Cu e negociacion cu Hulanda para por lo pronto, na Hulanda nada ta stroba e periodo di vacacion den verano, nos tin un tipo di ‘adempauze’ den e dianan aki. No pa largo si, pasobra e problema no a keda resolvi y otro luna caba e discusionnan lo continua cu e mesun fervor.

Lo ta probable cu ta bin algun forma di regla e asunto, unda tur dos banda mester entrega algo di nan posicion extremo. Si no, anto si e problemanan ta bira hopi grandi. Nos a comprende cu Promer Ministro a manda un contrapropuesta envez di bay di acuerdo cu e proposicion Hulandes. E contenido no ta conoci, pero ta imaginable cu kier logra algo riba e dos puntonan clave, cu ta e dos leynan di Reino cu Hulanda ta desea. Ta mas cu logico cu no ta bay logra cu tur dos e leynan ta bay for di mesa, hasta un so ta dificil di imagina. Ta parce nos cu e ley cu ta menos dificil pa traga ta esun di supervision financiero, pasobra e supervision ta un realidad caba y di tur manera lo no bin un repeticion di e aventura di aña pasa unda a sabotea e acuerdo cu gobierno di Aruba y Hulanda a logra na november 2018. En todo caso, cu adaptacion, o mejor dicho eliminacion di e articulonan den e actual ley di Reino cu ta explicitamente referi na e situacion di e dos otro islanan, ta imaginable, tecnicamente mira, pa acepta e ley di Reino.

Otro situacion ta aceptacion di un entidad di Reino cu ta haya facultad bastante amplio pa ehecuta reforma cu ta regarda asunto cu Aruba mes mester regla. Si aki nos logra cu Hulanda ta dal un stap atras pa duna nos e espacio pa nos mes hacie, nos mester sa si kico nos ta bay haci riba tur e terenonan cu nan a trece dilanti… Por bisa cu nan a bin cu un ‘boodschappenlijstje’ di cos cu lo mester mehora den e proximo añanan, sino nos no lo mira avance. Ta aki nos ta cuminza haya e sentimento cu Hulanda ta mustra nos riba e cosnan pa cual nos no tin curashi, unda ningun politico ta lanta para y ta bisa cu “Hulanda no mester hacie, ta nos mester hacie”.

Manera enseñansa, por ehemplo. Aruba por reclama cu enseñansa ta un asunto cu mester keda pa Aruba. En principio nos tur por ta di acuerdo cu esey. Ban bisa cu nos ta logra convence Hulanda cu nan no mester mete den con ta desaroya enseñansa, anto lo ta logico tambe cu no necesariamente nan mester hinca placa den loke nos ta bay haci pa nos mes, toch? Anto cu esey nos ta acepta tambe cu nos mes ta bay sigui cu nos plannan, toch? OK, cual nan ta anto? Pasobra ora nos cuminza discuti e tema aki, nos ta ripara masha rapido cu tin tanto opinion cu tin habitante den e lugar aki. Nos ta bin topa cu e desastre cu a tuma lugar den e ultimo decadanan, unda e rendimento di nos enseñansa, midi cu cualkier instrumento, ta mustra bastante malo. Manera semper, e excusanan pakico no a logra no ta tarda pa subi mesa: nos no tabatin placa, nos tabata falta experticio, ta un proceso di hopi aña, etc. Tur e argumentonan ey ta real, pero e pregunta ta si nos tabatin hopi placa, y por a paga e experticio necesario, tambe si e ta tuma nos 10 aña pa construi algo, lo nos a supera nos conflicto y diferencianan di opinion? Ora e recursonan lo tabata disponible, direpente nos lo a yega na acuerdo sensato a base di ‘consenso’? No ta mihor nos reconoce cu por a logra hopi pa e isla aki, y nos no a logra pasobra e ideanan menos bon a logra haya mas apoyo politico, cu consecuencia cu nos ta termina cu cosnan innecesario, o cierto cosnan a keda sin haci, pasobra nunca por a yega na un consenso, pa bon di e comunidad?

Nos a tuma enseñansa como ehemplo, pero nos no a haci esey pasobra esaki ta e tereno cu mas problema cu otro. Nos por a tuma tambe e aparato publico cu nos no por paga mas, unda mester corta mientras nos sa sigur cu ningun politico na Aruba lo tin e curashi pa tuma e tarea pa su mes: haci algo util pa bo pais mientras bo sa cu bo no ta sobrevivi e siguiente eleccion… ta ken ta haci esey? Sin embargo, na e momento aki ta esey nos tin mester. Un politico cu ta dispuesto di lanta para y mustra su mes mas grandi cu e otronan, dispuesto y capaz di asumi responsabilidad y logra loke e otronan ta core p’e.

Pregunta na e tantisimo admiradornan di Betico Croes: no ta esey el a haci na 1985, a sabiendas cu den e siguiente eleccion e lo a haya e factura presenta? El a tuma e medidanan cu mester a tuma, sin un Hulanda pa bis’e kico pa haci. Pero, nos ta bibando den otro era, unda ta parce cu tur politico a studia matematica y ta midi tur cos cu midi di exito den proximo eleccion. Politico tambe ta bin den diferente tamaño.

 

LEAVE A REPLY

Please enter your comment!
Please enter your name here