E programa di Formacion Social lo conoce un faceta nobo cu e aceptacion di ser femenino pa participa den dje. Esaki ta un anuncio cu minister di Asunto Social, Glenbert Croes a realisa hunto cu Jessica Ras, kende ta coordina e programa aki na Marinierskazerne.

“Como un bon noticia”, e mandatario a cualifica e hecho aki, ya cu e intencion di gobierno di gabinete Wever-Croes tabata esun di incorpora hende muhe den e programa aki.

E proceso pa acepta hende muhe jong den e programa aki ta hayando forma, y nan ta cuminsa haya e personal pa por desaroya e curriculum cu seguramente mester di un maneho particular.

For di cu nan a drenta gobierno nan a identifica e programa aki como un di ‘balor di oro’ pa forma bida di nos hobennan y duna nan un futuro nobo pa medio di e programa di formacion aki. “Gobierno di Aruba ta comprometi cu Formacion Social,” e mandatario a bisa.

E mandatario tabatin palabra di gradicimento pa Jessica Ras y tur e team di Arumil pa nan dedicacion riba e programa aki. Pero tambe e comandante di Marinierskazerne na Savaneta, cu a brinda tur apoyo pa sigui ehecuta e programa aki, cu ya caba tin 8 aña di existencia.

E programa ta destina pa hobennan entre 18 pa 24 aña di edad den bon condicion di salud. Nan a organisa e prome anochi di informacion ayera pa e di 13 grupo cu lo participa den e programa aki, cuminsando 9 di maart proximo.

For di aña pasa nan ta bezig cu e inscripcion pa incorpora mas hoben. E di dos reunion lo ta dia 19 di februari di 7:30pm pa 8:30pm na MFA Noord. E persona interesa mester presenta cu su ID y AZV. Eynan tanto e mayornan como e eventual candidato por haya mas informacion con e programa aki ta hinca den otro.

LEAVE A REPLY

Please enter your comment!
Please enter your name here