PIC 3 FHMD (1).JPG
—  Un campaña nobo cu e nomber Orange Aruba a wordo lansa pa Fundacion pa Hende Muher den Dificultad cu e proposito di conscientisa pueblo riba violencia domestico.
 
Sra. Suzy Kock Presidente di Fundacion pa Hende Muhe den Dificultad ta splica na Bon Dia Aruba tocante nan campaña Orange Aruba. E ta bisa cu e aña aki nan a dicidi di actua riba nan deber como fundacion, cual ta duna conscientisacion pa cu violencia domestico. Ta asina nan a dicidi di haci uzo di e campaña Unite cual ta un campaña bon conoci na Merca. 
Esaki ta un campaña cu ta dura 16 dia cuminsando dia 25 di November cu ta dia internacional pa conscientisacion pa violencia contra hende muhe y ta caba riba 10 di December cual ta dia internacional di derecho humano, asina Sra. Kock ta splica. Fundacion pa Hende Muhe den Dificultad ta e campaña Unite cual na aña 2015 tawata Orange the World. E aña aki FHMD a dune e nomber di Orange Aruba 2016 y esaki lo ta e campaña di conscientisacion di fundacion pa hende muhe den dificultad di tur aña, di awo padilanti.
Kico esaki ta bay encera pa Aruba?
Manera Sra. Kock ta bisa cu nan a haya hopi apoyo di parti di minister di Asuntonan Social minister Croes y minister president Eman. Tambe a haya ayudo di Monumenten Fonds, Stichting Ranchob, di comercio y te hasta for di diferente scol. Kock ta bisa di ta hopi agradecido pa e manera cu nan a wordo acerca y a wordo yuda cu e proyecto akinan. Riba 25 di November llo habri Orange Aruba 2016 cual ta e mesun dia cu e proyecto Orange Underwear lo cuminsa. Esaki ta un proyecto di studiantenan di IPA. Sra. Kock ta bisa cu e fundacion ta hopi gradicido pa e iniciativa di e studiantenan aki pa haci algo asina pa e cliente nan di e fundacion y ta haci un yamada na publico en general pa apoya e proyecto aki .
Apertura oficial Orange Aruba
Segun Sra. Kock e fundacion ta wordo apoya financieramente pa diferente personanan den comercio y di diferente instancianan. Fundacion pa Hende Muhe den Dificultad kier dedica nan mes specialmente na e personanan aki, pues e apertura aki lo ta ariba invitacion solamente pa duna danki na e persona y instancia nan aki. Sra. Kock ta sigui informa cu riba dia 26 lo tin un actividad tambe riba e barco Freewinds, cu e aña aki lo bay tin e tema di bida sin violencia contra hende muhe. Rincon Boyz lo bay toca. Sra. Kock ta sigui informa cu riba dia 27 FHMD lo ta presente na Cas di Cultura pa e presentacion di Club di Movimiento cu lo ta treciendo e tema di ‘Nos Heroenan’. Sra. Kock ta bisa cu e heroenan akinan ta esnan cu ta traha boluntariamente. 
Sra. Kock ta informa cu riba invitacion FHMD lo ta bay ta presente cu un booth di informacion pa esnan cu kier sa mas tocante e tema di violencia domestico y e trabou cu Fundacion pa Hende Muhe den Dificultad ta haci. Riba dia 28 di November, Sedar lo tene un seminario tocante gender and equality esaki lo ta tumando luga na MFA Paradera, cu entrada gratis. Riba dia 2 di December FHMD ta bay tin un dialogo nacional riba violencia domestico cu e pregunta principal di kico ta e solucion. Esaki lo bay tuma luga na Universidad di Aruba y akinan tambe entrada ta totalmente gratis, y ta encurasha pueblo pa participa na e dialogo aki.