(ElTiempo) – E acumulacion di gas metano, aparentemente, a ocasiona diabierna pasa un explosion den interior di un mina di carbon den e zona rurla di Cucuta (Noord di Santander).

E accidente a laga tres trahado morto y cuatro mas gravemente herida.  E mina ta conoci como La Dinastía y ta situa na e vereda San Pedro, di e coregimento El Pórtico.

E comandante operativo di Polis Metropolitano di Cúcuta (Mecuc), coronel Wilson Antonio Pedroza, a indica cu ta haciendo un investigacion di rigor pa verifica e causa di e accidente, como tambe establece e legalidad di e explotacion na e sitio. Te na e momento ey e oficial ta kere cu e explosion tabata producto di e acumulacion di gas metano.

E mineronan cu a perde nan bida a keda atrapa den e mina. Despues di hopi esfuerso y varios ora di buskeda, e ekiponan di ayudo a logra saca e curpanan.

“E mineronan cu tabata den e zona a bisa cu nan a sinti e explosion di manera inespera, y esunnan cu tabata pafo a yuda esunnan herida, cu tabata na e entrada di e mina, loke a haci cu nan a logra sali”, segun Jesús Laguado, miembro di e cuerpo di bombero di Cucuta.

Alix Rolón, esposa di Orlando Rodríguez, un di e heridonan, a indica cu su esposo, di 30 aña, mester a haci operacion mesora, y cu e lesionnan sufri ta considerabel. “Mi ta haya straño cu esaki a pasa pasobra den e empresa ey nan ta hopi exigente, nos no sa pakico el a sucede. Mi ta spera cu mi esposo por sali bon di esaki.”

Esaki ta e di dos incidente registra den un siman den un mina di carbon cerca di e capital di Norte de Santander. Diahuebs pasa, den sector di San Faustino, un trahado a perde su bida despues cu el a haya golpi di un baranca cu a cay.