Pa sindicato FTA e ola di criminalidad cu ta sutando nos isla ta keda un preocupacion grandi.

Ya den pasado e sindicato aki a yega di expresa nan preocupacion hunto cu bloke sindical; y un biaha mas nan ta demanda di gobierno pa actua cu man duro pasobra e situacion ta “keda preocupante”, asina presidente di FTA Hubert Dirkzs a declara na Bon Dia Aruba ayera. E fenomeno di atraco y criminalidad ta keda un peliger locual ta haci Aruba un pais vulnerabel  y insigur, segun e. E sindicalista a expresa cu FTA lo promove un reunion cu e otro sindicatonan pa bolbe trata e asunto aki; y actualmente e sindicato ta combersando cu nan. “Nos ta informa gobierno caba cu nos  no ta tolera e situacion aki.  E ta hopi serio!”, segun sr. Dirkzs. Papiando cu e otro sindicatonan, FTA ta kere cu definitivamente e gobierno a faya pa pone prioridad.  Pero esaki ta pone tambe cu si nos no ta haya un parlamento mas fuerte pa cuestiona y tuma e decisionnan,  Aruba su situacion ta bira pio cu despues nos ta bay lamenta, segun e presidente.

FTA ta representa e mayoria di e trahadonan cu ta traha den e sector turistico y di horeca. Nan ta haya cu si nos isla ta depende di industria turistico, gobierno no por permiti loke ta pasando.  Pasobra e nivel di criminalidad cu ta tumando luga ta demasiado; y e ta un peliger pa e pilar di nos economia, asina sr. Dirksz ta bisa. “Hortamento tur dia bo por bisa riba beach. Turistanan ta wordo afecta, nan auto y nan pertenencia.”

Ademas e atracadonan den comunidad ta inmenso caminda cada ciudadano ta haya nan mes den riesgo, si nan ta maneha placa of si nan tin negoshi. “Te hasta ancianonan den nan  propio cas, despues di traha hopi aña aworaki enbes di disfruta di nan temponan, nan ta haya  nan mes confronta cu atraco.”

FTA ta haya cu gobierno mester pone mas atencion y tuma mas decision fuerte; y pone prioridad pa atende cu asunto di criminalidad.