Futuro insigur pa academia di arte cu stop di subsidio

Academia di arte

Aunke gobierno no a pone un stop na e idea pa un academia manera Academy of Fine Arts and Design (Afada), a dicidi pa pone un stop na e subsidio di e curso preparatorio. Mirando cu e fundacion cu ta maneha e proyecto ta forma un peso demasiado grandi pa pais Aruba teniendo cuenta cu e resultadonan cu e programa a produci.

Despues cu un grupo di studiante di Afada a entrega un carta na gobierno di Aruba expresando nan preocupacion pa e futuro di nan scol, minister di enseñansa Rudy Lampe (RED) a reacciona na matutino 24ora bisando cu a percura pa pone un stop na e subsidio cu e fundacion encarga cu e programa ta ricibi despues cu e hobennan a termina nan curso.

Curso preparatorio
Sinembargo, e minister a indica cu pone un stop na esaki no ta forma un problema pa e studiantenan sigui nan estudio mirando cu esaki ta un curso preparatorio. “Nan no ta haciendo un bachelor. For di 5 aña pasa cu e Rietveld Academie a yega Aruba tabata e idea pa cuminsa cu un bachelor. Pero esaki no a bin. E programa cu e studiantenan tabata siguiendo a stop desde april ultimo, pues como gobierno responsabel nos a keda subsidia te na april ultimo.”

E programa cu nan ta sigui ta laga studiantenan amplia nan conocemento di arte den diferente disciplinanan manera video art, diseño digital y tambe diseño di moda pa mas o menos 8 luna. Esaki ta pa prepara nan pa drenta scolnan di arte y diseño na nivel internacional, mirando cu tin nivel halto di competencia pa drenta tal academianan. “Varios di e studiantenan cu a firma e carta aki ta studiando caba den exterior.”

Programa mucho pisa pa sostene cu resultadonan actual
Despues di analisa e situacion, gobierno a dicidi cu no ta responsabel pa sigui subsidia manera e tabata. “Ban pone asina: Merca por afford pa paga un NASA. Aruba no por afford pa paga un NASA. Nos a wak cu den 5 aña 4.1 miyon florin a bay den e fundacion aki, mientras bo ta wak e cantidad di studiante cu a logra yega na nan meta, 6 so a logra pasa. Kiermen 4.1 miyon pa 6 studiante como resultado final, nos no por afford e. Casi 1 miyon pa un studiante.”

Sr. Lampe ta menciona e esfuerso pa lanta un programa di bachelor, cual no a logra. Nos fuentenan na e academia a yega di expresa e dificultad huridico cu tin pa por establece e academia como un estudio na nivel HBO, mirando cu no tin un base huridico pa lanta esaki.

E curso preparatorio tabata trece diferente docente tanto local como internacional como instructor pa e diferente materianan cu e studiantenan lo haya di manera acelera durante e curso. Despues di papia cu algun di e docentenan local, par di nan a expresa cu aunke nan ta kere fielmente den e programa aki, e ta dificil pa defende e programa mirando e maneho cu a bin na cla awo cu e noticia a sali. Te hasta nan a splica cu pa basta tempo no tabatin computernan pa e studiantenan uza, cual ta straño mirando e entrada di e pago di studiante hunto cu subsidio lo ta un suma substancial.

E maneho aki no a tuma luga solamente ora cu e fundacion tabata operando e scol, si no di prome cu e a concipia e idea. “E plan original tabata pa un edificio den caya grandi, tambe di un comerciante conoci pa un prijs rasonabel. Asina dunando apoyo na caya grandi. Contra tur regla ex prome minister a dicidi cu toch e ta bay na otro edificio di un otro comerciante cu e conoce, pa un prijs di 4 bes mas caro. Si bo haya huur un edificio pa tal prijs y toch bo ta bay pa un edificio cu ta 4 bes mas caro, there’s something wrong. P’esey a bin un cambio aña pasa.”

Alternativanan pa sigui cu programa
Sinembargo considerando esaki, minister a splica cu a surgi 3 alternativa pa laga e programa sigui. E prome cu a propone na e hunta di directiva di e fundacion ta cu lo por bin un joint venture hunto cu un universidad Mericano, ‘mescos cu bo tin e pre med schools aki na Aruba’. Si tin un universidad cu kier establece un ramo di bellas artes aki na Aruba, e ora ey studiantenan di Merca por bin studia pa un prijs hopi mas abou cu scolnan na Merca, segun sr. Lampe.

E otro alternativa ta cu por bin cu un programa di intercambio pa studiantenan Europeo haci un parti di nan estudio aki na Aruba na un academia di arte, ‘y ta nan e ora ey lo financia esaki’. Alabes, e minister a menciona un alternativa den loke ‘nos tin na Aruba caba, un Ateliers’. Asina mencionando Ateliers ’89, Academia di Bellas Artes. Sinembargo, nos fuentenan ta indica cu no tin un interes pa coopera entre Afada y Ateliers ’89.

Futuro insigur pa e academia
Si Afada lo por continua bou Stichting Rietveld, e minister ta habri pa otorga subsidio si bin cu un plan ‘mescos cualkier otro fundacion, responsabel y realistico’. Sr. Lampe ta dispuesto pa sinta na mesa, y te hasta a expresa cu a trece hunto e fundacion cu Universidad di Aruba.

“Unda Universidad di Aruba a studia un idea cu mi a bin cun’e pa integra e fundacion aki den e universidad. E reaccion a yega, pero te ainda nos no a haya un solucion cu ta financieramente responsabel. Kiermen di nos banda nos tabata willing, nos a sinta na mesa y nos lo sigui sinta na mesa.”

Si lo por reestablece e programa di curso preparatorio pa e aña aki, sr. Lampe a expresa cu ‘ta depende di e fundacion’. El a subraya cu gobierno no por mete den kico lo ta e plannan di e fundacion, pues nan mes lo mester dicidi si tin un caminda pa cana den un direccion y cu ‘di nos banda cu mucho gusto nos lo duna asistencia’.

Finalmente nos fuentenan a indica cu lo tin algun plannan pa establece e scol aki na otro edificio, mirando e suma halto cu tabata huur e edificio na Wilhelminastraat pe.

You May Also Like

image.jpeg

Lider di PLD y presidente Dominicano Danilo Medina a gana na Aruba

Mientras cu ainda e proceso di contamento di voto ta tumando luga manual na Republica Dominicana, caminda ...

Tin un maneho contra dump ilegal pero OM no ta actua

Despues un caso a base di e Algemene Politie Verordening na 2011 contra un ...

consecuencia producto falsifica.jpg

Falsificadonan di productonan ta hendenan cu ta specialisa cada biaha mas

Asociacion Interamericano di Propiedad Intelectual (ASIPI) a scoge Aruba pa realisa su seminario internacional ...

DNM: ‘Awo mester tene cuenta pa tin un maneho responsabel’

Durante conferencia di prensa di Directie Natuur en Milieu (DNM) a anuncia e decreto ...

21jan, JM, Serlimar.JPG

Serlimar cu varios cambio pa 2016

Aña 2016 lo ta un aña cu Serlimar lo mira algun cambio, como tambe ...