E destaho publico pa bin cu un sistema di Waste To Energy unda ta kima desperdicio pa converti esaki den energia a conclui sin ningun interes di parti di e mas o menos 15 compania cu tabata registra na notario. Asina Bon Dia a confirma ayera atardi cerca Notario Johnson.
Den un reaccion na portal Noticiacla.com, Minister Otmar Oduber (POR) a splica cu seguidamente lo sondea ‘si e companianan registra lo kier participa den un di dos ronda cu mas tempo pa entrega nan oferta’.
Den un comunicado, Minister ta splica dicon ta bayendo pa e sistema di Waste To Energy. E escogencia pa bin cu un incinerador no ta un decision sin mas di parti di gobierno. E decision ta basa riba e proceso di ‘Request For Information’ (RFI) cu a tuma luga caminda cu gran mayoria di e companianan cu a participa a bisa di ta mira cu pa e problematica cu tin na Aruba, incineracion ta e caminda pa cana. Minister di Desaroyo Teritorial, Infrastructura y Medio Ambiente Oduber ta aclaria tambe cu e proyecto aki lo no encera inversion di gobierno y tampoco e lo ta un proyecto PPP. Al contrario, for di inicio semper a papia di un modelo financiero ‘Build Own Operate’ (BOO), cu ta encera: E compania cu kier participa mester por haci esakinan: Construi, ta doño y opera (Build, Own, Operate).
Minister Oduber a splica cu e sistema aki ta mescos cu a haci mas di 10 aña pasa pa loke ta trata e molinanan di biento na Vader Piet. Pais Aruba no a hinca ningun florin den e proyecto, e compania cu a construi esaki a opera esaki, ta doño y ta bende e coriente na WEB. Cual ta e formula tambe pa e incinerador. Esaki ta hopi importante pa comunidad ta na altura, pues cu gobierno lo no financia e proyecto aki, ni tampoco drenta den un acuerdo di proyecto PPP.
Dia cu Secretario di Estado Knops tabata na Aruba, Minister Oduber a haci bishita na e sitio y a dun’e splicacion di e proyecto cu ta wordo hiba tambe. Netamente pa puntra e contrario, di insinuacionnan cu lo ta trata di un proyecto PPP, Minister Oduber a termina bisando.
