi un liderazgo nobo, cu ta mustra vision, entusiasmo y credibilidad, pa por convence e votado den duda ainda cu nan por ta un alternativa den gobernacion. Esaki tambe ta encera un cambio den e manera di opera, cu cada biaha tin un efecto negativo den parlamento, cu semper ta keda forma pa esunnan di menor peso den e partido, cu consecuencia cu ta esunnan den gobernacion ta ‘call the shots’, degradando parlamento na un appendix di ehecutivo. Esey ta loke por mira tambe den gobernacion actual, unda e ‘amonan’ ta den gobierno, y e ‘sirbientenan’ ta den parlamento, cu pa nomber ta ‘e organo mas halto’ di nos pais.

Mescos cu na 2001 y 2009, por mira cu tin un ‘swing vote’ grandi cu lo bay defini resultado. Cu recurso financiero limita den futuro, lo ta interesante pa scucha con nan ta bay atende e problemanan na un manera realistico, scogiendo prioridad adecuadamente. 

 

LEAVE A REPLY

Please enter your comment!
Please enter your name here