Comunicado di prensa di Rainbow Warriors International riba asunto di Parkietenbos:

Na mei 2016 Rainbow Warriors International a produci un rapport tocante e dump di Parkietenbos pa Fundacion Parkietenbos cu e intencion di recapitula tur e lineanan di maneho y proyecto di e ultimo 25 anja y duna un resumen technico di problema ambiental y salubridad publico y un indicacion na unda e dump nobo lo mester bini.

 
Den e rapport aki ta detaya e maneho desde Minister Charro Kelly na 1991 te cu e actual Minister di Medio Ambiente.
 
Ta resalta dos cos principal, esta (1) e maneho durante e ultimo 25 anja tawata ad-hoc, sin structura y cu falta di planificacion a largo plazo y (2) cu e dump na Parkietenbos ta un timebomb caracterisa pa e hecho cu tur sorto di material chimico toxico y nuclear a ser dera na e sitio.
 
E rapport ta menciona bon cla cu MESTER cera y sanea e dump mas pronto posibel, cual saneamento mester encera tambe restoracion di ful e area di mangel na Parkietenbos.
 
Ora cu DESPA y Gobierno Mike Eman II purba di prolonga e agonia di e habitantenan di e barionan di Kas Paloma, Simeon Antonio, Buena Vista y Parkietenbos, dor di no cera e dump y no crea un dump nobo nan ta ignorando hecho irefutabel cu e ta daninjo pa salubridad publico y cu e contaminacion ambiental ta inaceptabel.
 
Contrario na loque DESPA kier pa pueblo kere, esta cu Parkietenbos no ta un problema grave, e rapport di Parkietenbos ta basa su mes riba rapportnan technico traha den tempo di Directie VROM.
 
Tambe e rapport ta caba cu e ilusion cu e proyecto di Bouldin and Lawson ta sirbi.
 
A bira ora cu Gobierno cera e dump di Parkietenbos y crea un dump nobo, pa cual e sitionan mas adecua ta ser menciona den e mesun raport.
 
Riba e tema di asbest y materialnan nuclear dera rond di Aruba pronto Rainbow Warriors lo publica un resumen basa riba HECHOS y no speculacion, manera actualmente ta corre rond riba medionan social riba Internet.
A bira ora pa Gobierno di Aruba stop di hunga wega cu e problematica di sushi y desperdicio comercial y industrial. E salud di nos pueblo y nos medio ambiente ta den crisis y mester atende cu e asunto cu seriedad en bes di cu promesanan falso haci pa mas di 20 anja caba na e habitantenan di e barionan afecta.

Akinan por lesa e RAPPORT completo di Parkietenbos.

 
Milton Ponson, President
Rainbow Warriors Core Foundation
(Rainbow Warriors International)

LEAVE A REPLY

Please enter your comment!
Please enter your name here