Aruba Airlines ta aclaria tur informacion, rumor y datonan cu no ta cuadra cu realidad, esaki ta pa motibo cu e informacion eroneo cu a keda publica den medionan di comunicacion recientemente no ta cuadra.

Segun e comunicado cu Bon Dia Aruba a ricibi ta bisa cu e aerolinea local ta garantisa cu e relacion cu aeropuerto ta uno solido. “Nos tin un bon relacion cu aeropuerto, nos ta mantene un bon comunicacion y un relacion di negoshi saludabel cu AAA”, asina gerencia di Aruba Airlines a indica.

A sigui splica cu tur operacion di e aerolinea na aeropuerto Reina Beatrix ta ser desaroya den margennan di normalidad y ta cumpli cu tur standard global regula pa organisacion y institutonan internacional.

E aerolinea ta confirma cu no tin ningun personal ilegal trahando cu e aerolinea di ningun nacionalidad. 95% di e empleadonan di Aruba Airlines ta Arubiano y den caso di e demas trahadonan, tur ta cumpli cu e condicionnan rekeri pa traha legalmente riba nos isla.

“Como e aerolinea cu ta representa Aruba, nos prioridad ta pa contrata Arubiano. Solamente den casonan unda cu nos no a haya un persona adecua pa e vacatura, nos a haya nos mes ta contrata un stranhero. Sinembargo, pa nos e ta fundamental cu e grupo aki ta representa e 5% di nos staf, ta conta cu tur permiso y documentonan na ordo”, asina gerencia di e aerolinea a expresa.

Gerencia a sigui splica cu e aerolinea ta representa actualmente 125 famia Arubiano, di cual nan ta para pa e interes, bienestar y stabilidad di e famianan aki. Pa es motibo, e compania ta sumamente agradecido cu tur empleado y staf, pero tambe cu henter comunidad cu a sa di duna un tremendo apoyo durante e 6 añanan cu Aruba Airlines ta operando como aerolinea local di Aruba.

A pesar cu cierto situacion fuera di control di e aerolinea sa presenta cu por afecta e vuelonan cu ta sali regularmente for di nos pais, Aruba Airlines ta sigura cu nan ta sigui traha duro y nan esfuerso ta continuo pa asina garantisa cu tin continuidad y regularidad den tur operacion di e aerolinea.

E representantenan di Aruba Airlines ta splica cu ta trata aki di un compania priva estableci y cu ta opera pa 6 aña caba riba nos isla. “Nos no tin ningun vinculo cu ningun partido politico ni tampoco representantenan di Gobierno. Nos ta traha na bienestar di tur nos clientenan”, asina a indica.

 

LEAVE A REPLY

Please enter your comment!
Please enter your name here