Endy Croes: ‘Abuso di AVPista den Companianan Estatal!’

Parlamentario Endy Croes ta splica cu ta parce cu e bari Aruba lo no tabata tin bom pa esunnan di AVP. Durante tratamento di reunion publico den parlamento di Aruba, a manda pidi ministernan pa mas informacion riba nos companianan estatal.

Semper e sospecho tabata t’ey cu AVP y su amigonan tabata fiesta den nos companianan estatal, manera Utilities, Elmar, RDA, ATA, SETAR, AAA, pa nombra algun. Durante tratamento di presupuesto 2019, minister a pone ‘ter inzage’ hopi documento tocante algun investigacion cu ta andando den algun di e companianan estatal. Manera nos a priminti, pa ta transparente cu pueblo ta nos deber, pa brinda pueblo informacionnan necesario di locual a tuma luga den e companianan aki di gobierno, cu bendicion di Mike Eman y demas ministernan di AVP.

Fiesta cu placa di pueblo

Mester bisa ta hopi tristo pa mira con a fiesta cu placa di pueblo. Tin un periodista conoci bou di e nomber di ‘Speed’ kende tambe a djodjo. Semper a carga maleta pa Mike Eman, biahando rond mundo, te hasta cu metrayeur ta saca potret na Colombia den selva, y ta grita na radio ‘ta cu mi placa mi ta biaha’. Berdad den cuentanan di gobierno no a haya documentonan cu por a divulga cu a cumpra pasashinan pa entre otro Speed. Pero tampoco 1+1 no por ta 3. Awe lo splica cuanto placa nan a ranca di companianan estatal, y cu gran probabilidad tabata uza e recursonan aki, chicando e companianan pa paga pa nan biahenan y fiestanan luhoso. Investigacion mester bay riba e eficiencia (doelmatigheid) di placa cu a wordo saca, y mira si en berdad e trabou cu nan a cobra p’e a wordo haci, y si e tabata bal e placa cu nan a cobra. Futuro cercano lo determina esaki.

Atraco riba fondo di gobierno

Teragroup a cobra na ELMAR Afl 626,000.- y na RDA un otro Afl 444,545. Pero esey no tabata basta, ya cu a strica den Utilities Afl 362,000.- hunto cu un otro Afl 44,340.-  di 24ora.com. Banda cu e grupo aki di Patrick Paskel y Speed a atraca fondo di gobierno na balor di 5 miyon na propaganda, awor ta sali na cla cu nan a ‘hit’ companianan estatal tambe na un balor di Afl 1.5 miyon, sumando un total te cu awor di 6.5 miyon. Croes ta sigui bisa cu ta pone corda e cancion di Jeon: “Hayayay nos tin dushi bida, nos tin e cosnan di mas bunita”.

Mas stricamento cu placa

Richard Arends, parlamentario di AVP, no a keda mucho leu, y banda cu el a strica mas di 2 miyon den gobierno como consehero hunto cu su compania Horizon Consultancy, awor a sali na cla den e investigacion preliminario cu Richard Arends a cobra via Horizon Consultancy den Utilities un suma di Afl 585,223.- y den RDA un otro suma di Afl 500,000.-, cual ta mas di 1 miyon. Pues Arends tin hopi talento y ta multifuncional. El a negosha caso di CITGO pa gobierno, cobrando sumanan miyonario, y alabes ta conseha RDA pa un otro suma di 500 mil. Banda di esaki, el a logra haya un tereno ‘prime land’ na Malmok unda su cas ta traha awe. Esakinan ta amigonan personal di Mike Eman. Asina e amigonan aki ta para banda di pueblo pa defende interes di pueblo. Foei Mike Eman y AVP. Asina no ta trata cu placa di pueblo. Unda e sentido comun a keda? Unda norma y balor a keda? Unda Good Governance a keda? Unda Integridad a keda?

Mentalidad corupto di AVP

Croes ta sigui bisa: “Locual mi kier trece dilanti ta e mentalidad con AVP a maneha e pais aki, causando e Mega Debe, faboreciendo amigonan di cerca na monton. Awor, apenas e prome informacion a cuminsa drenta pa locual ta trata algun compania estatal. Increibel pa mira con esakinan a wordo maneha. Despues lo sigui amplia riba otro personanan, manera amigo di cas y man drechi di Mike De Meza, kende a strica hopi placa den Lotto, a wordo recompensa pa Mike de Meza den RDA, unda el a cobra via su compania IT Pro mas di 400 mil y ta cobrando 20 mil pa luna ainda. PMEC, liga na Mike de Meza, a suta 350 mil den RDA. Arubahuis a ricibi 70 mil di Utilities. Esaki ta normal? Pues asina e fiesta tabata bay. Nos tin hopi mas, y pronto lo amplia riba demas fiestanan. Croes ta manda mensahe pa su propio gobierno: “Ta momento pa haci un schoonship cu man duro pa salba interes di nos companianan estatal y entrega keho contra esunnan cu a cobra placa bruto, pa mira si locual nan a cobra tabata husto of si tin caminda pa pone nan paga bek parti di e placa aki.” Croes ta termina puntrando si esaki ta forma parti di preparacion den Tienda di Ley di AVP? Puntra nos ta puntra.

 

You May Also Like

‘Violencia contra hende muhe no mag di bira algo cu ta wordo tolera na Aruba’

Segun sra Arends–Reyes, Parlamentario pa fraccion di AVP a tuma nota manera varios aña cu Aruba tambe ...

‘E proyecto Green Corridor ta costa 300 miyon y tin como 500 fayo cometi’

Parlamentario Marisol Lopez Tromp ( POR): Lider di fraccion di POR den parlamento, Marisol ...

‘Wardando ley di prohibicion di plastic, oxybenzone y styrofoam yega parlamento’

Parlamentario Daphne Lejuez (MEP) Manera conoci, gobierno di Aruba recientemente a anuncia cu entrante ...

Parlamentario Richard Arends (AVP): ‘A laga consumidornan pa nan cuenta’

ORANJESTAD – Durante e conferencia di prensa semanal di partido AVP parlamentario. Richard Arends ...