Serlimar: ‘Ningun dump lo habri na ex-edicifio DTI na Pos Chikito’

Tampoco lo no sortia of procesa desperdicio na e sitio aki

Recientemente tin hopi conmocion y confusion relaciona cu e topico di mudamento di Serlimar pa e ex-edificio di DTI na Pos Chiquito. Diferente canalnan di media ta publicando noticia tocando e topico aki, pero varios ta publicando informacion incorecto y ta causando panico y confusion entre nos comunidad, specialmente e habitantenan di Pos Chikito”, Serlimar ta bisa den un comunicado di prensa.

Segun Serlimar ta splica, nan a ‘sigui tur e desaroyonan aki di cerca y ta desapunta den e forma cu a scoge pa troce informacion y publica noticia falso, sin cu a acudi na Serlimar mes pa verifica e desaroyonan actual’.

Serlimar kier informa e comunidad di Aruba cu informacion corecto y concreto pa locual ta trata uzo di ex-edificio di DTI. E plan cu tin actual ariba mesa pa locual ta trata e oficinanan di ex-edificio di DTI, ta pa muda e departamentonan no-operacional di Serlimar entre otro; Helpdesk, Secretariaat, Marketing & Sales, Finansas, Human Resources y Concierge pa asina por ubica mas central di nos clientenan y principalmente e comunidad. Departamentonan operacional manera Containerpark, Afvalinzameling y departamento di maneho Parkietenbos no lo muda pa Pos Chikito. E parti di e edificio aki lo wordo comparti cu Bureau City Inspector (BCI), mirando e echo cu tur dos departamento ta trahando hunto pa combati e problema di desperdicio y ta organisando limpiezanan grandi den diferente barionan na Aruba.”

Pa locual ta trata e keuringslokaal bieu, tin un plan pa transforma esaki den un ‘recycle-drop off-center’, esaki no ta un planta caminda desperdicio lo wordo deposita, ni separa, ni procesa, segun Serliamr. Tampoco e lo ta e sitio caminda trucknan di Serlimar lo trece desperdicio, nan ta sigui bisa. “Esakinan ta informacionnan incorecto cu Serlimar ta condena, pa e simpel echo cu e Landsverordening di Serlimar y nos leynan no ta permiti pa desaroyonan di tal forma tuma luga den un area habita. E gastonan envolvi pa huur e edificio aki ta wordo considera como un inversion pa desaroyonan di e compania Sui Generis y no ta un punto cardinal cu lo stroba e proceso di mudamento.”

Recycle-drop off-center

Serlimar ta splica cu un ‘recicle-drop off-center’ ta un centro caminda nos comunidad boluntariamente por deposita nan desperdicio reciclabel di cas y asina ‘contribui na un maneho responsabel’ pa yuda reduci e cantidad di desperdicio innecesario cu tin actualmente tur caminda benta riba nos isla.

Desperdicio reciclabel cu por wordo entrega na e centro ta material manera; papel of carton, bleki di metal, boter di glas, plastic number 1,2,4 y 5, textiel y tambe palo. Tur e material cu wordo entrega lo mester cumpli cu e reglanan di e centro prome cu wordo deposita den e bakinan, por ehempel; tur bleki, boter di glas y plastic mester ta limpi, e cantidad di material cu ta wordo deposita tambe lo wordo controla. Esaki ta nifica cu tur material cu ta drenta e centro lo wordo controla pa contaminacion prome cu e wordo deposita, pa asina e proceso di reciclahe no wordo tranca.” Segun serlimar, esaki ta un di e disciplinanan di un ‘recycle-drop off-center’ cu na Aruba tambe mester cumpli cu ne. E motibo principal di Serlimar pa introduci e concepto di reciclahe, ta cu Parkietenbos a yega su capacidad pa carga e desperdicio di Aruba y nos no por sigui maneha desperdicio manera 30 aña pasa. Reciclahe ta un di e metodonan mas uza internacionalmente pa maneha y reduci desperdicio na un forma responsabel y a yega e tempo pa Aruba tambe adopta esaki, segun Serlimar.

Serlimar ta na altura di tur e desaroyonan cu mester tuma luga pa locual ta trata e introduccion di un programa di reciclahe y ta trahando duro pa introduci e metodo aki na un forma corecto y responsabel. Pa mas informacion tocante e topico di reciclahe of e centro di reciclahe por tuma contacto cu Serlimar na 5245080 of manda un mensahe riba Facebook Messenger”, e comunicado ta bisa na final.

You May Also Like

Trahadonan disgusta di TeleAruba lo busca representacion sindical

“E trahadonan di TeleAruba ta bastante disgusta”, asina presidente di sindicato STA, Diego de ...

Pa Aruba fia barata via Hulanda mester keda cu supervision

Minister di Asuntonan di Reino, Ronald Plasterk a indica cu si Aruba kier fia placa ...

Poco hende interesa den conmemoracion victimanan segunda guera mundial

Tur aña riba dia 4 di mei ta tuma luga un conmemoracion di segunda ...

Reunion intensivo tumando luga pa formalisa gobierno nobo

E politico di POR y parlamentario, Andin Bikker a bisa cu e proceso di ...

‘Kitando bijstand ta afecta otro miembronan di famia tambe’

Minister encarga cu Asuntonan Social y Labor Glenbert Croes (MEP) a recientemente revoca e ...

Image1.jpg

Click aki pa hay e ley di Citgo, conseho di Raad van Advies y contesta di gobierno

Esaki ta parti di e documentonan den cuadro di e ‘ley di Citgo’. Ley ...