Ayera sindicato STA a logra e mayoria di voto durante e referendum cu a tuma luga den sede di Mediador di Gobierno pa cinco departamento di aeropuerto (Triple A).

Mediador di Gobierno, Anselmo Pontilius a declara cu den tur cinco referendum, sindicato STA a haya mas voto absoluto cu sindicato FTA.

E tabata un referendum maratonico for di 8:30 a.m. te cu 2:30 p.m., ora cu e resultado di e ultimo referendum pa e trahadonan di security di aeropuerto a wordo conoci. E tabata e grupo mas grandi di 76 trahado. STA ta esun cu a pidi e referendum, pero sindicato FTA tambe a participa den dje. E cinco departamentonan di aeropuerto cu a participa den e referendum ta: charlie charlie, ASU, AMU, Security y Landside.

Mediador di Gobierno, Anselmo Pontilius a declara cu ley ta permiti pa realisa referendum pa departamento. Aña pasa FTA tabata esun cu a haya mayoria den un referendum den aeropuerto. Pero ayera despues di e resultado final di e cinco referendum, awor gerencia di aeropuerto tin dos sindicato cu ta representa nan trahadonan pa atende cu nan.

 

Pontilius a bisa cu esaki no ta e prome caminda cu e dunado di trabao ta hay’e cu dos sindicato pa aden. Den e caso aki gerencia di Triple A N.V. tin cu bay mira con e ta bay negosha un contract colectivo (CAO) cu dos sindicato. FTA ta representa trahadonan den staf y un grupo di trahado general. Mientras cu sindicato STA cu semper a haci presencia den aeropuerto a gana referendum den cinco departamento.

“Aworaki mediante referendum e compania no por nenga nan e derecho di negosha un contract colectivo,” Pontilius a bisa. Ya sea cu gerencia di aeropuerto ta sinta conhuntamente cu ambos sindicato. Of tambe nan por sinta separa di e partidonan pa negosha un CAO.

E hecho cu tin dos sindicato den un compania, e ta debilita of fortalece posicion di e trahadonan? Riba e pregunta aki, Pontilius a contesta cu esaki ta depende con dirigente sindical mes hunto cu e trahadonan ta sinta hunto pa evalua nan meta comun, y con nan ta bay atende cu esaki. “Pasobra na final e resultado di un contract colectivo ta conta pa tur trahado, sin excepcion,” el a bisa.

LEAVE A REPLY

Please enter your comment!
Please enter your name here