9Reaccion Politico.jpg

Dialuna mainta Prome Minister Mike Eman a hiba un Rueda di Prensa emocional dedica na Mito Croes. Sr. Eman tabata hopi cerca cu Sr. Croes y a bisa cu nan contacto cu otro tabata diario y tabata brinda su sosten na e partido ora cu tabata mester, Sr. Croes lo haci falta. Tambe el a anuncia cu MFA Paradera lo wordo dedica na Sr. Croes mirando cu ta e bario cu el a biba y fayece, pero e bario cu semper el a lucha pe.

Prome minister Mike Eman: “Nos a perde un gran yiu di tera y consehero di Aruba durante generacion di gobernantenan politico. Desde prome momento cu mi a drenta politica, for di 2001 te cu diasabra, e contacto tabata diario y tin bes cada ora. Pasobra e retonan pa bo por duna contenido na un pais y pa un isla chikito por supera reto grandi, e cantidad di conseho y sosten cu bo mester pa por logra pa atravesa e momentonan mas complica den nos historia, no tin un miho persona cu por a cay bek riba dje cu ta Mito Croes. No pa su sabiduria sin limite so, un genio den bida, ley, tereno estatal, pero tambe un curason y consenshi asina integro honesto y humano.”

Contribucion Mito Croes Status Aparte

Ora Hulanda a bisa cu nos no por haya Status Aparte, hopi a mira un porta cera y a scoge pa independencia. Den esey Henny Eman  bisa, cu tanten cu Aruba ta desea Status Aparte, no mester laga Huland forsa nos den Antias of independencia. Sr. Croes a lanta y bisa cu Hulanda no por forsa nos pa ningun di dos, pasobra den sistema constitucional e derecho di un pueblo finalmente ta e bos di dios. E tempo ey Sr. Croes tabata consehero politico. Esey a anuncia entrada di Mito Croes den politica y lucha tambe pa Aruba su autonomia. “Semper mi tabata bise cu e ta e architecto y ami simplemente e constructor. Y e constructor no por sin su architect,” Prome Minister a bisa.

Pa loke ta reaccion di e fayecimento di Sr. Croes, Lider di partido MEP, Evelyn Wever- Croes, el a bisa: “Nos ta desea famia di Sr. Mito Croes condolencia y forsa den e dianan cu ta sigui.”

Lider di partido PDR Sr. Andin Bikker a bisa: “Cu sentido pesame nos a tuma nota cu Sr. Mito Croes a fayece. Un persona agradabel cu den nos experiencia semper tabata observa for di un perspectiva academico. Condolencia y hopi forsa na su famia, amigo y conoci nan.

Ayera mainta un registro di condolencia a wordo habri pa Sr. Croes na Gabinete di Aruba. Directora di Gabinete di Aruba Shandra John a firma e registro di condolencia entre otro personanan presente. Na e ocasion aki sra. John a bisa cu e noticia inespera di e fayecimento di Mito Croes a sorprende hopi hende, tanto na Aruba como aki na Hulanda. ‘Mito tabata un persona cu semper bo por a acerca pa cualkier conseho riba e tereno hudicial y di structura estatal. “Aruba a perde un gran yiu di tera”, asina Sra. John a bisa.

E registro di condolencia lo ta habri pa publico na Gabinete di Aruba durante di oranan di oficina (8.30am y 5.00pm).

 

LEAVE A REPLY

Please enter your comment!
Please enter your name here