Ainda gobierno ta den deliberacion cu e compania Aruba Airlines. Pero te na e momento no tin ‘okey’ of aprobacion pa nan realisa un vuelo di transito Venezuela-Aruba-Merca y vice versa.
Premier Evelyn Wever-Croes no ta descarta cu lo por bin un flexibilisacion di forma responsabel pa un periodo di prueba. Y si tur cos ta bay bon, e ta wordo extende cu otro periodo mas. Pero nan ta den deliberacion ainda, ya cu nan ta definiendo e condicionnan pa por yega duna un excepcion na e compania aki. Pero di otro banda, e prome mandatario a bisa cu e frontera cu Venezuela ta permanece cera.
Gobierno ta atendiendo cu e situacion di Aruba Airlines, ya si nan no ta haya un tipo di ayudo, nan ta bay haya problema financiero. Pa medio di un serie di corespondencia, nan a bisa e compania aereo cu gobierno ta evaluando nan peticion, cu por yega di otorga excepcion pa nan por realisa e tipo di vuelo solicita. Pero pa medio di otro corespondencia a yega di notifica e compania aki cu a bin otro asunto ariba mesa, locual a pone cu gobierno a informa nan cu esaki no ta posibel inmediatamente.
E tabata un serie of ‘cantidad’ di corespondencia, segun e prome mandatario. Pero nan no a manda niun corespondencia pa prensa, ya cu nan ta corespondencia interno.
