Segun Minister di Infrastructura, a busca un abogado di Corsou pa defende minister den e caso sumario cuminsa pa un habitante di Parkietenbos pasobra no tabatin experticio riba materia di medio ambiente y waste management na Aruba. Sinembargo nos matutino a confirma cu e abogado cu a scoge no tin experticio specifico riba medio ambiente. Ademas, ta trata aki di un caso di ‘hinder’: proceduranan civil cu abogadonan na Aruba sa sigui.

Asina Minister di Infrastructura Marisol Lopez-Tromp (POR) a declara ayera mainta den conferencia di prensa riba pregunta di un periodista. Manera Bon Dia a yega di raporta caba, Anouk Balentina, habitante di Parkietenbos, a cuminsa e caso sumario pasobra e y su yiunan ta sufri pa via di e kimamento di entre otro material medico na dump, mientras e fundacion cu a colecta firma pa stop esaki no ta actuando y no a sinta cu e habitantenan. Mescos cu a raporta caba, no tin un conclusion ainda mirando cu hues no a dicta si no a duna gobierno oportunidad pa drecha e situacion y a ‘hou aan’ e caso temporalmente.

Parlamentario a puntra tocante abogado pero no tin contesta desde februari.
Loke a resalta desde cu a cuminsa e caso, ta cu a scoge pa trece un abogado di Corsou pa representa e minister, mientras tin abogadonan na Aruba cu lo por represent’e. Referente esaki Marlon Sneek di fraccion di AVP riba 13 di februari a lansa un par di pregunta por escrito unda ta pidi un splicacion riba esaki. Bon Dia a check cu Sneek si a ricibi contesta riba esaki, pero Sneek a indica cu te dia di awe no tin contesta riba su preguntanan. E preguntanan cu Sneek a haci (traduci) ta: 1. Dicon a scoge pa un abogado of bufete di Corsou en bes di un situa na Aruba?

2. Kico ta e tarifa cu e bufete ta cobra di pais Aruba pa ora?

3. Cua ta e tarifanan rasonabel estableci pa DWJZ cu un abogado por cobra di gobierno?

4. Dicon pais Aruba no a scoge pa un representante di DWJZ mes?

Minister: ‘Abogado di Corsou no ta cobra mas cu cualkier otro abogado di Aruba’.
Aunke te ainda no a duna contesta riba e parlamentario su preguntanan, awe mainta minister a informa cu e abogado/bufete en cuestion no ta cobra mas cu cualkier otro abogado aki na Aruba. E contesta aki, sinembargo, no ta contesta specificamente Sneek su pregunta riba cuanto ta e tarifa pa ora ni dicon no a scoge pa DWJZ, ni cua ta e tarifanan estableci pa e departamento huridico.

Abogado scogi pa minister no tin experticio specifico ambiental.
Riba e pregunta dicon no a scoge pa un abogado di Aruba, Lopez-Tromp a contesta lo siguiente: “T’asina cu como minister pa cada caso cu presenta na mi persona, semper bo kier haya un bon representacion pa gana e caso pa land Aruba y loke semper mi ta wak ta e parti di experticio y conocemento riba e materia di un abogado. E ta hopi importante y e caso aki cu ta toca hinder pa loke ta nos ciudadanonan cu ta sinti esaki, e no un tema cualkier tema. E ta un tema cu sigur tin su experticio y conocemento rond di dje, pa ora bo bay splica den corte, y den e caso aki manera mi a menciona, mi ta wak ken tin experticio y conocemento riba medio ambiente, riba naturalesa, y experiencia cu e tipo di caso aki. Aki na Aruba, lo mi desea e ora ey pa e medio di prensa informa mi of bisa mi si e lo sa cu tin un abogado cu experticio riba milieu en waste management. Pasobra cu ami sa, no tin echt e experticio ey den abogacia [na Aruba].”

Sinembargo, despues di a mira riba website di e bufete di abogado Ox & Wolf, no por a mira cu e abogado en cuestion tin experticio di medio ambiente, of ‘hinder’. Pa sigura cu no ta publica informacion eroneo, nos reportero a yama e abogado, y e abogado a splica cu e no tin experiencia specifico den area di medio ambiente, si den representa gobierno. Ademas cu ta trata aki di ‘hinder’ y no naturalesa/medio ambiente.

Balentina: ‘Pasobra no tin ley di medio ambiente mester cana via hinder’
Nos a tuma contacto tambe cu Balentina, y Balentina a indica mescos cu e abogado a indica cu e caso ta trata hinder. E rason dicon ta cana via hinder, cual ta un articulo den codigo civil di Aruba, ta pasobra no tin ley ambiental. Balentina a comenta ademas cu: “Tin abogado na Aruba cu a yega di haci hopi caso di hinder”. Aki por pensa riba entre otro David Kock y Geert Rep, e ultimo aki representando Aruba Birdlife Conservation, por ehempel. Balentina a comenta finalmente cu: “Si tabata proteha medio ambiente lo tin ley di medio ambiente. No por medio di busca un abogado di afo pa bringa un ciudadano cu ta luchando pa su salud.”

LEAVE A REPLY

Please enter your comment!
Please enter your name here